Sońǵy kúnderi Shyǵys Qazaqstanda sýǵa ketý oqıǵalary jıilep ketti. Ásirese jeksenbi kúni Kúrshim aýdanynyń Boran aýylynda bir úıdiń úsh adamynyń tilsiz jaýdyń qurbanyna aınalǵany jurttyń tóbe shashyn tik turǵyzǵany ras.
Oqıǵa bylaı bolǵan eken. Osy aýyldyń 36 jastaǵy ımamynyń 8 jasar uly Qara Ertiske shomylyp júrip, ózenniń qatty aǵysyna tótep bere almaı qalady. Jaǵada turǵan ákesi men 19 jastaǵy aǵasy ony qutqarmaq bolyp janushyra sýǵa sekirgenimen asaý ózen yryq bermeı, úsheýin de ala jónelgen kórinedi. Osylaısha bir úıdiń úsh birdeı múshesin qas qaǵym sátte býyrqanǵan ózen aǵyzyp áketedi.
Qazir jergilikti turǵyndar men qutqarýshylar toby ımam men onyń uldarynyń denesin izdestirýde. «О́zenniń aǵysy qatty ári sý deńgeıi joǵary bolyp tur. Keıbir tustarynda ıirimder bar. Sý astynda shuńqyrlar da joq emes. Shyǵys óńirlik aeromobıldi jedel-qutqarý jasaǵynyń qutqarýshylary motorly qaıyqpen izdestirý jumystaryn júrgizýde», - deıdi Shyǵys óńirlik aeromobıldi jedel-qutqarý jasaǵynyń 9 bólimshesiniń bastyǵy Talǵat Nurjanov.
Izdestirý jumystary ózen jaǵasynda da jalǵasýda. Buǵan sol aýyldyń 80 adamy men 11 qaıyq jumyldyrylypty.
Oblystyq Tótenshe jaǵdaılar departamentiniń baspasóz qyzmeti Shyǵys óńirlik aeromobıldi jedel-qutqarý jasaǵynyń 9 bólimshesiniń taǵy bir toby osydan 10 kún buryn Zaısan kólinde balyq aýlap júrip joǵalyp ketken eki adamdy da izdestirip jatqanyn habarlady. Sonymen qatar Úrjar aýdany aýmaǵyndaǵy Sasyqkól kólinde de bir balyqshy izdestirilip jatqan kórinedi.
Taǵy bir qaıǵyly oqıǵa Ulan aýdanynyń Bozanbaı aýylynda tirkelipti. Ata-anasynyń qaraýynsyz qalǵan 1 jastaǵy bala 20 lıtr sýǵa batyp ketipti. «Osy aýylǵa jaqynda ǵana kóship kelgen jas otbasy úı sharýasymen esi shyǵyp júrip, balany esterinen shyǵaryp alǵan. Bir jastaǵy bala aýlada turǵan sýǵa toly ydyspen oınaǵysy keldi me, álde sý ishkisi keldi me, áıteýir ańdaýsyzda sýǵa qulap ketken», - delingen Tótenshe jaǵdaılar departamentiniń baspasóz qyzmeti taratqan málimette.
Azamat QASYM,
«Egemen Qazaqstan»
Shyǵys Qazaqstan oblysy