Búgin Qyzylorda oblysynyń ákimi Nurlybek Nálibaevtyń tóraǵalyǵymen ótken aktıv otyrysynda Qorqyt ata atyndaǵy ýnıversıtettiń basqarma tóraǵasy-rektory laýazymyna taǵaıyndalǵan Naýryzbaı Baıqadamov tanystyryldy, dep habarlaıdy Egemen.kz.
«Jaqynda ótken Úkimet otyrysynda elimizdegi ǵylym men joǵary bilim máselesi qaralyp, Úkimet basshysy oblys ákimderine óńirlik ǵylymı-tehnologııalyq keńesterge jeke basshylyq jasap, jumysyn uıymdastyrýdy tapsyrdy. Muny júzege asyrýda Qorqyt ata atyndaǵy Qyzylorda ýnıversıteti áleýeti jetkilikti. Oqý ornynyń ǵalymdary men túlekteri aımaǵymyzdaǵy ǵylymı-ınnovasııalyq damýdy basqarýda aıryqsha ról atqarýy qajet. Bul baǵytta ákimdik tarapynan jan-jaqty qoldaý kórsetiledi», dedi aımaq basshysy.
Aktıv otyrysyna qatysqan Parlament Májilisiniń depýtaty Murat Ergeshbaev pen Ǵylym jáne joǵary bilim vıse-mınıstri Gúlzat Kóbenova, zııaly qaýym ókilderi sóz sóıledi.
Jańa rektor Naýryzbaı Baıqadamov 1991 jyly Qorqyt ata atyndaǵy Qyzylorda ýnıversıtetiniń «Tarıh jáne fransýz tili» mamandyǵyn támamdaǵan. Eńbek jolyn aýyl mektebinde muǵalim bolyp bastap, 1994 jyly ózi bilim alǵan oqý ornyna oqytýshy retinde qaıta oraldy. Ýnıversıtette túrli basshylyq qyzmetterdi, atap aıtqanda, 2008-2013 jyldary tárbıe jumystary jónindegi prorektor qyzmetin atqardy. Joǵary oqý ornynda 20 jylǵa jýyq eńbek etip, ýnıversıtettiń kópsalaly aımaqtyq bilim ordasy retinde qalyptasýy men damýyna eleýli úles qosty.
Naýryzbaı Seıtqalıuly – tarıh ǵylymdarynyń kandıdaty, belgili qoǵamtanýshy, 150-ge jýyq ǵylymı jáne oqý-ádistemelik eńbektiń, birneshe kitaptyń avtory.
2013 jyly memlekettik qyzmetke shaqyrylyp, oblystyq bilim basqarmasynyń basshysy, oblys ákiminiń orynbasary, oblystyq máslıhat hatshysy jáne tóraǵasy qyzmetterin abyroımen atqardy. О́ńirdiń áleýmettik-ekonomıkalyq jáne rýhanı-mádenı damýyna súbeli úles qosty.
Sondaı-aq, «Nur Otan» partııasy oblystyq fılıaly tóraǵasynyń orynbasary, birinshi orynbasary, Amanat partııasy oblystyq fılıalynyń tóraǵasy retinde qoǵamdyq-saıası salada da nátıjeli eńbek etti.
2024 jylǵy sáýirden 2026 jylǵy 11 aqpanǵa deıin Qazaqstan Respýblıkasy Parlamenti Senatynyń depýtaty, Konstıtýsııalyq zańnama, sot júıesi jáne quqyq qorǵaý organdary komıtetiniń múshesi boldy.