19-26 tamyz aralyǵynda Almatyda fýtzaldan stýdentter arasyndaǵy álem birinshiliginiń jalaýy jelbireıdi. Bul jarysta erlerdiń 16 jáne áıelderdiń 9 komandasy kúsh synasady. Erler saıysynda Qazaqstan «V» tobynda óner kórsetedi. Toptyq týrnırdegi qarsylastarymyz – Chehııa, Belarýs jáne Jańa Zelandııa quramalary.
Birden aıta keteıik, bizdiń toptaǵy komandalar arasynda Eýropa qurlyǵynyń ókilderi óte myqty. Máselen, 2014 jyly Ispanııada ótken stýdentterdiń álem birinshiliginde Belarýs quramasy qola medaldy ıelense, 2016 jyly Brazılııada ótken jarysta Chehııa oıynshylary da dál sol mejeden kórindi. Iаǵnı, aıtýly memlekettiń órenderi dúbirli dodalarda jeńistiń dámin tatyp úlgergen. Bul joly da júldeli oryndardyń birin ıelený úshin olardyń esh aıanyp qalmaıtyny anyq. Desek te baıraqty báseke óz elimizde, óz jerimizde, óz jankúıerlerimizdiń kóz aldynda ótetindikten, bizdiń jigitter de namysty qoldan bermeı, jeńis tuǵyryna kóterilý úshin baryn salýy tıis.
О́zge básekeler myna komandalary arasynda órbıdi: «A» toby – Reseı, Fransııa, Argentına jáne Slovakııa. «S» toby – Taıland, Germanııa, Ýkraına jáne Horvatııa. «D» toby – Portýgalııa, Izraıl, Qytaı jáne Polsha.
Stýdentter arasyndaǵy álem birinshiliginiń tusaýy 1984 jyly Brazılııanyń San-Paýlý qalasynda kesildi. Bul dúbirli doda alań ıeleriniń jeńisimen aıaqtaldy. Fınalda olar Paragvaı quramasyn 5:4 esebimen utty. Qola medaldy Ispanııa ıelendi. Úshinshi oryn úshin tartysta Pıreneı túbeginiń túlekteri Italııadan 7:6 esebimen basym tústi.
Jalpy, 15 márte jalaýy jelbiregen atalmysh jarysta eń kóp jeńis toıyn toılaǵan Brazılııa quramasy eken. Olar 5 márte bas júldeni (1984, 1996, 2000, 2010, 2016) oljalady. Sondaı-aq brazılııalyqtardyń qorjynynda 3 kúmis jáne 1 qola medal bar. Osy kórsetkish jaǵynan Reseı oıynshylary ekinshi orynda. Kórshilerimiz 4 ret (1994, 2002, 2006, 2014) top jaryp, bes ret fınalda súrindi. Taǵy eki jarysty olar úshinshi orynmen qorytyndylady. Úzdik úshtiktiń qatarynda Ýkraına bar. Olar 3 altyn (1998, 2004, 2012), 1 kúmis jáne 3 qolany oljalady. Sondaı-aq Ispanııa (1990), Italııa (1992) jáne Portýgalııanyń (2008) stýdentteri bir-bir retten jeńis tuǵyrynyń eń bıik satysyna kóterildi.
Osynyń aldyndaǵy stýdentterdiń álem birinshiligi 2016 jyly Brazılııanyń Goıana qalasynda uıymdastyryldy. Bul jarystyń sońǵy saıysynda alań ıeleri Reseıdi 2:1 esebimen utty. Al qola medal úshin básekede Chehııa quramasy Fransııany 11:3 esebimen tas-talqan etti.
Áıelder arasyndaǵy jarysqa keler bolsaq, 2008-2016 jyldar aralyǵynda dúnıejúzilik doda bes ret uıymdastyrylyp, solardyń barlyǵy da Brazılııa arýlarynyń aıqyn jeńisimen aıaqtaldy. Sonymen qatar júldeli oryndardy ıelengender arasynda Portýgalııa (2 kúmis+1 qola), Ispanııa (2 kúmis), Reseı (1 kúmis+2 qola), Qytaı (1 qola) jáne Iran (1 qola) elderiniń ókilderi bar.
Almatydaǵy jarysta Qazaqstannyń sulýlary «V» tobynda óner kórsetedi. Qarsylastarymyz – Portýgalııa, Fransııa jáne Jańa Zelandııa quramalary. «A» tobynda Reseı, Kanada, Ýkraına, Izraıl jáne Polsha quramalary kúsh synasady.
Ǵalym SÚLEIMEN,
«Egemen Qazaqstan»