Keshe Fınlıandııada Reseı men AQSh prezıdentteri Vladımır Pýtın men Donald Tramptyń kópten josparlanǵan kezdesýleri ótti.
Helsınkıdegi prezıdenttik saraıda eki memlekettiń basshysy aldymen shaǵyn quramda kezdesip, pikir almasty.
Kezdesý barysynda Reseı Prezıdenti tııanaqty áńgimelesýdiń ýaqyty jetkendigin atap ótti.
– Bizdiń baılanystarymyz jalǵasyp keledi. Bizder telefonmen de sóılesip otyrdyq jáne halyqaralyq is-sharalardyń aıasynda birneshe ret júzdestik. Mine, eki jaqty qarym-qatynastar men álemdegi «jandy núkteler» jaıynda ashylyp sóılesetin ýaqyt jetti jáne qordalanyp qalǵan másele kóp, – dedi V.Pýtın.
Al D.Tramp óz sózinde kúlli álem Máskeý men Vashıngtonnyń arasyndaǵy qarym-qatynastardyń jaqsarýyn kútip otyrǵandyǵyna toqtaldy.
– Bizdiń elderimizdiń ekijaqty baılanystardy qalpyna keltirýge úlken múmkindigi bar. Ol birneshe jyldarǵa sozylyp keledi, – dedi D.Tramp.
AQSh prezıdenti, sondaı-aq óz sózinde Amerıka tarapyn saýda, áskerı máseleler, eki memlekettiń ıadrolyq áleýeti jáne Qytaıǵa baılanysty kelissózder qyzyqtyratyndyǵyn atap ótti. Ol, sonymen qatar Pýtındi Reseıdiń fýtboldan álem chempıonatyn sátti ótkizýimen quttyqtaýdy umytpady.
Bul shaǵyn quramdaǵy kezdesýlerdiń buqara úshin ashyq tusy eki memleket basshylarynyń qol alysýymen túıindeldi. Budan soń Pýtın men Tramp kelissózderin ońasha jalǵastyrdy.
Sonymen qatar keńeıtilgen quramdaǵy kelissózder de ótti.
Atap óterligi, Helsınkı sammıti kópjaqty halyqaralyq forýmdardy aıtpaǵanda, álemdegi eki jetekshi memleket basshylarynyń tolyq kezdesýine múmkindik bergen alǵashqy jıyn boldy.
Serik ÁBDIBEK, «Egemen Qazaqstan»