Almaty ákimi Baýyrjan Baıbek sıfrlandyrý kúnderi aıasynda qalanyń startap- kompanııalarynyń ókilderimen kezdesti. «Smart.Poin» tehnologııalyq keńistiginiń alańynda beıresmı túrde startap-ortany damytýdyń barynsha mańyzdy máseleleri talqylandy.
Búgingi kúni Almaty sıfrlandyrýdy engizý boıynsha jáne IT ónimderin shyǵarýda kóshbasshy bolyp tabylady. «Aqyldy qala» konsepsııasy barysynda qaýipsizdik, qoǵamdyq kólik, bilim jáne densaýlyq saqtaý salalarynda júıeli sıfrlandyrý jobalary iske asýda. Bul kreatıvti kásipkerler men startaperler úshin iri naryq bolyp tabylady.
Osy kezdesý barysynda B.Baıbek jańa tehnologııalardy engizý prosesterdi ashyq júrgizýge jáne operasııalyq shyǵyndardy azaıtýǵa yqpal etetinin, sonymen qatar memlekettik apparat pen bızneste tıimdi ákimshilikke qol jetkizetinin atap ótti.
«Memlekettiń mindeti –bıýrokrattyq kedergilerdi barynsha azaıtý, tıisti ınfraqurylymdy qalyptastyrý, bıznes bastamalardy yntalandyrý. Ol úshin qalada túrli qoldaý sharalary júzege asýda, sonyń ishinde arnaıy ekonomıkalyq aımaqtar jáne mehanızmder arqyly kásipkerler qarjylyq resýrstarǵa qol jetkizýde. Degenmen, kedergiler de barshylyq, al olardy durys sheshý úshin biz jumys jasap jatqan kompanııalar ókilderimen ǵana emes, isti endi ǵana qolǵa alǵan startaperlermen de turaqty kezdesemiz», - dep atap ótti qala basshysy.
Elvıra Serikqyzy,
«Egemen Qazaqstan»
ALMATY