Degdar

Bizdiń sóz etkeli otyrǵan azamatymyz da qarlyǵashtyń qanatymen sý sepkendeı shyǵarmashylyq ıeleri men múmkindigi shekteýli jandarǵa kómek qolyn sozyp júrgen, keıingi býynǵa úlgi bolardaı jandardyń biri. Sonymen birge ol mádenı muralarymyzdyń da janashyr qamqor­shy­sy bolyp tabylady. Sapar Ysqaqovtyń negizgi mamandyǵy qurylys salasynyń joǵarǵy bilikti ma­many desek, atalǵan salada keńestik ke­zeńde uzaq jyldar boıy basshylyq qyz­metter atqarady. О́mirderegi osylaı deıdi. Al 1991 jyldan bastap, jeke kásip­kerligimen aınalysýdy bastaıdy. «Omar» atty shaǵyn qurylys kásipornyn quryp, 1991-97 jyldar aralyǵynda bul mekeme Arqalyq qalasy men sol kezdegi Torǵaı oblysynyń halyqtyq-sharýashylyq ny­san­daryn salý men qaıta jóndeýde ha­lyqqa qaltqysyz qyzmet kórsetedi. 1998 jyly otbasymen birge elimizdiń júregi Astanaǵa qonys aýdaryp, jas qalanyń órkendep-ósýine óz úlesin qosýdy maqsat tutady. Munda da súıikti kásibine belsene kirisken ol «Tilep» atty jeke seriktestigin quryp, elordadaǵy turǵyndar ıgiligine birneshe úılerdi tartý etedi. Árıne, óz kásibine adal jannyń eńbegi qashanda elenbeı qalmaq emes. 2003 jyly Jenevada (Shveısarııa) ótken baıqaýda Halyq­aralyq «Altyn medalmen» marapatta­la­dy. Bul Astanadaǵy «Arasan» saýyqtyrý ortalyǵynyń qurylysyna berilgen ba­ǵa­tyn. Sapar Ysqaquly «Jyl adamy, jyl mesenaty» sııaqty túrli respýb­lı­ka­lyq jáne halyqaralyq ataqqa ıe bolǵan. Qaıyrymy mol jannyń qaı kezde de búıregi saýapty isterge buratyny aıtpasa da túsinikti. 2003 jyly «Tilep» qaıy­rym­dylyq qoryn quryp, qarttar men mú­gedekterge kómek qolyn sozýy azamatty­ǵynyń taǵy bir qyryn asha túskendeı. Sonymen qatar ol qurǵan «Ál-Farabı jáne Sultan Beıbarys» qaıyrymdylyq qory da qaıta qalpyna keltirý qurylys jumystary men restavrasııada kóp ju­mys­tar tyndyrdy. Solardyń biri Ál- Fa­rabı (Damask qalasy) kesenesi men memorıaldyq keshenin jáne Sultan Beı­barys (Kaır qalasy) meshitin, sondaı-aq kesenesi, medresesi jáne kitaphanasyna (Damask qalasy) jasaǵan restavrasııasy der edik. Sapar Ysqaquly jas daryndy mý­zykanttardy qoldap otyrýdy da nazardan tys qaldyrǵan emes. Oǵan birinshi kezekte áıgili qobyzshy kompozıtor Tilep Aspan­taıulynyń tikeleı urpaǵy ekendigi de sebep bolǵan shyǵar. Qanmen kelgen ónerge degen sheksiz mahabbaty oǵan «bulaq kór­seń, kózin ash» degen halyq naqylyn jıi esine salatyndaı. Babasynan qalǵan «Baqsy», «Allam jar», «Tolǵaý» kúı­lerine avtorlyq quqyq alýynda murager­lik paryzyn tanytty. «Baqsy» kúıi bú­ginde elimizdiń altyn qoryna engen. Osy rette mýzyka maıtalmany, Eńbek Eri Er­keǵalı Rahmadıev: «Sapekeńniń ónersúı­gish júregi qylqobyz ónerin