Búginde Eýropa elderinde ekologııalyq taza ónimderge suranys óte joǵary. Sondyqtan da jer júzinde organıkalyq ónimder óndirý asa mańyzdy salalardyń biri bolyp otyr.
2015 jyly elimizde «Organıkalyq ónimderdi óndirý týraly» zańǵa qol qoıylyp, bul baǵyttaǵy jumystar qolǵa alynǵan bolatyn. Qazaq eginshilik jáne ósimdik sharýashylyǵy ǵylymı-zertteý ınstıtýtynda ótken «Organıkalyq aýyl sharýashylyǵy – ekologııalyq taza ónimderdi óndirýdiń negizi» atty halyqaralyq konferensııada osy másele jan-jaqty talqylandy.
Reseı, Germanııa, Mońǵolııa, Belarýs, Túrkııa jáne Qyrǵyzstannyń aýyl sharýashylyǵy salasynyń ǵalymdary qatysqan konferensııanyń alǵashqy kúni ınstıtýttyń tájirıbelik alqaptaryna egilgen dándi daqyldar men maı burshaqtardyń ósý barysy qadaǵalandy. Instıtýt ǵalymdary ózderiniń nátıjeli jetistikterin sheteldik áriptesterine kórsetip, joǵary baǵasyn aldy.
Konferensııanyń ekinshi bóliminde Qazaq eginshilik jáne ósimdik sharýashylyǵy ǵylymı-zertteý ınstıtýty dırektory Serik Barmanbekuly ǵylymı sharalarynyń mán-maqsatyna toqtalyp ótti.
Atalǵan konferensııa barysynda ǵalymdar bir-birimen tájirıbe almasyp, ǵylymı izdenis nátıjelerin ortaǵa saldy. Organıkalyq ónim óndirýdiń baǵyt-baǵdary, onyń júzege asýy turǵysyndaǵy artyqshylyqtar men kemshilikter barysy da talqylandy. Bul baǵyttaǵy qoldanylyp jatqan jańa tehnologııalar da nazar aýdararlyq.
Konferensııa barysynda anyq bolǵanyndaı, otandyq ǵalymdardyń zertteýleri boıynsha elimizdegi egis alqaptary men baqsha daqyldary egilgen aýmaqtardyń 85-90 prosenti ekologııalyq taza aýmaq bolyp tabylady. Bul kórsetkish 2000 jyldary 11 mln gektardy qurasa, búginde ekologııalyq taza alqaptar 60 mln gektarǵa jýyqtaǵan. Ǵalymdardyń boljamyna oraı organıkalyq ónim óndirý jyl saıyn 12-15 prosentke ósip keledi.
Elvıra SERIKQYZY,
«Egemen Qazaqstan»
ALMATY