Jambyl oblysy, Shý aýdanynyń Eski Shý aýyldyq okrýgine qarasty Belbasar eldi mekeninde jobalyq quny 350 mıllıon teńgeni quraıtyn sport kesheniniń qurylysy bastaldy.
Elbasy Nursultan Nazarbaev óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda ulttyń ótken tarıhyn bilýdi, ony qurmetteýdi, týǵan jerge tý tigip, aýyldy gúldendirýdi mindettegen bolatyn. Búgingi tańda elimizde aýyl ahýalyn jaqsartýǵa kóńil bólinip keledi.
Jergilikti kásipker azamattar Prezıdent maqalasynan týyndaıtyn mindetterdi júzege asyrý maqsatynda aýyldy jerlerge qoldaý kórsetip, naqty josparlardy iske asyrýda. Búgingi tańda elimizde «Týǵan jerge týyń tik!» aksııasyn biraýyzdan qoldaǵan kásipker azamattardyń qatary artyp otyr. El ishindegi birlik pen berekeni arttyrýǵa, aýyl ahýalyn jaqsartýǵa kásipkerlerdiń qosyp otyrǵan úlesi az emes.
Jambyl oblysy, Shý aýdanynyń Eski Shý aýyldyq okrýgine qarasty Belbasar eldi mekeninde jobalyq quny 350 mıllıon teńgeni quraıtyn sport kesheniniń qurylysy bastaldy. Jobany iske asyrýshy «Sheber-bıld» qurylys kompanııasy. Kompanııa basshysy, Shý aýdanynyń qurmetti azamaty Bolat Saýranbaev jobany qolǵa alýdaǵy maqsat – jastardy salamatty ómir saltyna beıimdeý, sonymen qatar, jan-jaqty tárbıe berý ekenin aıtady. Qurylysy bastalǵan eki qabatty sport kesheni 400 adamǵa arnalǵan. Kólemi jarty gektar jerdi alyp jatyr.
– Búginde bizge qoldaý kórsetip otyrǵan Jambyl oblysynyń ákimi Asqar Myrzahmetovke, Shý aýdanynyń ákimi Qaırat Dosaevqa alǵysymyz sheksiz. Sonymen qatar sportshylar Ermahan Ybyraıymov, Serik Qonaqbaev, Islam Baıramýkov, sýretshi Erbolat Tólepbaı, kásipker Qaırat Orazbekov sııaqty azamattardyń da qoldaýy bar. Aýyl – ár qazaqtyń altyn besigi ǵoı. Al aýylǵa qoldaý kórsetý, jastarǵa ónege berý bizdiń mindetimiz. Elbasy óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda týǵan jerge tý tigý kerektigin naqty atap kórsetken bolatyn. Mine, Elbasynyń maqalasynan týyndaıtyn mindetterdi júzege asyrý aıasynda Belbasar eldi mekeninde zamanaýı sport kesheniniń qurylysyn bastadyq. Osy jerde aýyl jastary salamatty ómir saltyn qalyptastyryp, joǵary deńgeıge qol jetkizip jatsa, biz úshin ol úlken olja. Keleshekte bul sport kesheninen qazaq atyn álemge áıgileıtin sportshylar shyǵatynyna da kúmán joq, – deıdi Bolat Saýranbaev.
О́z sózinde kásipker aýylǵa árdaıym kómek kórsetýge daıyn ekenin jetkizdi. Kezinde osy Belbasar aýylynan meshit pen halyqaralyq talapqa saı stadıon salyp bergen Bolat Saýranbaev endi sol jerden sport kesheniniń qurylysyn bastap otyr. Almaty qalasy ákiminiń orynbasary, Taraz qalasynyń ákimi sııaqty jaýapty qyzmetter atqarǵan azamat týǵan jerge tý tikken azamattar qatarynda bolǵanyn maqtanysh tutatynyn jetkizdi.
Qandaı da bir ıgilikti is qoldaýdyń nátıjesinde ǵana kórinedi. Máselen, Belbasar aýylynda salynyp jatqan sport kesheninde ataqty boksshy Ermahan Ybyraıymov álemdik dárejedegi chempıonat ótkizýdi josparlasa, erkin kúres sheberi Islam Baıramýkov kúres kilemin syıǵa tartýǵa ýáde etipti. Al belgili kásipker Qaırat Orazbekov atalǵan sport keshenine shaǵyn fýtbol jabdyqtaryn alyp berýdi, áıgili boksshy Serik Qonaqbaev boks rıngin syılaýdy moınyna alypty. Budan ózge birneshe qurylys kompanııalary qarjylaı demeýshilik jasaýǵa nıettenip otyr eken. О́z sózinde Shý aýdanynyń ákimi Qaırat Dosaev bul bastama aýyl ahýalyn jaqsartýǵa, jastardy sportqa baýlýǵa septigin tıgizetinin aıtty.
Búginde Belbasar aýylynda bes myńǵa tarta halyq turady. Kezinde bul aýyldan 150 altyn, kúmis alqa ıegerleri men 9 Sosıalıstik Eńbek Eri shyqqan eken.
– Atalǵan sport keshenin Taraz qalasynan da, Shý aýdanynyń ortalyǵynan da salýǵa bolar edi. Alaıda aýyldy umytýǵa bolmaıdy. Aýyldy umytqan adamnyń tamyry joq, qańbaq sııaqty kete beredi. Sondyqtan da bul jaqsylyqtyń bári de aýylǵa bolsa dedik. Sonymen qatar, aýyldan shyqqan batyr analar men eńbek maıdanynda shynyqqan aǵalarymyzdyń esimi bizder úshin maqtanysh. Endi, keleshekte sol kisilerdiń atyn qaldyrý úshin aýyldan alleıa ashsaq degen jospar bar. Ol azamattardyń aty-jóni tasqa qashalyp jazylsa, jastarǵa bul da bir úlgi-ónege bolatyn edi, – deıdi Bolat Saýranbaev.
Belbasar aýylynda salynyp jatqan zamanaýı sport kesheni talaı talanttyń jolyn ashyp, juldyzyn jarqyratatyny sózsiz. Elbasynyń «Týǵan jerge týyń tik!» aksııasy aıasynda salynyp jatqan bul nysan aýyl turǵyndarynyń da kópten kútken qýanyshy. Osynaý ǵımaratty salýǵa demeýshilik jasap otyrǵan azamattarǵa halyqtyń aıtar alǵysy sheksiz.
Hamıt ESAMAN,
«Egemen Qazaqstan»