«Ana tili» jáne «Qazaq ádebıeti» gazetteriniń bas redaktorlary aýysty.
Burynǵy «Qazaq ádebıeti» gazetiniń bas redaktory aqyn, jýrnalıst Janarbek Áshimjan «Ana tili» gazetiniń bas redaktory bolyp taǵaıyndaldy. Al «Qazaq ádebıeti» gazetiniń bas redaktory qyzmetine «Abaı-aqparat» Qazaqstan ınternet keńistigin damytý qory» Qoǵamdyq qorynyń prezıdenti Dáýren Qýat keldi.
Janarbek Áshimjan 1976 jyly 1 sáýirde Almaty oblysy, Kegen aýdany, Jalańash aýylynda týǵan. 1999 jyly álFarabı atyndaǵy Qazaq memlekettik ulttyq ýnıversıtetiniń jýrnalıstıka fakýltetin bitirgen.
1996–1999 jj. qalalyq «Almaty aqshamy» gazetinde tilshi, 2000 jyly «Qazaqstan» jýrnalynda bólim redaktory qyzmetterin atqarǵan.
2000–2005 jj. respýblıkalyq «Jas Alash» gazetinde bólim meńgerýshisi, 2005–2008 jj. respýblıkalyq «Jas qazaq» ulttyq aptalyǵynda bas redaktordyń orynbasary bolyp qyzmet etken.
2008 jyldan bastap Qazaqstan Jazýshylar odaǵyna qarasty «Juldyz», «Prostor», «Syn» jýrnaldary men «Qazaq ádebıeti» gazetterin biriktirgen «QalamgerMedıa» ortalyǵynyń dırektory qyzmetin atqarǵan.
Dáýren Qýat 1973 jyly burynǵy Taldyqorǵan oblysy, Qapal aýdany, Ashybulaq aýylynda dúnıege kelgen. M.Qashqarı atyndaǵy jáne Ǵ.Músirepov atyndaǵy syılyqtardyń laýreaty.
1990 jyly aýdandyq «Qapal eńbekkeri» gazetiniń tilshisi;
1993 jyly oblystyq «Jeruıyq» gazetiniń tilshisi;
1994 jyly respýblıkalyq «Halyq keńesi» gazetiniń burynǵy Taldyqorǵan oblysyndaǵy (qazirgi Almaty oblysy) menshikti tilshisi;
1996 – 1997 jyldar aralyǵynda Elaralyq «Qazaq eli» halyqaralyq gazetiniń menshikti tilshisi, bólim meńgerýshisi;
1997 – 1999 jyldar aralyǵynda respýblıkalyq «Jas Alash» gazetinińtilshisi, bólim meńgerýshisi;
2000 – 2001 jyldar aralyǵynda respýblıkalyq «Altyn orda» gazeti bas redaktorynyń orynbasary;
2001 – 2003 jyldar aralyǵynda «Habar» arnasyndaǵy «Maıdan» telebaǵdarlamasynyń redaktory, M.O.Áýezov atyndaǵy Ádebıet ınstıtýtynyń kishi ǵylymı qyzmetkeri;
2002 – 2003 jyldar aralyǵynda «Qazaq Ádebıeti» gazeti bas redaktorynyń orynbasary;
2004 -2007 jyldary respýblıkalyq «Altyn orda» gazetinde bas redaktor;
2008 – 2009 jyldary respýblıkalyq «Jas qazaq» gazetiniń bas redaktory;
2009 jyldan beri qaraı «Abai.kz» aqparattyq portalynyń bas redaktory, «Abaı-aqparat» Qazaqstan ınternet keńistigin damytý qory» Qoǵamdyq qorynyń prezıdenti bolǵan.
«Qazaq ádebıeti» gazeti Qazaqstan jazýshylar odaǵynyń organy retinde 1934 jyldyń qańtarynda jaryq kórdi. Gazet betterinde qazaq aqyn-jazýshylarynyń óleń, jyr, dastandary, áńgime-ocherkteri, roman, povesterinen úzindiler, qazaq ádebıetiniń ótkeni men búgini jáne keleshegi jaıly baıypty ádebı-syn maqalalar, dúnıe júzi klassıkteriniń úzdik týyndylarynan aýdarmalar jarııalanady.
«Ana tili» gazetiniń alǵashqy nómiri 1990 jyly 22 naýryzda jaryqqa shyqty. «Ana tili» tek Memlekettik til ǵana emes, ultqa qatysty kez kelgen kúrmeýli máselelerdi kóterip keledi. Qazaqtyń tili, qazaqtyń aýyly, qazaq mektebi, balabaqshasy, qazaq jastary, qazaq ǵylymy, t.b. kóptegen taqyryptar basylym betterinen túsip kórgen emes.