Elbasy Nursultan Nazarbaev naýryz aıynda «Prezıdenttiń bes áleýmettik bastamasy» atty halyqqa Úndeýin jarııalaǵan bolatyn. Búgingi tańda Memleket basshysy bergen naqty tapsyrmalar óńirlerde qalaı júzege asyrylýda? Osy maqsatta «Qazaqstan Respýblıkasy Prezıdentiniń bes áleýmettik bastamasyn» iske asyrýdy baqylaý jónindegi respýblıkalyq keńes músheleri, Parlament Májilisiniń depýtattary Ábdimanap Bekturǵanov pen Jambyl Ahmetbekov Jambyl oblysyna arnaıy keldi.
Halyq qalaýlylary áýeli Baızaq aýdanyndaǵy «Lesnıak» jeke kásipkerliginde bolyp, mundaǵy sút óńdeý jáne sút ónimderin shyǵarý jumystarymen tanysty. Atalǵan kásiporyn «Prezıdenttiń bes áleýmettik bastamasynyń» tórtinshi baǵyty – «Shaǵyn nesıe berýdi kóbeıtý» boıynsha tómen paıyzben 18 mıllıon teńge nesıe alyp, ol qarjyǵa qosymsha qurylǵylar satyp alypty. Búgingi tańda sút óńdeıtin kásiporynnyń qýattylyǵy artyp, kúnine 14 tonna sút óńdep, sonymen qatar túrli ónimder shyǵaryp otyr. Jıyrmaǵa jýyq aýdan turǵyndaryn jumyspen qamtyǵan «Lesnıak» kásiporny júzden astam aýyl sharýalarynyń basyn qosyp, kooperatıv qurǵan.
Jambyl oblysyna sapary kezinde májilismender «Prezıdenttiń bes áleýmettik bastamasynyń» úshinshi baǵyty – «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» boıynsha jumystarmen tanysty. Búgingi tańda Taraz ınnovasııalyq-gýmanıtarlyq ýnıversıteti burynǵy «Taraz» qonaqúıin satyp alyp, ony stýdentter jataqhanasyna aınaldyrý isin qolǵa alyp otyr. Atalǵan ǵımarat kezeń-kezeńimen aǵymdyq jáne kúrdeli jóndeýden ótkiziletin bolady. Qazirgi kezde nysannyń ekinshi jáne úshinshi qabattaryna aǵymdyq jóndeý jumystary júrgizilýde. Sonymen qatar, ýnıversıtet prorektory Sanat Áshirbekov depýtattarǵa ǵımaratty jóndeý sharalary aldaǵy qyrkúıek aıynda aıaqtalatynyn, qyrkúıek aıynan bastap bul jerge 160 stýdentti ornalastyrý josparlanýda ekenin aıtty. Al nysan tolyq jóndeýden ótken soń munda 200-den asa stýdent jataqhanamen qamtylatyn bolady.
Búgingi tańda árbir turǵynnyń baspanaly bolýyna jol ashatyn «7-20-25» memlekettik baǵdarlamasynyń mańyzy erekshe. Atalǵan baǵdarlamany júzege asyrý maqsatynda Jambyl óńirinde tıisti jumystar atqarylýda. Osy oraıda depýtattar Taraz qalasyndaǵy №15 móltek aýdanynyń jańadan salynyp jatqan bes qabatty turǵyn úıleriniń qurylysymen tanysty. Mundaǵy 10 úıdegi 800 páter jyl sońyna deıin tapsyrylýy tıis. Búginde Taraz qalasy boıynsha 15,3 myń adam baspana kezeginde turǵan bolsa, Elbasy bastamasy aıasynda atalǵan baǵdarlamamen 9 myńǵa jýyq otbasy baspanamen qamtylatyn bolady.
– Elbasynyń «Prezıdenttiń bes áleýmettik bastamasynyń» birinshi baǵyty boıynsha jasaqtalǵan «7-20-25» baǵdarlamasy ár otbasyna úlken múmkindik beredi. Baspanaly bolý úshin alǵashqy jarnanyń kólemi de 20 paıyzǵa deıin tómendetilgen. Bul turǵyndar úshin teńdessiz múmkindik. Jergilikti ákimdikke, jaýapty memlekettik organdarǵa atalǵan baǵdarlamanyń artyqshylyqtary jaıly halyqty keńinen aqparattandyrý jumystaryn jandandyrý qajet, – dedi depýtat Ábdimanap Bekturǵanov. Al Jambyl oblysy ákiminiń orynbasary Erkebulan Daýylbaev depýtattarǵa «7-20-25» baǵdarlamasy boıynsha bir ortalyq ashý kerektigin usyndy. Bul oraıda halyq qalaýlylary bul usynysty Parlament tórinen kórsetetinderin aıtty.
Qazirgi kezde Elbasy tapsyrmasyna sáıkes, shaǵyn nesıe berýdi kóbeıtý arqyly kásipkerlikti damytý mańyzdy bolyp otyr. Májilis depýtattary aǵymdaǵy jyly memlekettik baǵdarlama arqyly tómen paıyzben 14 mıllıon qarajat alyp, táýlik boıy jumys jasaıtyn sán salonyn ashqan Tursynaı Baıǵabylovanyń jumysymen tanysty.
Budan keıin respýblıkalyq keńes músheleri, depýtattardyń qatysýymen M.H.Dýlatı atyndaǵy Taraz Memlekettik ýnıversıtetinde keńes otyrysy ótti. Jıynda Jambyl oblysy ákiminiń birinshi orynbasary Bekbolat Orynbekov Prezıdenttiń bes áleýmettik bastamasy aıasynda aımaqta atqarylyp jatqan jumystar jóninde málimdese, TarMÝ rektory, pedagogıka ǵylymdarynyń doktory Mahmetǵalı Sarybekov stýdentterdi jataqhanamen qamtý jaıyn baıandady. О́z sózderinde Ábdimanap Bekturǵanov pen Jambyl Ahmetbekov Elbasynyń bes bastamasynyń Jambyl óńirindegi oryndalý barysyna oń baǵa berip, áli de jumystardy jandandyrý kerektigin aıtty. Sonymen qatar depýtattar bul jumys sapary boıynsha jasalǵan taldaý Úkimetke joldanatynyn, Elbasyǵa baıandalatyn qorytyndyǵa negiz bolatynyn jetkizdi.
Hamıt Esaman,
«Egemen Qazaqstan»
Jambyl oblysy