Táýelsizdik qurdastary

Men baqyttymyn! Osydan 20 jyl buryn 16 jel­toqsan kúni Kúrshim aýdany, Dińgek aýylynda dúnıege kelgenimdi maq­tan tutamyn. Sebebi, dál sol kúni elimiz óz táýelsizdigin jarııa etkeni belgili. Ata-babalarymyz ǵasyrlar boıy ańsaǵan táýelsiz eldiń azamaty bolǵanyma, dál sol kúni ómirge ákelgen ata-anam Qızat Aǵa­daev pen Qaınıjamal Sultanǵalı­qyzyna alǵysym sheksiz. Myna bir oqıǵa esimde máńgi saqtalatyny sózsiz. El táýelsizdiginiń 10 jyldyǵy qarsańynda Elbasy táýel­sizdik qurdastarynyń – on jastaǵy balalardyń basyn qosyp, quttyqtaý úshin Astanaǵa jınady. Shyǵys Qazaqstannan barǵan balalarǵa «Kazsınk» jaýapkershiligi shekteýli seriktestigi demeýshi boldy. Elbasy N. Nazarbaev táýelsizdik kúni týǵan balalardy quttyqtap, árqaısymyzǵa kompıýter men rolıkti syıǵa tartatynyn habardar etti. Alaıda, sol baǵaly syılyq nege ekeni belgisiz, bizge jetpeı qalǵany da esimde qalypty. Biraq másele onda emes, Elbasymen birge eskertkish sýretke túsip, Astanany aralaǵanymyz, ózimmen qurdas balalarmen tanysqanymdy eske alǵan saıyn, keýdemdi qýanysh kerneıdi. Táýelsizdik qurdasy bolǵan soń oqýda ozat bolǵanǵa ne jetsin. Mektepte tártipti bolyp, oqýda da aldan kórinip júrdim. Qol kúresi men fýtboldan aýdan namysyn qor­ǵap, oblystyq jarystarda san márte júldeger atanǵanym jáne bar. Sondaı-aq «Úzdik shabýylshy» ataǵyn ıelengenimdi de maqtan tutamyn. Biz jastar, Elbasy N.Nazarbaevtyń ákelik qamqor­lyǵyn aıqyn sezinýdemiz. Jataqhanada sabaqty pysyq­taýǵa tolyq múmkindik bar, ýnıversıtet kitaphanasynda materıaldyq baza kún talabyna saı, kompıýter, qajetti zattardyń barlyǵy jetkilikti. El táýelsizdiginiń 20 jyldyǵyn búkil elimiz laıyqty tartýmen qarsy alatyn kún de jaqyn. Qazir Qazaqstandy búkil álem jurtshylyǵy biledi. Kúni keshegi Sammıt, EQYU-ǵa tóraǵalyq etý, Azııa oıyndarynda top jarý elimizdiń ataq-dańqyn búkil álemge tanytty. Elbasy         N.Nazarbaevtyń sarabdal saıasaty nátıjesinde Qazaqstan keleshekte de kók baıraqty joǵary ustap, bıik belesterden kórine bermek. Oǵan biz de laıyqty úles qosa beremiz.Azamat AǴADAEV, Shyǵys Qazaqstan memlekettik ýnıversıtetiniń 2-kýrs stýdenti. О́skemen.   Atyma da, týǵan kúnime de laıyq bolamyn 16 jeltoqsan – meniń týǵan kúnim ári elimniń táýelsizdik alǵan kúni. Ata-babamyz talaı jyldar armandaǵan erkindik, egemendik al­ǵan kún. Meniń ata-anam Zaıda men Sársenbek Almatyda oqyp, bilim alǵan jastar, keıinnen oqý bitirip Kereký óńirine, Pavlodar oblysyna kelgen eken. Ákem Shymkent oblysynyń Arys degen aty da,  zaty da ádemi qalada týǵan. Alaıda, biz ózge ult ókilderi kóp turatyn qalada