Astanaǵa kelgen saıyn bir jańalyqty kóremin - Oleg Soskoves

Tarıh ólshemimen qaraǵanda azǵan­taı ǵana ýaqytta alǵashqyda múm­kin emesteı kóringen oılar júzege asty. Árıne bul jerde tek ǵalamat qu­ry­lys­tyń qarqynyn ǵana emes, onymen qaptaldasa júretin ınjenerlik, áleýmettik, qarjylyq saıası maqsattar men keshendi ózge de problemalardy aıtyp otyrmyn. 

Ádette maǵan zamanaýı Qazaq­stan­nyń rýhy men mazmunyn ashatyn aıryqsha belgisi ne degen saýal berilgen kezde, oılanbastan aı­ta­tyn jaýabym bireý – Astana! Ja­ńa myńjyldyq qarsańynda saıyn dalanyń tósinde paıda bolǵan Qazaq­stannyń astanasy búginde álemdik qala qurylysynyń ozyq úlgileriniń biri bolyp tanyldy. Ol qazaq jeriniń ejelgi rýhy men halyq dástúriniń tereń­digine boılaı otyryp, qala qu­ry­lysynda, qalany josparlaýda al­dyń­ǵy qatarly sáýlet ıdeıalaryn sińire bildi. 

Búgingi Astana – óte sáýletti, jaıly jáne dostaryna qushaǵy ashyq, kel­gen saıyn yntyqtyryp, qýantyp tu­ra­tyn qala. 

Astananyń iskerlik yrǵaǵyna túsip, keń kóshelerinde, ózen jaǵalaýynda, saıa­baqtarynda qydyrystap, mýzeıine já­ne ózim kórgenderdiń ishindegi eń ǵa­ja­ıyp teatryna barýdyń ózi bir ǵa­nıbet. 

Astanaǵa kelgen saıyn bir tyń ja­ńa­lyqtyń kýási bolatynym ras – Qazaqstannyń astanasy ósip-órken­dep, damyp qana qoımaı, qarjy, isker­lik, saıası salalarda álemdik bedeli joǵarylap keledi. 

Dál osy jerde aýqymdy halyq­ara­lyq forýmdar ótedi jáne buǵan Eýropa men Azııanyń, ońtústik pen sol­tús­tiktiń túıisetin tusynda orna­las­qan geografııalyq qolaıly ornalasýy da sebep bolsa kerek. 

Astana kez kelgen qalyptaǵy, bar­lyq deńgeıdegi aýqymdy sharalardy sheber uıymdastyryp, kún tár­tibine halyqaralyq saıasattyń kúr­deli má­se­­lelerin jáne negizgi sa­la­lardyń bo­­lashaǵy, jańa sıfrly tehnologııalar, «jasyl ekonomıka» tárizdi ózekti taqyryptardy shyǵaryp keledi. 

Men Nursultan Ábishulynyń úzeń­gilesteriniń ortasynda bolǵan sát­­terimde jańa astanany salý jos­pa­ryn júzege asyrýda kóptegen qıyn­dyq­tardyń qalaı eńserilgendigin talaı estidim. 

Sol aýqymdy maqsattarǵa jetý tek saıası jigerli, basshylyq qyzmette táji­rıbesi mol, memleket qurylysyn te­­reń túsinetin jáne uǵynatyn, alda­ǵy onjyldyqtardy dál boljaı bi­le­tin naǵyz kóshbasshynyń ǵana qoly­nan keledi. 

Osy sátti paıdalana otyryp, Astanaǵa, el Prezıdentine, osynaý tama­sha qalanyń turǵyndaryna, barsha qazaqstandyqtardyń gúldenýine, ja­ńa tabystarǵa jetýine, Nursultan Ábishuly Nazarbaevtyń osydan bir­neshe jyl buryn jobasyn óz qolymen syzǵan «bolashaqtyń qalasy» sııaqty ózge de batyl sheshimderi men armandary oryndala berýine tilektestik bildiremin. 

Oleg SOSKOVES,

Reseı taýar óndirýshiler odaǵynyń prezıdenti