Astananyń №2 perınataldy ortalyǵynda bosanǵan kelinshek kóz jumdy, dep habarlaıdy Astana qalalyq Densaýlyq saqtaý basqarmasynyń baspasóz qyzmeti.
Jas ananyń ólimi 16 shilde kúni tańǵy saǵat 9:25-te tirkelgen. Áıeldi qutqarýǵa Ana men bala ulttyq ǵylymı ortalyǵy men Ulttyq kardıohırýrgııa ortalyǵynyń dárigerleri jáne «Astana» medısınalyq ýnıversıtetiniń professorlary jumyldyrylǵan.
Jasalǵan barlyq jansaqtaý sharalaryna qaramastan aq halattylar jas ananyń ómirin aman alyp qala almady. Dárigerlerdiń aıtýynsha, dúnıege kelgen qyz balanyń jaǵdaıy qalypty.
Oqıǵa boıynsha saraptamalyq komıssııa quryldy. Komıssııa ólim sebebin anyqtaıtyn bolady.
Aıta keteıik, maýsym-shilde aılarynda elordadaǵy №1 perınataldyq ortalyqta úsh áıel kóz jumǵan edi. Osyǵan baılanysty aýrýhana júkti áıelderdi qabyldaýdy ýaqytsha toqtatqan bolatyn. Keıin ortalyq shtattyq rejimde jumysyn qaıta bastady.