turdyq. Bir ǵajaby, ata-anam úıde tek qana ana tilimizde sóılesip, meni ana tilimizde tárbıelep ósirdi. Jáne de ata-anam úshin bul kúnniń taǵy bir ereksheligi – olar otbasyn qurǵan soń kóp ýaqyt balalary bolmaǵan eken. Al sol baqytty kún 16 jeltoqsan, ıaǵnı táýelsizdik alǵan kúnmen birge kelipti. Atymdy Muhtar atasyndaı bolsyn dep yrymdap qoıypty. Iá, Táńirdiń ózi ata-anama osy kúni syılyq jasaǵandaı. О́zim oblys ortalyǵyndaǵy №4 mekteptiń qazaq synybyn bitirdim. Qazir ýnıversıtettiń tarıh jáne quqyqtaný  fakýltetinde bilim alýdamyn. Elimizdiń shejireli ótkeni oılantady, búgini, erteńi, árıne, bizderdiń bilýimizdi, osy arqyly táýelsizdik alǵan elimizdiń tarıhyn zerttep bilip, alda el tynysyn keńeıtýge  úles qosyp, qyzmet jasaǵym keledi. Muhtar PERNEBEKOV, Sultanmahmut Toraıǵyrov atyndaǵy memlekettik ýnıversıtettiń 2-kýrs stýdenti. Pavlodar.   Egemendiktiń arqasynda elge keldik Táýelsizdik bizdiń otbasymyz úshin erekshe qasterli, aıryqsha qadirli. Qazaqstan táýelsiz memleket bolǵannan keıin alys-ja­qyndaǵy qandastarynyń ata qo­nysqa oralýyna jol ashty. Meniń ata-anam da Mońǵolııadan ata-babamyzdyń týǵan topyraǵyna atbasyn buryp, osynda qonys aýdardy. Men táýelsiz elimizde ósip, bilim alyp jatqanyma bek qýanyshtymyn. О́zim lıseı bitirip, dánekerleýshi mamandyǵyn alyp shyqtym. Qazir Almaty Ekonomıka jáne statıstıka ınstıtýtynyń Aqtóbe fılıalynda zańger mamandyǵy boıynsha oqyp jatyrmyn. Táýelsizdik kúni dúnıege kelgenimdi ata-anam jaqsylyqqa joryp, meni aqjoltaı ul dep otyrady. Men dúnıege kelgen jyly Qazaqstan táýelsizdik alǵan eken. Ony men eseıe kele bildim. Alysta júrgen meniń ata-anamnyń da mundaı qýanyshty sátti aqjarylqap kóńilmen qarsy alǵandaryn estip júrmin. Ákem Qýandyq pen anam Qaragóz ataqonysqa oralǵan kezde qushaq jaıa qarsy alǵan aýyldastaryna dán rıza. Aýylda jeke sharýashylyqtaryn júrgizip, balalaryn tárbıelep, elmen qatar júrip jatyr. Egemen elimiz táýelsizdiktiń 20 jyldyǵyn qarsy alýda. Atajurttaǵy oń ózgerister men osy jyldardaǵy qol jetken tabystarǵa tántimiz. Aǵaıynnyń atajurtqa jınalýyna múmkindik bergen Elbasymyzǵa rızashylyǵymyz sheksiz, árıne. Búgingideı tarıhı sátte elge bereke-birlik, turaqtylyq pen tatýlyq tileımin. Elimizdiń órkenıetti elý memlekettiń qataryna erkin enýine perzenttik úlesimizdi qosatyndaı azamat bolý basty paryzymyz dep esepteımin. Qashanda Qazaqstannyń alar asýlary alasarmasyn. Bolathan HOTBAI, stýdent. Aqtóbe oblysy.   «Elimmen birge ósip kelemin» – deıdi satýshy Aıdana Maqasheva – Aıdana kóńil-kúıiń qalaı? – О́te jaqsy, aǵa. Ásirese, jyldaǵy jeltoqsan aıy jaqyndaǵan saıyn kóterińki bola túsedi. – Nege? – Bul meniń dúnıege kelgen aıym ǵoı. El tarıhyndaǵy eń juldyzdy aıda ári táýelsizdik tańymen birge búrshik jarýym júregime maqtanysh. Osy kúndegi búkilhalyqtyq qýanysh meniń de shattyǵyma shýaq shashady. Táýelsizdikpen túıdeı qurdas bolýymdy mańdaıǵa jazǵan Jaratýshyǵa rahmet. – Tilińniń tazalyǵyna, ıbaly minezińe qaraǵanda, aýyl balasy sııaqtysyń? – Iá, Qarqaraly aýdanynyń týmasymyn. Onda da aqyn atamyz Qasym Amanjolovtyń kindik qany tamǵan jerdiń túlegi ekenim kóńilime úlken mereı. Ákem Amangeldi, sheshem Sandýǵashtyń eske alýy boıynsha 16 jeltoqsanda, tús aýǵan shaqta ómir esigin ashyppyn. Osynyń aldynda Qazaqstannyń óz táýelsizdigin jarııalaǵany týraly habar bizdiń jaqqa da jetken eken. Esimimniń Aıdana dep atalýy osy oqıǵaǵa baılanystyrylyp qoıylǵanyn olar ylǵı da aıtyp otyrady. – Mamandyq aldyń ba? – Orta arnaýly bilimim bar. Qaraǵandy ekonomıkalyq ýnıversıteti janyndaǵy bıznes jáne quqyq kolledjin úzdik bitirdim. Qazir E.A.Bóketov atyndaǵy Qaraǵandy memlekettik ýnıversıtetiniń syrttaı bóliminde oqyp júrmin. Kóp balaly otbasyǵa aýyrtpalyq artpaıyn degen oımen bir mezgil jumys istep, oqýdy osylaısha jalǵastyrýdy uıǵarǵan edim. Mundaı sheshimim jaqsy boldy. Aýyldaǵy ini-sińlilerime kómek kórsetip turýǵa jaǵdaıym barshylyq. Ata-anamnyń tula boıy tuńǵyshtary bolǵandyqtan qamqorshy bolýǵa jarap qalǵanyma qýanamyn. – Oıdaǵy arman-tilegiń qandaı? – Aýyldy saǵynamyn. Eń aldymen, baýyrlarymdy qatarynan qaldyrmasam deımin. Aýylǵa oralyp, keshegi ustazdarymnyń ortasyna qosylýdy oılaımyn. Búginde qaı azamatqa da umtylys-talpynysyna qaraı maqsattaryna jetýine jol ashyq qoı. Keleshegime sondaı úmitpen qaraımyn. Súıikti Qazaqstanymyz gúldenip, órkendegen saıyn oǵan senim nyq. Elimmen birge ósip kelemin. Men de jıyrmaǵa tolǵaly turmyn. Bul shaqta bári alda. Endigi úlken ister bizdiń enshimizge tıetindigin bilemin. Soǵan ózindik úles qosý – basty maqsatym. Áńgimelesken  Aıqyn NESIPBAI, Qaraǵandy.   Elbasymyzǵa amandyq tileımin Táýelsizdik halqymyzdy ózgege kiriptarlyqtan qutqardy. Muny, biz jas urpaq jaqsy túsinýimiz, baǵa­laýy­myz kerek. Biz táýelsizdik arqyly kóp nársege qol jetkizdik. Máselen, birin ǵana aıtaıyn. Ońtústik úshin aǵyn sý – altynmen teń. Qyrǵyzstannan Shardara sý qoımasyna keletin sý kúz ben qys­ta kóp bolǵandyqtan qoımaǵa syı­maı, Arnasaı arqyly О́zbekstanǵa ótkizip keldik. 