Táýelsizdik toıy jan jadyratqan jaqsylyqtarmen tolyǵýda. Sonyń biri – Uıǵyr aýdanyndaǵy Sharyn aýylynda bastalǵan údemeli ındýstrııalyq-ınnovasııalyq damý baǵdarlamasyna enetin strategııalyq mańyzdy nysan qurylysy. Gaz bólip-taratatyn stansa aýdan turǵyndaryn kógildir otynmen qamtýdy aldaǵy jyldan bastaıdy.
«Azııa Gaz NG» JShS, «Gazagrommash» zaýytynyń Qazaqstandaǵy resmı ókildigi jáne aýdan ákimi men aýyl turǵyndary gaz bólip-taratatyn stansanyń irgetasynyń quıylýyna qatysyp, izgi nıetterin bildirdi.
«Azııa Gaz NG» seriktesi Elbasynyń jyl saıynǵy Joldaýlarynda aıtylǵan mindetter men Qazaqstannyń 2030 jylǵa deıingi strategııalyq damý, «Bıznestiń jol kartasy-2020» baǵdarlamalaryn basshylyqqa alyp, halyqtyń turmysyn jeńildetetin ózekti jobany júzege asyrýǵa kiristi. Seriktestik baǵdarlama aıasynda oblys eldi mekenderin gazben qamtýdy josparlap otyr.
«Sharyn» gaz bólip-taratý stansasynyń qurylysy aýyl turǵyndaryn kógildir otynmen qamtamasyz etýmen qatar aýdandaǵy kásipkerlik nysandaryn da gazdandyrady. 2012 jyldyń naýryzyna deıin munda 50 jumys ornyn ashýǵa múmkindik bar. Jalpy jobany júzege asyrý 8 jylǵa josparlansa, quny 6 mıllıard teńgeni quraıdy. Qazirgi kezde qurylys jumystaryna 100 adam tartylǵan. Aldaǵy kezde jastardy kásibı oqytý josparlanǵany qýantady.
Jobany júzege asyrýdyń eki kezeńinde 594 metr bolatyn magıstraldy gaz qubyrynyń qurylysy, «Sharyn» gaz bólip-taratý stansasyn salý, Shonjy aýylyn qosa alǵanda, birqatar eldi mekenderge jáne «KazRosBroıler» qus fabrıkasyna uzyndyǵy 60 shaqyrymdyq joǵary qysymdy gaz qubyry qurylysyn júrgizý men basqa da jumystar qarastyrylǵan.
Kúmisjan BAIJAN,
Almaty oblysy.