dáripteýde aıtarlyqtaı eren eńbekterimen baǵaly. Stýdent balalarǵa arnaıy taǵaıyndaǵan stıpendııalary, qylqobyzdan quralǵan atasy Tilep atyndaǵy alǵashqy kvartet, Qýat Shildebaev, Beıbit Dáldenbaev, Serik Ábdinurov sııaqty talantty-óskeleń azamattarǵa arnaıy jańa shyǵarmalar jaz­dyrtyp, qylqobyzdyń repertýarla­ry­nyń órisin keńeıtkeni, Astanadan Qo­byz saraıynyń qurylysyn bastaýy, shetel kompozıtorlaryn shaqyrtyp orkestr­diń súıemeldeýimen qylqobyzǵa arnap shyǵarma jazdyrtýy, olardy Anglııa, Japonııa sııaqty órkenıetti elderdiń ataqty konsert zaldarynda oryndatýy, tek qylqobyzdyń abyroıyn aspandatyp qana qoımaı, búkil qazaq óneriniń abyroıyn arttyrǵany», – dese, ǵalym-jazýshy, Mem­lekettik syılyqtyń laýreaty Qoı­shyǵara Salǵarauly: «Sapar – múm­kin­diginshe ulttyq dástúrdiń údesinen shy­ǵý­ǵa umtylyp júrgen azamat. Ol ótkiziletin belgili bir is-sharalarǵa demeýshilik jasaı ma, bolmasa tanylmaı júrgen talantty jastardyń qabilet kózin ashyp, óneriniń óris alýyna kómektese me, nemese ma­ńa­ıyndaǵy joq-jitik, kemtarlarǵa qol ushyn soza ma, báribir ne istese de sonyń bárin óz yqylasymen, ishki jan dúnıesi qalaýynyń qajettiligin óteý úshin ja­saıdy», – deıdi. О́nerge jasaǵan demýshiliginiń birsha­masy joǵaryda aıtyldy. Onyń elimizdiń atyn shyǵarýda saıahat salasyna kórset­ken demeýshiligi ushan-teńiz. Ol kóptegen qazaqstandyq ǵylymı ekspedısııalardyń demeýshisi boldy. Olar Taıaý Shyǵys, Kıpr, Mońǵolııa, Soltústik Afrıka jáne Eýropa elderinde saparlaǵan. S.Ysqaquly otbasymen birge álemniń júzden astam elin aralaǵan jıhan­kez. Saıahatshynyń eren eńbegi dep 2007 jyl­dyń 6 jeltoqsanynda Ońtústik polıýske (Antarktıda) kók týymyzdy jelbirete tigýin aıtsaq ta artyq emes. Bul elimizden tigilgen tuńǵysh tý bolatyn. Muny eldiń abyroıyn ár kez joǵary bolsyn dep oılap júretin tileýles jannyń Otanyna degen erekshe syı-qurmeti dep bilgen abzal. Búginde otaǵasy súıikti jary Kúmis Beısekqyzy ekeýi ul-qyzdar tárbıelep, olardan nemereler súıip otyrǵan ba­qyt­ty jandar. Júregi jomart jannyń endigi tilegi el tynyshtyǵy. Egemendigimizdiń tuǵyry bıik bolyp, elimizdiń abyroıy­nyń asqaqtaı berýine nıettestigi onyń bizben bolǵan áńgimesinde jıi aıtylyp otyrdy. Aldaǵy kele jatqan aıtýly mereke Táýelsizdigimizdiń 20 jyldyq torqa­ly toıy halqymyzǵa qut-berekesin ala kelsin degen aǵalyq tilek te aıtylmaı qalmady. «Men qandaı da bir ıgilikti ju­mystar jasasam, sol halqymnyń ystyq yqylasy men elimizdiń tynyshtyǵy ar­qa­synda bolyp jatqanyn sezemin. Sondyq­tan da men Qudaı qýat berip turǵanda el úshin jumystarymdy jalǵastyra beremin», – deıdi Sapar Ysqaquly. Ábdirahman QYDYRBEK, Astana.