Kez kelgen eldiń basty baılyǵy – adam. Deni saý ult qana myqty memleket qura alady.
Eger ár adam óziniń saýlyǵyn jas kezinen kútpese, ony qadaǵalamasa erteń órshigen dert kúsh bermeı ketýi ábden múmkin. Bul rette Astana men Almaty qalasynda stýdentterge arnalǵan emhanalar bolashaq mamandardyń densaýlyǵynyń kúzetýshisi mindetin abyroımen atqaryp keledi. 1999 jyly Q.Jubanov atyndaǵy Aqtóbe memlekettik ýnıversıtetiniń janynan ashylǵan stýdentter emhanasy óńirler arasynda tuńǵysh ret quryldy. Atalǵan emhana 19 jyl buryn stýdentterge sapaly ambýlatorııalyq-emhanalyq kómek berý jáne onyń qoljetimdiligin kóterý úshin ǵylymı keńestiń sheshimi boıynsha uıymdastyrylǵan bolatyn. Sol ýaqyttan beri munda aýrý túrlerin erte bastan anyqtaý men dıagnostıkalaý jumystary júıeli túrde júrgizilip keledi. Aýyryp em izdegenshe, aýyrmaıtyn joldy izdegenniń artyqshylyǵy áldeqaıda kóp. Osy oraıda óńirlik stýdentter emhanasyndaǵy 32 joǵary jáne orta arnaýly bilimi bar medısına qyzmetkerleri júrgizgen profılaktıkalyq saýyqtyrý sharalarynyń shoqtyǵy bárinen de bıik turady. Onyń aıasy joǵary oqý ornyndaǵy 11 myńnan astam stýdentti qamtıtynyn eskersek, mereıli qyzmettiń mártebesi odan ári bıikteı túsedi. Arnaıy medısınalyq mekeme tıisti materıaldyq bazamen, zamanaýı qondyrǵylarmen jáne bilikti medısınalyq kadrlarmen qamtamasyz etilgen. О́ńirde qurylǵan stýdentter emhanasynyń basty qyzmeti klıentterge tegin medısınalyq kómektiń kepildi kólemin berýge baǵyttalǵan.
Munda medısına mekemesiniń bastaýynda, ıaǵnı ashylýy men qalyptasý kezinde bolǵan bilikti mamandar toby áli kúnge deıin stýdentterge sapaly medısınalyq kómekter kórsetip keledi. Solardyń biri Q.Jubanov ýnıverstıteti stýdentter emhanasynyń meńgerýshisi Jumagúl Jumaǵazına.
– Búgingi densaýlyq saqtaý salasyndaǵy basym baǵyttardyń biri – stýdent jastardyń densaýlyǵyn saqtaý men qadaǵalaý bolyp otyr. Bul is bárimizge kúrdeli mindetter júkteıdi. Oǵan kásibı biliktilik pen sheberlikke qosa erekshe meıirim aıaly alaqan qajet dep bilemiz. Ujymdaǵy barlyq qyzmetkerlerge osyndaı úılesim bolýyn ylǵı aıtyp júremin. О́ıtkeni týǵan topyraǵy men ata-anasynan, ári týyp ósken baýyrlarynan jyraqta júrgen jas densaýlyǵynan kinárat tabyla qalsa eń aldymen bizden jyly sóz kútedi. Biz osy údeden shyǵa bilýge tıispiz, deıdi ol.
Joǵarǵy oqý ornyndaǵy stýdenttik ózin ózi basqarý uıymynyń ókilderi stýdenttik emhananyń qyzmetine dán rıza ekendikterin jetkizdi.