Ultymyzda «Bir kisi qazǵan qudyqtan myń kisi sý ishedi» degen sóz bar. Al sáýletshi jobalaǵan shárlerde júzdegen myń adamdar turady.
Bul sheberdiń qoly ortaq ekenin erteden eskergen eldiń tilegi kimniń ústinde ekenin kórsetse kerek. О́mirdiń ózi zerdeleı qaraǵan janǵa úzdik úılesim úlgisi ispetti. Sonyń biri ásem de áıdik ǵımarattar turǵyzý. Árıne, sylaǵannyń bári sylanyp shyǵa kelmeıdi. Kórkem kózqaras, tereń tanym, júırik oı osyndaıda kerek. Sáýletshi Tólendi Jamankózov te 20 jyl buryn elorda Arqa tósine kóshkende el astanasyn kórkeıtýge erekshe qulshynyp kiriskender qatarynan bolatyn.
Sáýletshi sábı shaǵynda qaryndash syndyryp oınamasa da qolyna ilikken dúnıemen sýret salǵandy jany súıipti. Oıyn balasynyń ónerge ıkemi baryn áke de baıqaıdy. Bul soǵystan keıingi qıyn jyldar edi. Joqshylyq qysyp turǵan, qyl aıaǵy balalardyń qalam-qaǵazy da jetispeıdi. Birde bala Tólendiniń ottyń kúlimen sýret salyp otyrǵanyn kórgen aýyl aqsaqaldary Tóleýbekke «Ulyńnyń sýret salýǵa qushtarlyǵy erekshe eken, osy bastan ónerge baýly» dep aqyl qosady. Tólendiniń týǵan topyraqtan tamyr tartqan tanym qaınary osylaı bastalyp edi...
Almatyda polıtehnıkalyq ınstıtýtty «Sáýletshi» mamandyǵy boıynsha bitirgen onyń qatar oqyǵan dostarynyń qatarynda áıgili «Dos-Muqasan» ansambliniń quramynda bolǵan ónerli jigitter de júrdi. Sol jyldary bulbul daýysty Roza Baǵlanovanyń qolynan dám tatyp, batasyn alǵany da erekshe bir este qalarlyq sátter bolatyn. Eńbek jolyn Qaraǵandy qalasynan bastaǵan ol jergilikti tuńǵysh kásibı sáýletshilerdiń biri boldy. «Karagandagorselproekt» memlekettik jobalaý ınstıtýtynda aýqymdy jobalarǵa qatysqan Tólendi 1989-1990 jyldary Chernobyl atom elektr stansasynda qurylysshy-ınjener bolyp eńbek etti.
1998 jyly elordaǵa kelgen sáýletshiler qatarynda Arqa tósindegi jańa Astananyń zeńgir aspanǵa qol sozǵan ǵımarattarynyń kúndeı kúlimdep, kórkeıe sap túzeýine bir kisideı úles qosty. 2000 jyly «ORTA» joba-qurylys kompanııasynyń bas sáýletshisi, «Aqtóbemunaıgaz» AAQ, «Dýbaı StroıHoldıng» JShB, «TORE-CHINGIZIT LTD» kompanııalarynyń bas sáýletshisi, jobalardyń bas ınjeneri bolyp eńbek etti. Kún sanap araılanǵan Astana kóńilin de ósirdi, shalqar shabyt syılady. Elimizdiń qurmetti sáýletshisi, KSRO jáne Qazaqstan Sáýletshiler odaǵynyń múshesi T.Jamankózov «Astananyń 10 jyldyǵy» medalimen marapattaldy. Zaıyby Zoıa Dúısebaıqyzymen birge ósirgen qyzdary Arılana L.N.Gýmılev atyndaǵy Eýrazııa ulttyq ýnıversıtetiniń oqytýshysy bolsa, Lázzat bilikti qurylysshy, nemeresi Aınur zańger bolyp eńbek etýde. Berekeli shańyraqtyń uıytqysy bolyp otyrǵan Tólendi Tóleýbekuly sáýletshiliktiń syny ǵımarattardyń sapasy men sáninde ekenin, eń bastysy eńbektiń erlikke, erliktiń eldikke jetkizetinin aıtady.
Dýman ANASh,
«Egemen Qazaqstan»