Memlekettik hatshy Gúlshara Ábdiqalyqova Túrkııadaǵy qazaq dıasporasy jastarymen kezdesti. Bul is-shara Astananyń 20 jyldyq mereıtoıyna oraı olardyń atajurtty kórip qaıtýy maqsatynda uıymdastyryldy.
Memlekettik hatshy óz sózinde Elbasy Nursultan Nazarbaevtyń jastarǵa: «Bolashaqqa degen bizdiń úkili úmitimiz – sizder. Bizdiń búgin jasap jatqanymyzdyń barlyǵy – sizder úshin jasalýda», dep aıtqanyn atap ótti.
«Azattyq alǵan soń búkil Táýelsiz memleketter dostastyǵy elderi arasynan alǵashqy bolyp, 1997 jyly 2030 jylǵa deıingi damý josparyn ázirlep, ony 15 jyl ishinde oryndadyq. Qazir biz «Qazaqstan-2050» Strategııasyn júzege asyryp jatyrmyz. Onyń basty maqsaty – álemdegi ozyq 30 eldiń qataryna qosylý. Osy oraıda elde ınstıtýttyq 5 reforma jarııalanyp, Ult jospary, úshinshi jańǵyrý aıasynda aýqymdy jumys júrgizilip jatyr», dedi G.Ábdiqalyqova.
Sondaı-aq Memlekettik hatshy sheteldegi qandastar máselesine, ana tili men tól tarıhyna, mádenıeti men rýhanııatyna, ulttyq qundylyqtardy saqtaýǵa qoldaý kórsetýge, tyǵyz áleýmettik-ekonomıkalyq baılanys ornatýǵa Prezıdenttiń basa nazar aýdaratynyn jetkizdi. Qazaqstannyń qandastardy elge jınaý jóninde Germanııa jáne Izraılmen bir qatarda tıimdi etnostyq kóshi-qon saıasatyn júzege asyryp otyrǵan eldiń biri ekenin atap ótti. Osyndaı jumystyń nátıjesinde táýelsizdik alǵaly beri elimizge mıllıonnan astam qandasymyz oraldy. Qazirgi kezde Qazaqstannan tys jerlerde, shet memleketterde 5 mıllıonnan astam qazaq dıasporasy ókili bar.
Búginde Túrkııada shamamen 10 myńdaı qazaq turady. Dıaspora ókilderine ózekti máseleler boıynsha kómek kórsetý maqsatymen «Qazaq-túrik qory», «Qazaq túrkileriniń áleýmettik jáne mádenı damýyn qoldaý qory», «Ahmet Iаsaýı qory», «Qazaq-túrik bilim, ǵylym jáne zertteý qoǵamy» tıimdi jumys júrgizip otyr.
Kezdesý sońynda Memlekettik hatshy Túrkııadaǵy qazaq dıasporasy jastarynyń oqýda jaqsy nátıjege qol jetkizip, ómirde tabysty jáne baq-berekeli bolýyna tilektestik bildirdi.
Abaı ASANKELDIULY,
«Egemen Qazaqstan»