Taıaýda Nazarbaev Ýnıversıtette halyqaralyq The IET PATW 2018 ǵylymı prezentasııalar jarysy ótti. Oǵan Fransııa, Irlandııa, Shveısarııa, Chehııa, Grekııa, Kıpr, Malta, Bahreın, Oman, BAÁ, Saýd Arabııasy, Katar, Iordanııa, Pákistan, Gana, Nıgerııa, Egıpet, Mavrıkıı jáne Qazaqstannan 20 qatysýshy qatysyp, ózara baq synady.
Atalǵan dodaǵa Qazaqstan atynan Nazarbaev Ýnıversıtettiń 3-kýrs stýdenti Ekaterına Shestakova qatysty. Ol ǵımarattarda energııa tıimdiligin arttyratyn materıaldar taqyrybyndaǵy jumysyn tanystyrdy. Júldeli ekinshi oryn men oǵan taǵaıyndalǵan 300 eýro aqshalaı syılyq Shveısarııadan kelgen qatysýshy Maksımılıan Kısske buıyrdy. Onyń qorǵaǵan taqyryby – áýede erkin qulaýdyń fızıkasy. Birikken Arab Ámirlikterinen kelgen qatysýshy Mohammed Faýzaan Shaıhtyń «ıadrolyq reaktor» taqyrybynda daıyndaǵan jobasy úzdik dep tanyldy. Birinshi oryndy enshilegen oǵan uıymdastyrýshylar tarapynan 400 eýro aqshalaı syılyq berildi. Buǵan qosa joba jeńimpazy qarasha aıynda Londonda ótetin fınaldyq kezeńge qatysýǵa joldama aldy. Onda tórt qurlyqtan úzdik dep tanylǵan 5 qatysýshy jarysqa túsedi.
Atalǵan jobanyń uıymdastyrýshylary The IET (Institution of Engineering and Technology) – álemniń eń úlken ınjenerııalyq uıymdarynyń biri. Dúnıe júzi boıynsha 150 memleketten 168 myńnan asa múshesi bar. Jobany uıymdastyrýdaǵy negizgi maqsat – álemdik ınjenerııa qoǵamyn aqparattandyrý jáne yntalandyrý.
Aıta keterligi, atalǵan jobanyń alǵashqy tolqyny ulttyq deńgeıde uıymdastyrylady. Sáýir aıynda Nazarbaev Ýnıversıtettegi ınjener jáne tehnolog stýdentterden quralǵan top PATW (Present Around The World) jarysyn ótkizdi. Bul jarysqa 30 jasqa deıingi kez kelgen stýdent, ǵalym, ınjener qatysýǵa múmkindik aldy. Birinshi kezeńde 8 qatysýshy iriktelip, aralarynan jeńimpaz atanǵany kelesi kezeńge qatysýǵa joldama aldy. Ekinshi aımaqtyq kezeń Eýropa, Afrıka jáne Taıaý Shyǵys elderin qamtıdy. Bıyl uıymdastyrýshylar aıtýly sharany Astanada ótkizýge nıet bildirgen. Byltyrǵy aımaqtyq kezeń Dýbaıda ótken bolatyn.
Erkejan AITQAZY,
«Egemen Qazaqstan»