Elorda ákimi Áset Isekeshev kúzde qatty otyn qunynyń negizsiz kóterilýine jol bermeý maqsatyna arnalǵan jıyn ótkizdi.
Astana naryǵyndaǵy kómirdiń ahýalymen qalalyq Otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov tanystyrdy. Onyń aıtýynsha, qalanyń jalpy qorynda 9590 tonna kómir bar. Atap aıtqanda, «Magnıt 21 ǵasyr» JShS-de Shubarkóldiń (14 500 teńgeden) jáne Kýzneskiniń 1 700 tonna (12 myń teńgeden), jeke kásipker Aıtqojynovada Maıkóbeniń 500 tonna (10 myń teńgeden), «Ýmar KZ» JShS-inde Qarajyranyń 1 myń tonna (13 500 teńgeden), «Severenergoýgolsnab» JShS-inde Qarajyranyń 4 800 tonna (13 myń teńgeden) kómiri bar. Árıne kómir tóńiregindegi áleýmettik tartystyń negizgi sebebi, satý kezeńi sharyqtaǵan kezde kómirdiń jetpeı qalýynan týady.
«Bul qatty otyn jaǵatyn qala halqynyń kún sýyta bastaǵannan jappaı kómir satyp alýymen tikeleı baılanysty jaǵdaı. Satylym qyzǵan kezde kómirdiń baǵasy da sharyqtaıdy. Sondaı-aq kómir tasymalyna tapsyrystyń kóp túskendiginen «Qazaqstan temir joly» UK» AQ tarapynan da vagondardyń jetispeýshiligi baıqalady», dedi E.Tóleýov.
Shahar basshysy osyǵan baılanysty «QTJ – Júk tasymaly» AQ-tyń kómir jetkizetin vagondarmen qamtamasyz etý máselesin erekshe baqylaýǵa alý qajettigin aıtady. Al «QTJ – Júk tasymaly» AQ bas dırektory Qaırat Saýrbaev áleýmettik tartystyń bolmaýy úshin kómirdi aıtarlyqtaı mólsherde tasymaldaýdyń jumystary jaz maýsymynda-aq qarqyndy bastalyp ketkenin jetkizdi.
«Astana úshin kommýnaldyq-turmystyq kómirdi artýda temir jol transporty arqyly 60,5 myń tonna, ıaǵnı ótken jylmen salystyrǵanda 17,8 myń tonnaǵa kóp jetkizildi. Biz júk artýshylarmen osy jaz kezeńinde kómirdiń maksımaldy túrde jetkizilýin jáne kúzde kómir tasymaldaýdyń arasy úzilmeýin talqylaǵan jıyn ótkizdik», dedi Q.Saýrbaev.
Astanalyqtardyń qatty otynǵa joǵary suranysy bar ekenin basa aıtqan Á.Isekeshev kásipkerlerge kómir jetkizetin kesteni usyný jáne kúndelikti turaqty túrde 109 qaýyrt jelisi arqyly qalǵan kómir men jetkizilýi tıis josparlanǵan kómir týraly naqty aqparatpen qamtamasyz etýdiń qajettiligin atap ótti. Sondaı-aq qala ákiminiń orynbasary Qosman Aıtmuhamettiń tóraǵalyǵymen shtab qurylyp, kómir men janar-jaǵarmaıǵa qatysty barlyq máseleni sheshý baqylaýǵa alynbaq.
Al Memlekettik kirister departamenti men Otyn-energetıkalyq kesheni jáne kommýnaldyq sharýashylyq basqarmasy Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetimen birlesip, kómir baǵasynyń ósýine jol bermeý algorıtmin qarastyrady. Eger baǵa ósimi anyqtalǵan jaǵdaıda zańda qarastyrylǵan qajetti sharalar júrgizilmek. Byltyr Tabıǵı monopolııalardy retteý jáne básekelestikti qorǵaý komıteti atalǵan naryqqa taldaý júrgizgen bolatyn.
Bıyl «Severenergoýgolsnab», «Medına Treıd», Aıtqojynova JK, «Ýmar KZ» jáne «Jıger Astana» kásipkerlik nysandaryna qatysty tekserý aıaqtaldy. Sottyń sheshimine sáıkes, atalǵan sýbektilerge jalpy kólemi 7 mln teńgeni quraıtyn monopolııalyq 20 mln teńge tabysyn tárkileıtin ákimshilik aıyppul salyndy. Osy baǵyttaǵy jumystar jalǵasyn taba bermek.
«Astana-energııa» AQ málimetinshe, elordada 2017-2018 jylý maýsymy kezeńinde kómirdi tutyný 2 mln 945 myń tonnaǵa jetti. Onyń ishinde energııa kózderi – 2 mln 545 myń tonna, al halyq muqtajdyǵy úshin 400 myń tonna bolǵan. Osy oraıda Astana qalasynyń ákimdigi turǵyndarǵa qysqy otyndy kómir baǵasy qymbattamaı, kezek kóbeımeı, áleýmettik daý-damaı týyndamaı turǵanda satyp alýǵa shaqyryp otyr. Elordalyqtarǵa josparlanǵan kómirdi jetkizý IKomek (109) qyzmeti arqyly habarlanady.
Dýman ANASh, «Egemen Qazaqstan»