Almatyda belgili ánshi, Qazaqstan men Qyrǵyzstannyń eńbek sińirgen ártisi Gúlnar Sıqymbaevanyń jalǵyz uly Baır Sıqymbaevtyń máıiti tabyldy. Buǵan deıin ol 24 naýryz kúni úıinen shyǵyp, qaıta oralmaǵan edi, dep habarlaıdy Egemen.kz.
Marqumnyń denesi tabylǵany týraly jýrnalıst Jazıra Begaly áleýmettik jelidegi paraqshasynda habarlady.
«Ánshi Gúlnar Sıqymbaevanyń uly tabyldy. О́lim sebebi ázirge belgisiz. Jaqyndary onyń 24 naýryzda úıden shyǵyp, iz-tússiz ketkenin aıtqan edi. Jany jannatta bolsyn», dep jazdy ol.
Almaty qalalyq polısııa departamentiniń baspasóz qyzmeti aqparatty rastady. Vedomstvonyń málimetinshe, er adamnyń denesi Bostandyq aýdanynan tabylǵan, syrtqy zorlyq-zombylyq belgileri anyqtalmaǵan. Oqıǵanyń mán-jaıy anyqtalyp jatyr.
Eske salaıyq, Baır Sıqymbaevty Almatyda bir aptadan astam ýaqyt boıy izdestirý jumystary júrgizilgen. «Lider.kz» eriktiler qozǵalysynyń málimetinshe, ol bıylǵy 24 naýryz kúni saǵat 13:20 shamasynda Kopernık kóshesi, 114 mekenjaıyndaǵy úıinen shyǵyp ketken. Sodan beri baılanysqa shyqpaǵan.
Baır Sıqymbaevtyń boıy shamamen 180-185 sm, aryq deneli, qysqa qara shashty, qońyr kózdi bolǵan. Joǵalǵan kúni ústinde qara tústi sporttyq kıim bolǵany habarlanǵan.
Baır Sıqymbaev – 2024 jylǵy 5 qazanda ómirden ótken belgili ánshi Gúlnár Sıqymbaevanyń jalǵyz uly.