1966 jyldan beri kórshi aǵaıynǵa 38-39 myń tekshe metr sý jiberippiz. Al, sýy tartylyp, tuzy aspanǵa atqan Aral 29-30 myń tekshe metr ǵana bolǵan. Qyzylorda men Ońtústik Qazaqstan halqy sý tasqynynan qatty azap shegip, úlken qarajattar jumsalyp keldi. Jurt Elbasyǵa hat jazdy. Memleket basshysy qabyl alyp, Kóksaraı sý rettegishin salý jónindegi Jarlyqqa qol qoıdy. Kóksaraıdyń syıymdylyǵy 3 myń tekshe metr. Jaz boıy Aralǵa sý barady, dıqandar paıdalanady. Biz osyǵan Táýelsizdik arqyly jettik. Sońǵy úsh jylda Ońtústikte 164 bilim nysany paıdalanýǵa berilip, oqýshylar úlken mektepterde oqýǵa múmkindik aldy. Biz muny qalaı maqtan etpeımiz. Táýelsizdiktiń qurdasy bolǵandyqtan ózgelerden artyq qýanýymyz zańdy sııaqty. Aıaýlym QÝANYShBEKOVA, stýdent. Ońtústik Qazaqstan oblysy.   Senimdi aqtaý – basty maqsat Táýelsizdik qurdasy bolý men úshin úlken maqtanysh. 1991 jyldyń 16 jeltoqsany bizdiń otbasymyzǵa qos birdeı qýanysh syılapty. Ákem Hamıt pen anam Jámıla, baýyrlarym bar, bári meni jyl saıyn osy kúni quttyqtaıdy. Qurbylarym “sen týǵan kún merekelerdiń ishindegi eń jaqsysy” deıdi. О́ıtkeni, bul mereke ata-babalarymyz ǵasyrlar boıy ańsaǵan Táýelsizdikke qazaqtyń qoly jetken kúni ǵoı. Biz bodandyq degenniń ne ekenin bilmesek te, úlkenderden estip óstik, kitaptardan oqydyq. Ahmet Baıtursynov 1915 jyly “Álhamdýlla, biz qazaq 6 mln.-ǵa jettik” depti. Sol qazaq aman bolsa búginde 40 mln.-ǵa jeter edi. Biraq, el basyna kelgen náýbet, asharshylyq, saıası qýǵyn-súrgin, dúnıejúzilik soǵys sııaqty oqıǵalar qazaqtyń sanyn ósirmeı tastady. Osynyń bárinde bodandyqtyń, ózgege táýeldi bolýdyń, óz erki ózinde bolmaýdyń salqyny bar. Qazaqstan táýelsizdik alǵaly 20 jyl ishinde biz ǵasyrlyq jetistikterge qol jetkizdik. Bul qyzyl sóz emes, anyq aqıqat. Bir ǵana Ońtústiktiń bilim salasyna toqsan mıllıardtan astam qarjy bólinip keledi. Bul – Qyrǵyzstan sııaqty memleketterdiń jyldyq bıýdjetinen úlken. Osynyń ózi-aq memleketimizdiń ekonomıkalyq qýatyn tanytady. Búginde Qazaqstandy dúnıe júzi tanıdy. Kúni keshe TMD arasynda tuńǵysh ret Eýropanyń tóri Qazaqstanǵa buıyrdy. Álem sanasatyn memleketke aınalǵandyǵymyz barshamyzdy qýantady. Elbasymyz Ońtústikke kelgende bizdiń oqý ornymyzda bolyp, ataly sózder aıtty. Biz sol senimge laıyq bolýǵa ýáde beremiz. Aıǵanym DÚISENOVA,  M.Áýezov atyndaǵy Ońtústik Qazaqstan Memlekettik ýnıversıtetiniń hımııa-tehnologııa fakýltetiniń 3-kýrs stýdenti. Ońtústik Qazaqstan oblysy.   