N. Pogodın atyndaǵy orys drama teatrynda oblys, qala basshylyǵy, basqarmalar men departament jetekshileri jáne depýtattar turǵyndarmen ashyq qoǵamdyq qabyldaý ótkizdi.
Atqarýshy bılik ókilderine jurtshylyq tarapynan 100-den astam saýaldar qoıylsa, olardyń 45-i oblys ákimi Qumar Aqsaqalovqa joldandy. Qabyldaýǵa kelip, rızashylyqpen ketkenderdiń biri – Elena Gýıvan. Ol Egemen Qazaqstan kóshesinde turady. 1983 jyly salynǵan ǵımarattyń shatyry ábden tozǵan. Jaýyn-shashyndy kúnderi baspana ishi sýǵa tolyp ketedi eken. Qalalyq ákimdikke qaırylǵan eken, qarajat joq degen jaýap alypty. Aımaq basshysy Qumar Aqsaqalov keıýananyń shaǵymyn muqııat tyńdap alǵannan keıin baspananyń shatyry qalypqa keltiriletinin qadap aıtty.
«Oblys ortalyǵynda kóptegen úıler kúrdeli jóndeýdi qajet etedi. Osyǵa oraı respýblıkalyq qazynadan qarjy bólinetin boldy. Jergilikti bıýdjetten de múmkindikter qarastyrylady», dedi Qumar Irgebaıuly.
Jurtshylyqty aýylǵa sapaly aýyzsý tartý, joldardy jóndeý máseleleri de tolǵandyratyn bolyp shyqty. Al Natalıa Emelıanova baspana suraı kelipti. Kóktemde ol turatyn úıdiń bir jaq qabyrǵasy opyrylyp túsken bolatyn. Komıssııa sheshimimen apattyq jaǵdaıda dep tanylypty.Másele birden oń sheshimin tapty.
Q. Aqsaqalov BAQ ókilderine bergen suhbatynda Elbasynyń jýyrda júktegen tapsyrmasy boıynsha óńirdiń jańa damý baǵdarlamasy túziletinin, onda áleýmettik nysandar salý, aýyzsý, joldardy jóndeý,jalaqyny kóbeıtý, halyq sanyn arttyrý, turǵyn úı qoryn jańalaý sekildi ózekti máseleler qamtylatynyn, bıyldan bastap júzege asyrý mindeti qoıylyp otyrǵanyn jetkizdi. Úsh jyldyń ishinde ınfraqurylymdardy jańǵyrtýǵa 5,5 mıllıard teńge baǵyttalmaq.
Oblys ákiminiń orynbasarlaryna, qala ákimine, basqarma basshylary men qalalyq bólimderdiń jetekshilerine de ótinish aıtqandar kóp boldy. Máselen Esil aýdanyna qarasty Taýaǵash aýylynan kelgen azamattar áli kúnge deıin ózderine tıesili paılaryn daýlap júr eken. Bastapqyda 493 adamnyń jeri "Iаvlenskıı MTS" seriktestiginde bolypty. Atalǵan kompanııa aýyldyqtardyń kelisiminsiz alqaptardy Ǵ.Músirepov aýdanyndaǵy belgisiz fırmaǵa berip jiberipti. Qazirgi kúni jerlesterimiz ol kásiporyn dırektorynyń aty-jónin da bilmeıdi. Toqjigit Sábıtov Novoıshım fırmasynan shyqqylary keletinin alǵa tartty. Biraq aýdan ákimi tıisti qujattarǵa qol qoımaı otyrǵan kórinedi. Bul máseleni oblys ákiminiń birinshi orynbasary Aıdarbek Saparov jaýapty basqarma basshylaryna jiti tekserip, sheship berýdi tapsyrdy.
Bilim basqarmasynyń basshysy Gúlmıra Kárimovaǵa ata-analar balalaryn balabaqshaǵa ornalastyrýǵa qatysty suraqtar qoıdy. Olarǵa kúz aılarynda 10 bóbekjaı ashylatyny baıandaldy.
Kelesi ashyq qoǵamdyq qabyldaýdy qazan aıynda uıymdastyrý josparlanǵan.
О́mir ESQALI,
«Egemen Qazaqstan»