Nursultan Nazarbaev Birikken Ulttar Uıymynyń Bas hatshysy Antonıý Gýterrıshke osy uıymnyń burynǵy Bas hatshysy Kofı Annannyń qaıtys bolýyna baılanysty kóńil aıtý jedelhatyn joldady, dep habarlaıdy Aqordanyń baspasóz qyzmeti.
Memleket basshysy Birikken Ulttar Uıymynyń burynǵy Bas hatshysy Kofı Annannyń qaıtys bolǵany týraly habardy zor kúızelispen qabyldady.
«Kofı Annan halyqaralyq deńgeıdegi tanymal saıasatker retinde búkil ǵumyryn álemde turaqtylyq pen beıbitshilik ornatýǵa arnady.
Osydan biraz jyl buryn Kofı Annan syndy parasatty, adal ári meıirban tulǵamen tanystym. Jahandyq damýdyń ózekti máselelerine qatysty ustanymdarymyz uqsas bolatyn. Men áli kúnge deıin kezdesýlerimiz ben ózara áńgimelesken sátterimizdi jyly sezimmen eske alamyn», delingen jedelhatta.
Nursultan Nazarbaev barsha Qazaqstan halqynyń jáne jeke óziniń atynan K.Annannyń týǵan-týysqandary men jaqyndaryna, sondaı-aq Birikken Ulttar Uıymyna kóńil aıtty.