El bolashaǵyna senimdimiz Táýelsizdiktiń qurdasy ekenimdi oılaǵanda, kókiregimdi bir ádemi sezim áldıleıdi. Ol jeke basyńnyń qýany­shynyń týǵan elińniń tarıhı ómirindegi aıryqsha sátpen tuspa-tus kelýine degen rızashylyqtyń áseri der edim. Kolledj bitirip, «BTA» banktiń oblystyq fılıalynda operator-kassır bolyp jumys istep júrmin. О́ndiristen qol úzbeı júrip, joǵary bilim alýdy maqsat etip, «Dúnıe» ınstıtýtynda oqyp jatyrmyn. Jumysym ózime unaıdy. Maǵan senim artqan ujymǵa da dán rızamyn. Búkil elimiz sııaqty bizdiń fılıal da táýelsizdik kúnine tabyspen barýǵa jumylýda. Alysqa barmaı-aq, bir sát Aqtóbege kóz salsaq ta órkendi ózgerister ańǵarylady. Jyl sanap ómirimizge órkenıettiń ıgiligi kóptep enýde. Munyń barlyǵy Prezıdent Nursultan Nazarbaevtyń kósemdigi men kóre­gendiginiń nátıjesi, elimizdegi ulttar men ulystardyń ózara til tabysýy men dostyǵynyń aıǵaǵy bolsa kerek. Táýel­sizdigimizdiń ǵumyry uzaq, tuǵyry berik bolsyn. Halqymyz aman, elimiz tynysh bolsyn. Táýelsizdik jyldary alǵan elimizdiń bedel-bıigi asqaqtaı bersin. Biz táýelsizdiktiń qurdastary osy baǵyttaǵy qaınaǵan ómirdiń qaq ortasynda júrýge ázirmiz. Sáýle BISEMBAEVA, «BTA» banki Aqtóbe oblystyq fılıalynyń operator-kassıri. Aqtóbe oblysy.   Eń jas dırektor Táýelsizdiktiń tól qurdasy Mádı Jumabekov óziniń týǵan aýyly Shirkeılidegi №129 Á.Jámishev atyndaǵy orta mektepke bardy. Sonda 9-synypqa deıin bilim aldy. Sonan soń Qyzylorda qala­syndaǵy «Bolashaq» ýnıversıte­tiniń kolledjine oqýǵa tústi. Ony aıaqtaǵan soń bilimin jalǵastyrý maq­sa­tynda Qorqyt ata atyn­daǵy Qyzyl­orda memlekettik ýnıver­sıtetiniń zań fa­kýltetiniń syrt­taı bó­li­mine tústi. Qazir sonda bilim alyp jatyr. Jas jigittiń ómirbaıany bul ǵana emes. Ákesi Naǵı 2003 jyly sharýa qojalyǵyn ashty. Bala Mádı ákesinen bir eli qalmaıtyn. Ákesiniń sharýashylyqty qalaı quryp, qalaı aıaǵynan tik turǵyzǵanyn biledi. Sondyqtan ózi de jumysqa erte aralasty. Mine, endi jıyrmanyń jalyn tartqan jas jigit sol «Naǵı» sharýa qojalyǵynyń dırektory. О́mirge erte aralasqandyǵynan shyǵar, ol otbasyn da quryp úlgerdi. Basyn quraǵanyna da aıdan asqan joq. Jel­toqsannyń 7-si kúni toıy ótken. Ertesi Astanaǵa júrip ketti. Sebebi, «Nur Otan» halyqtyq-demokratııalyq partııa­sy Tór­aǵasynyń birinshi orynbasary Nurlan Nyǵmatýlın táýel­sizdiktiń tól qurdastaryn ózine jıǵan. Bardy. Partııa tóraǵasynyń birinshi orynbasary otbasyn qurýymen quttyq­taǵanda, tań qaldy. El aǵalary ózderindeı jastardyń ómirin biletinin, kóńilderin bóletinin bilip bir marqaıyp qaldy. Burnaǵy kúni Qyzylordada Syr jastarynyń forýmy ótken. Sol kezde oblys ákimi Bolatbek Qýandyqovtyń qolynan arnaıy marapat aldy. Ol da jigerlendirip tastady. Búginde jas dırektordyń aıdarynan jel esip tur. Jumysqa degen yntasy alabóten. «Biz jaspyz. El ekonomıkasyn kóterýge, ári qaraı damytýǵa bar kúshimizdi salyp jumys isteýimiz kerek. Aǵalar aldymyzdan dańǵyl jol ashyp otyr. Bizge sony jalǵastyrý, alǵa súıreý mindeti júktelgen. Táýelsizdiktiń tustastary aǵalardyń amanatyn adalynan atqarady degen oıdamyn», – deıdi ol. Erjan BAITILES, Qyzylorda oblysy.   