18 tamyz ben 2 qyrkúıek aralyǵynda Indonezııanyń astanasy – Jakartada jalaýy jelbireıtin XVIII jazǵy Azııa oıyndarynda Qazaqstannyń ulttyq qurama komandasy sapynda 15 dzıýdoshy (8 erler+7 áıelder) óner kórsetedi.
Erler arasynda Rıo Olımpıadasynyń qola júldegeri, álem jáne Azııa chempıony, Azııa oıyndarynyń jeńimpazy Eldos Smetov (60 keli) bastaǵan jigerli jigitter erdiń erligi emes, eldiń eldigi synǵa túser sátte esh aıanyp qalmaımyz dep alaqandaryn ysqylap otyr. Olımpııa oıyndarynda beldesip, túrli halyqaralyq dodalarda daralanyp júrgen Jansaı Smaǵulov (73 keli), Dıdar Hamza (81 keli) jáne Islam Bozbaev (90 keli) ta óz múmkindigimizdi qalt jibermeımiz dep qulshynýda. Kópti kórgen kánigi balýandar Eldos Jumaqanov (66 keli) pen Vıktor Demıanenkonyń da (100 keli) dámeleri zor. Olar da Azıadanyń bir júldesin ilip áketýge ázir. Sonymen qatar, Sanjar Jabborov (+100 keli) pen Erasyl Qajybaev (aralas komandalyq saıys) syndy tastúlekterge senim artylyp otyr.
-Bizdiń dzıýdoshylar Azııa oıyndaryna tyńǵylyqty daıarlandy. Osy jarys qarsańynda birqatar Gran-prı jáne Grand Slem dodalaryna qatystyq. Solardyń arasynan iriktelip shyqqandardy jyldyń basty básekesine qosýdy qup kórdik. Qazirgi kezde Shýchınsk qalasyndaǵy «Jaqsy» bazasynda jattyǵý jumystaryn ótkizip jatyrmyz. Buıyrtsa, erler komandasy Jakartada bir altyn, bir kúmis jáne bir qola medaldi ıelenýdi kózdep otyr, – deıdi ulttyq quramamanyń bas bapkeri Aıdyn Smaǵulov.
Al áıelder saıysynda Otgonseseg Galbadrah (48 keli), Kámshat Qarasaıqyzy (52 keli), Sevara Nyshanbaeva (57 keli), Iolanta Berdibekova (63 keli), Zere Bektasqyzy (70 keli), Zarına Raıfova (78 keli) jáne Gúljan Isanova (+78 keli) boz kilemge shyǵady. Osy balýandar arasynan Olımpııa oıyndarynyń qola júldegeri Otgonseseg Galbadrah pen qurlyqtyń jarystarda únemi júldegerler qatarynan kórinip júrgen Gúljan Isanovaǵa artylar senim zor.
О́tkenge zer salsaq, Qazaqstannyń dzıýdoshylary Azııa oıyndarynda tabysty óner kórsetip júrgenin ańǵarý qıyn emes. Máselen, 1994 jyly otandastarymyz eki kúmis jáne úsh qola medaldi ıelendi. Hırosımada Ivan Karezelıdı men Serik Álimjanov fınalda utylsa, Serik Shákimov, Serik Ádiǵanov jáne Ibragım Veshagýrov úshinshi orynǵa taban tiredi.
1998 jyly Bangkoktaǵy jarysty alty medalmen qorytyndyladyq. Atap aıtsaq, Ivan Baǵlaev pen Varvara Masıagına kúmis alsa, Nurbol Súleımenov, Vıacheslav Berdýta, Rýslan Seıilhanov jáne Serik Shákimov qolaǵa qol sozdy.
2002 jyly Pýsanda Bazarbek Donbaı tek aqtyq aıqasta utylsa, Ashat Jıtkeev, Vıacheslav Berdýta jáne Sholpan Kalıeva úshinshi satyǵa jaıǵasty.
2006 jyly Dohada alty júldeni oljaladyq. Maksım Rakov pen Almas Ataev kúmispen kúptelse, Ashat Jıtkeev eki márte jáne Salamat Otarbaev pen Eldos Yqsanǵalıev bir-bir retten qola medaldi enshiledi.
2010 jyly Gýanjoýda jalaýy jelbiregen dúbirli dodada Islam Bozbaev kúmiske qol jetkizse, Maksım Rakov, Gúljan Isanova jáne Galııa Ulmentaeva qola júldeni keýdelerinde jarqyratty.
2014 jyly Inchhondaǵy jarysta Eldos Smetov otandyq dzıýdoshylardyń arasynan birinshi bolyp, Azııa oıyndarynda Qazaqstannyń ánuranyn shyrqatty. Maksım Rakov pen erler quramasy ekinshi orynǵa turaqtasa, Azamat Muqanov, Lenarııa Meńǵazova jáne Marııam Ordabaeva úshinshi satyǵa taban tiredi.
Ǵalym SÚLEIMEN,
«Egemen Qazaqstan»
ALMATY