Elimiz úshin bıylǵy jyly ótken óte mańyzdy mádenı oqıǵalardyń biri – elordanyń 20 jyldyq mereıtoıy. Bul shara shilde aıynyń basynda respýblıka kóleminde atap ótilgen edi. Deı turǵanmen, joǵarydaǵy mártebeli mereke áli de jalǵasyn tabýda. Sonyń biri – aldaǵy tamyz aıynyń 30-31-i kúnderi elorda irgesindegi «Qazanat» atshabarynda jamby atýdan ótetin II halyqaralyq «Altyn jebe» týrnıri.
Bul týrnır alǵash ret ótken jyly jalaýyn kóterip, bas júlde rýmynııalyq mergen Mıhaı Kýzmıdiń qanjyǵasynda ketken bolatyn. Al bıylǵy týrnırdi uıymdastyrýshy Mádenıet jáne sport mınıstrligi Ulttyq jáne at sporty túrleri ortalyǵy dırektorynyń orynbasary ári týrnırdiń bas tóreshisi Núrken Baıbórıev bergen málimetke júginsek, bul jolǵy mergender saıysyna elimiz sadaqshylarymen qatar, Túrkııa, Malaızııa, Kýveıt, Ońtústik Afrıka, Rýmynııa, Vengrııa, Mońǵolııa, Reseı, Qyrǵyzstan qatarly elderdiń mergenderi qatyspaqshy.
О́tken jylǵy saıystan bıylǵy týrnırdiń negizgi ereksheligi, jarys túrik, azııa jáne qazaq stıli boıynsha úsh kezeńmen ótedi. Júlde qory da qomaqty – 4 mıllıon teńge. Naqtyraq aıtqanda, birinshi orynǵa – 1,8 mln, ekinshi orynǵa – 1 mln, úshinshi orynǵa – 800 myń teńge buıyrmaq. Onyń syrtynda 4-5-shi oryndarǵa da qomaqty syılyqtar bar. Sonymen qatar jarysqa qatysýshy mergenge aǵashtan, bambýkten jasalǵan nemese sporttyq karbon jebeni qoldanýǵa ruqsat beriledi deıdi uıymdastyrýshylar.
Beken QAIRATULY,
«Egemen Qazaqstan»