Bizdiń mindetimiz – jaqsy oqý Maǵan taǵdyr memleketimizdiń Táýelsizdik alǵan kúninde jaryq dúnıe esigin ashýdy násip qylǵan eken. Men muny maqtan etemin. Juban atamyz aıtqandaı, “myń ólip, myń tirilgen” qazaqtyń qalyń tarıhyna úńilseń, talaı ret taǵdyry qyl ushynda turǵanyn baıqaısyń. Janyń túrshigedi. Taǵdyr­dyń syn tezinen aman qalǵanymyzǵa qýanasyń. Ushqan qustyń qanaty, shapqan attyń tuıaǵy talatyn salqar dalamyzǵa, myńǵyrǵan malyna qyzyǵyp, ulyn qul, qyzyn kúń etkisi kelgender kóp bolǵan. Quba qalmaq shaýyp, “Aqtaban shubyryndy, Alqakól sulamadaı” jandy syzdatqan jaralar qalǵan keýdede. Osydan keıin Táýelsizdik qazaqqa ońaı keldi, bir oq shyǵarmaı jettik dep aıtýǵa esh bolmaıdy. Ata-baba armanyna biz jettik. Men OQMÝ-da mehanıka jáne munaı-gaz isi fakýltetiniń 2-kýrsynda oqyp jatyrmyn. Qazaqstannyń baı munaıyn óz azamattary ıgerýi kerek. Sebebi, ol – ult baılyǵy, bizdiń qazynamyz. Bizge mundaı múmkindikti memleketimiz syılady. Eldiń erteńine qyzmet etý úshin jaqsy oqý kerek. Abylaıhan ERKINBAI, stýdent. Shymkent.   Asqaq arman adastyrmaıdy Jeti jastaǵy kezim. Birde qys­tyń qaqaǵan sýyǵynda úıge týǵan-týystar shaqyryldy. Úlkenderdiń maǵan qarata aıtyp jatqan jyly sózderi janymdy  jadyratyp, zeıin qoıa tyńdap otyrǵanmyn. «Bárimizdiń bir Alla jaratýshymyz. Al, aınalaıyn, seniń týǵan kúnińniń jóni bólek. Táýelsizdiktiń tól qurdasy bolý ekiniń biriniń mańdaıyna jazylmaǵan bolar. Taǵdyrdyń syıyn baqyt qusyndaı mápele. Qolyń­nan ushyryp alma», – dep aýyldan kelgen aǵaıym tógile sóılep, erekshe qadir-qasıetin uqtyryp edi. Sodan bastap tez eseıip ketkendeı boldym.  Buryndary qatardaǵy  merekedegideı atap ótsem, Táýelsizdik kúni dúnıege kelgenime syrttaı masattanyp júrsem, endi týǵan kúnim jaqyndaǵan sátterde boıymdy áldebir kúsh bılep, jaýapkershilik sezimi oıanǵandaı hal keshemin. Qazir ár qadamyma esep berip, aınalama oılana-tolǵana qaraıtyn boldym. Buryndary qoǵamdyq jumys­tar dese kejegem keıin tartatyn bolsa, endi  býyrqanǵan kúsh-qýatymdy Otanymdy kórkeıtýge, gúldendirýge jumsasam degen kúıdemin. Qazir aqparattyq tehnologııa fakýltetiniń úshinshi kýrs stýdentimin. Maqsatym – sapaly bilim alyp shyǵý. Bilektilerdiń emes, bilimdi­lerdiń zamany týdy. Qatarymnan qalmaı  úzdik oqyp júrgenim sondyqtan. «Nur Otannyń» jastar qanatynyń múshesi retinde saıası sharalardan qalmaımyn. Inim  Baýyrjandy qolynan jetelep qazaq mektebine berdik. Ana tilinde oı da, boı da ósirýdiń jóni múldem bólek. Alda týǵan kúnim jaqyndap keledi.  