Astanadaǵy Ulttyq akademııalyq kitaphanada «Tumar» respýblıkalyq ádebı-kórkem jýrnaly saıtynyń tusaýkeseri ótti. Qazaqtyń kórnekti aqyn qyzy Farıza Ońǵarsynovanyń jetekshiligimen jaryq kórip kele jatqan jýrnaldyń ǵalamtordaǵy Aitumar.kz saıtynyń ashylýyna memleket qaıratkeri Qýanysh Sultanov, elimizge tanymal tulǵalar Zeınolla Alshymbaev, Ýálıhan Qalıjanov, «Egemen Qazaqstan» AQ prezıdenti Saýytbek Abdrahmanov jáne basqa da birqatar zııaly qaýym ókilderi qatysyp, óz quttyqtaýlaryn jetkizdi.
Qazaq jáne orys tilderinde jaryq kóretin Aitumar.kz saıty proza men poezııa, dramalyq shyǵarmalar jáne kórkem sýret janryn qamtyǵan. «Osydan úsh jyl buryn maǵan «Tumar» jýrnalyn shyǵarý týraly oı keldi. О́zim de talaı jastar basylymdarynda jumys istedim. Qarap otyrsam, elimizde áńgime-óleń, dramalyq shyǵarma jazatyn jastar kóp eken. Qazir jastar kitap oqymaıdy degen pikirler bar. Múmkin, ras ta bolar. О́ıtkeni, olar ǵalamtorǵa, teledıdarǵa alańdaıdy. Alaıda, Qazaqstanda kitap betin múldem jaýyp qoıyp, barlyǵy ınternetke kóship ketti deı de almaımyn. Jýrnalǵa shyǵarmasy shyqqan jandardyń barlyǵy Muhtar Áýezov, Ábish Kekilbaev, Tólegen Aıbergenov bolyp ketedi dep te oılamaımyn, biraq myqtylary da kezdesip jatady. Bir aıta ketetin jaıt, jýrnal sapasy joǵary bolǵanymen, ókinishke oraı, ázirge tırajymyz az», deıdi jýrnaldyń bas redaktory, aqyn, Memlekettik syılyqtyń laýreaty Farıza Ońǵarsynova. Shara barysynda Qýanysh Sultanov: «Tumar dese tumardaı» ádemi basylymnyń ashylý barysyna kýá boldym. 3 jyl ishinde shyqqan 18 nómirdiń qaı-qaısysynda da nashar dúnıe joq. Jýrnal betinen ulttyq tárbıe men sıpatty saqtap qalýǵa degen talpynys kóremin», dese «Egemen Qazaqstan» AQ prezıdenti Saýytbek Abdrahmanov aǵa basylym atynan «Tumardyń» jas saıtyna degen tilegin: «Saıttyń dızaıny, ásirese flesh-tehnologııa arqyly betterdi aýystyryp otyrý shynynda da jýrnal aqtaryp otyrǵandaı áser beredi. Bul saıttyń artyqshylyǵy deýge bolady. Tolyq arhıvti saıttyń taǵy bir qasıeti, eger túrli-tústi qaǵaz shyǵaratyn qurylǵy arqyly úıińizde antologııasyn jasap qoıýǵa bolady. Bul jańa zaman úrdisinde shyqqan basylym. Osyndaı aty da, zaty da tamasha jýrnaldy shyǵaryp otyrǵan Farıza apaıǵa alǵysymdy bildiremin. «Tumar» barlyǵymyzdyń tumarymyzdaı bolatyn ardaqty basylymǵa aınalsyn», dep aıaqtady.
Jýrnaldyń bas redaktory, aqyn Farıza «Tumardyń» oqyrmandary kóbeıip, qarajaty molaıyp jatsa, shyǵarmashyl jastarymyzdyń týyndylaryn aǵylshyn tiline aýdartyp, sheteldikterge qazirgi zamanǵy ádebıetimizdi kórsetkisi keletindigin jetkizdi. «Tumar» jýrnaly men ondaǵy áriptesterimizge jazarlaryńyz kóbeıip, tırajdaryńyz arta bersin degen tilek bildiremiz.
Venera TÚGELBAI.