Kýpedegi kisiler Antalııany maqtap keledi. Qaıta-qaıta bastaryn shaıqap: «Keremet! – deıdi tamsanyp. – Kúshti demalyp qaıttyq!»
Olardyń áńgimesine eltigen meniń kóz aldyma kógildir aıdyny kúnge shaǵylysyp, sylq-sylq kúlip jatqan Aq teńiz elesteıdi. Jaǵalaýdaǵy altyn qumǵa qyzdyrynyp jatqan qalyń jurt qujynaǵan qumyrsqanyń ıleýine, ıá bolmasa, qyz-qyz qaınap jatqan qyzyldy-jasyldy jármeńkege uqsaıtyndaı...
Bıyl Antalııaǵa baryp, teńiz jaǵasynda, kógildir taýlardyń eteginde demalyp qaıtýdyń sáti túspegendikten be, búgin tań aldynda sol jaqtan Almatyǵa ushyp kelip, endi mine, keshki poıyzben Shymkentke qaraı ketip bara jatqan kisilerge qyzyǵa qaraımyn. Ári-beriden soń ishimde bir qyzǵanysh oty tutanyp, kondısıonerdiń kúshimen ǵana qońyr salqyn qalpyn ázer saqtap turǵan kýpeniń aýasy tarylyp, ysı bastaǵandaı kórinedi.
Endigi bir sátte retin taýyp, aqyryn ǵana jylystap dálizge shyǵyp kettim. Dúrs-dúrs etken temirjoldyń tynysy, áldeqaıda asyǵyp bara jatqandaı julqynǵan júrdek poıyzdyń ekpini oıymdy bólip, áp-sátte boıym jeńildep sala berdi. Terezeniń perdesin ysyryp qoıyp, syrtqa úńildim.
Qarama-qarsy baǵytta kele jatqan júk poıyzy ysqyryp, tarsyldap-gúrsildep, kómir, temir, munaı, mashına tıegen sostavyn súıretip, jantalasa asyǵyp, dál janymyzdan birer mınýtta zymyrap óte shyqty. Odan soń keń dalanyń kelbeti qaıta ashyldy.
О́z tósindegi dúbirlegen, asyqqan, aptyqqan tirshiliktiń birin de kózine ilmeı, sol baıaǵysynsha sabyrly, tózimdi, sypa qalpyn saqtap, múlgip qana jatyr, jaryqtyq.
Kóp uzamaı jol jaǵasynan bir shaǵyn aýyl kórindi. Ishinde bes-alty tal ósip turǵan sharbaq qorasy men esik aldyndaǵy qańtarylyp turǵan traktor, mashınalary áne-mine degenshe kóz aldymnan zý ete qaldy. Sebebi, júrdek poıyz bul sekildi shaǵyn aýyldarǵa aıaldamaq túgili entigin de baspaıdy...
Aýyl shetinen bastalatyn bir qara jol keń daladaǵy jota-jondardan asyp, tú-ý sona-a-aý kóz ushyndaǵy kók teńizdeı buldyraǵan kókjıekke qaraı sozylady eken...
Kenet júregim shym ete tústi. Jer ortasyndaǵy Antalııany emes, ózimizdiń anaý qara joldardy, jota-jondardy – týǵan jerdiń ystyq topyraǵy men boz jýsanyn saǵynǵanymdy túsindim.
Jáne sol, kóńilimdegi mólt-mólt etken saǵynysh kózimnen qos tamshy jas bolyp úzilip túskenin jańa ǵana baıqadym.
Nurǵalı ORAZ,
«Egemen Qazaqstan»