Aınaladaǵy jurt «Táýelsizdiktiń tól kurdasy, sen ne tyndyrdyń?» degendeı synaı qaraıtyn tárizdi. Halqymnyń baqytty bolýyn qalaımyn. Elim úshin eńbek etsem deımin. Asqaq eldiń armany bıik, adastyrmaıtyny kámil. Bıbigúl QAZANTAEVA, M. Qozybaev atyndaǵy Soltústik Qazaqstan memlekettik ýnıversıtetiniń stýdenti. Petropavl.   Táýelsizdikpen birge elge keldik Qazaqstan Táýelsizdik alǵan­ǵa deıin meniń ata-anam Reseıdiń Sverdlov oblysyndaǵy Kamysh­lov degen aýdanda turǵan eken. Áke-sheshemniń ózderi de Reseıde týǵan. Olar aýyr zamandarda  elden tys jerge  yǵysyp ketken qazaqtardyń  urpaǵy. Alaıda, qaı­da júrse de  elge, jerge degen balalyq sezimin joǵalt­papty. Anamnyń  aıtýynsha, ájelerimiz eldi saǵynyp, ándetip, jylap otyrady eken. Qazaqstan  Táýelsizdigin alǵan kúni, jeltoqsannyń  16-sy kúni men dúnıege kelippin.  Men týǵannan keıin ata-anam Reseıde qalǵylary kelmepti. О́ıtkeni, Táýelsizdik  ata-anama keremet rýh beripti. О́zderi oryssha oqyp, oryssha  tárbıe alsa da, bar kóńili Qazaqstan jaqqa eleńdeýmen bolypty.  Sóıtip, kishkentaı eki qyzyn jetektep,  jórgektegi meni kóte­rip,  áke-sheshem Qostanaı oblysynyń Uzyn­kól aýda­nyna kóship kelipti. Balalarynyń qazaq tilin, halqynyń dástúr-saltyn bilýi úshin  osyndaı batyl sheshimge kelgen eken. Jeti jasqa tolǵan soń meni qazaq mektebine berdi. Uzynkól aýdany ortalyǵyndaǵy №2 orta mektepti jaqsy bitirdim. Armanym dáriger bolý edi. Mektepti bitirgende  ulttyq biryńǵaı testileýden 101 ball jınadym. Alaıda,  jınaǵan ball  medısına  ınstı­týtyna túsýge shamaly azdyq etti. Qazir A.Baıtur­synov atyndaǵy  ýnıversı­tettiń  agronomııa  fakýltetinde  oqyp júrmin. Qandaı qyzmette bolsa da, Táýel­siz elime minsiz qyzmet etemin. Jyl saıyn 16 jeltoqsanda bizdiń úıde qos mereke bolady. Týǵan-týystardyń barlyǵy maǵan: «Táýelsizdik bolyp kelgen qyz, bizdi  elge alyp kelgen qyz», dep quttyqtaıdy. Men de elimiz Táýelsizdik alyp jatqanda dúnıege kelgenimdi maqtanysh tutamyn. Mundaı sáıkestik maǵan degen táńirdiń bir syıy dep bilemin.  Onyń jaýapkershiligin de sezinemin. О́tken jyly  orys tilinen oblystyq olımpıadada ekinshi oryndy jeńip aldym. Qazir  ýnıversıtettegi  qoǵamdyq jumystarǵa belsene qatysamyn. Atalarymyz Táýelsizdikti arman­dady, ol úshin kúresti.  Al  sol qolǵa baq bolyp qonǵan  erkindiktiń qadirin bilýimiz kerek. Qadirin bilý – ony aıalaý, saqtaý, ol úshin qandaı  kúreske de daıyn bolý degen sóz.  Jastar jalyndap janbasaq, eldiń erteńi ne bol­maq?! Men  Táýelsizdikti osylaı túsinemin. Aına ShAMETOVA, A.Baıtursynov atyndaǵy Qostanaı memlekettik ýnıversıtetiniń stýdenti. Qostanaı.