Bilim berý salasy qyzmetkerleriniń dástúrli tamyz keńesinde aımaqtyń úzdik muǵalimderi marapattalyp, úzdik mektebi anyqtaldy. Oqý jylynyń qorytyndysy boıynsha «Murager» mektebi úzdik dep tanylyp, mektep basshysyna 17 mıllıonnyń sertıfıkaty tabystaldy.
Búgin Qyzylordada «Tórtinshi ónerkásiptik revolıýsııa jaǵdaıyndaǵy adamı kapıtal» taqyrybynda pedagogıkalyq tamyz keńesi ótti.
Sharaǵa oblys ákimi Qyrymbek Kósherbaev, Qazaqstan Respýblıkasy Bilim jáne ǵylym mınıstrliginiń jaýapty hatshysy Aryn О́rsarıev, «Nazarbaev Zııatkerlik mektepteri» derbes bilim berý uıymynyńbasqarma tóraıymy Kúlásh Shamshıdınova, Bilim jáne ǵylym mınıstrligi janyndaǵy aqparattyq taldaý ortalyǵy prezıdentiniń mindetin atqarýshy Eldos Nurlanov, jergilikti bilim berý uıymdarynyń qyzmetkerleri men oblys muǵalimderi qatysty. Qyzylorda oblysy bilim basqarmasynyń basshysy Maıra Meldebekova moderator boldy.
Kezdesýde oblys ákimi Qyrymbek Kósherbaev zamanaýı bilim berý júıesindegi mańyzdy máseleler men problemalardy atap ótti.
«Jańǵyryp jetilýdiń múlde jańa, mazmundyq jáne sapalyq turǵydan burynǵydan bólek, áldeqaıda bıik satysyna kóterilýge umtylǵan elimizge jasampaz, bilikti, ózgeristerden qoryqpaıtyn mamandar qajet. Bul Elbasynyń tujyrymy, naqty tapsyrmasy, bilim salasyn uıymdastyrýshy Siz ben Bizge amanaty! Adamı kapıtal, eń aldymen, bilim berý salasy arqyly qalyptasady. Ony qalyptastyrýdaǵy bilim salasynyń úlesi kez-kelgen basqa saladan áldeqaıda joǵary. Sondyqtan da, bul salany áleýmettik qamsyzdandyrý, zeınetaqy júıesi, memlekettik basqarý, qorǵanys jáne qaýipsizdik sııaqty shyǵyndy kóp talap etetin salalarmen bir qatarǵa qoımaı, kerisinshe, mol qosymsha qun qalyptastyratyn ınvestısııalyq sala retinde qaraý qajet. Bilim berýge ınvestısııa tartý jekeleı adam men tutas memleket úshin de ońtaıly sheshim bolyp tabylady», - dedi aımaq basshysy.
Sonymen qatar, aımaq basshysy bilim alýshylardyń mamandyqtary men eńbek naryǵy suranysynyń sáıkes kelýi mańyzdylyǵyn aıtty.
«Osy rette, bizdiń udaıy nazarda ustaıtyn erekshe mańyzdy kórsetkishimiz – túlekterimizdiń jumyspen qamtylýy.Moıyndaý qajet, bizde bul máselede keleńsizdikter az emes. Túlekterdi bir mamandyq boıynsha daıarlaımyz, al olar múlde basqa saladan oryn tabady. Olardyń qabileti men naryqtaǵy jaǵdaıdy eskere otyryp, túlekterdi durys baǵyttaý – bizdiń mindetimiz», - dedi aımaq basshysy.
Aımaqta bilim berý salasynyń mektepke deıingi kezeńinen bastap joǵaryǵa deıin júıeli jumystar júrgizilip jatqanyn aıta ketý kerek. Osyǵan oraı, oblysta mektepke deıingi qamtylý deńgeıi júz paıyzdy qurap, úsh aýysymda oqıtyn mektepter joıylǵan. Bir ǵana Jalaǵash aýdany M.Shámenov aýylyndaǵy №34 orta mektebinen basqa, apattyq jaǵdaıdaǵy mektepter joq. Sońǵy 5 jylda óńirde 37 apattyq mekteptiń ornyna 45 mektep salynǵan.
2014 jyldan bastap Máskeý men Sankt-Peterbýrgtiń ozyq oqý oryndaryna 452 qyzylordalyq stýdent Reseı federasııasy úkimetiniń granty esebinen bilim alýda. Bıyl alǵashqy 65 túlektiń jumyspen qamtý máselesi sheshimin tapty. Sonymen birge, syrboıylyq jastarǵa mamandandyrylǵan «Kıberqaýipsizdik» jáne «Prosesterdi matematıkalyq modeldeý» salasynda M.V.Lomonosov atyndaǵy Máskeý Memlekettik ýnıversıtetine jyl saıyn 20 grant bólinedi.Budan basqa, Eýrazııalyq ekonomıkalyq qoǵamdastyqtyń Parlamentaralyq Assambleıasy aıasyndaǵy joǵary oqý oryndarymen yntymaqtastyq týraly memorandýmǵa qol qoıyldy. Joǵary oqý oryndaryna túsý emtıhandaryn úzdik tapsyrǵan Qyzylorda oblysy mektepteriniń túlekterine jyl saıyn Sankt-Peterbýrgta oqýǵa 10 bilim grantyn bóletin boldy. Aqparattandyrý men tehnologııalardy engizý boıynsha Tatarstan Respýblıkasyndaǵy Innopolıs ýnıversıtetinde aqparattyq jáne sandyq tehnologııalar boıynsha jyl saıyn taǵy 20 túlektiń bilim alýyna Tatarstan Prezıdentimen kelisim jasalǵan.
Sonymen qatar, UBT tapsyryp memlekettik grantty alýǵa birneshe ball jetpeı qalǵan aýyl mektepteriniń túlekterine aımaqqa qajetti mamandyqtar úshin oblys ákiminiń granty bólinedi.
«2013 jyldan bastap, jyl saıyn 100 daryndy ári talapty aýyl balalary, onyń ishinde, az qamtylǵan jáne kóp balaly otbasynan shyqqan jastardy elimizdiń beldi joǵarǵy oqý ornyna oblys ákiminiń grantymen oqýǵa joldaýdamyz. Bıylǵy jyly oqý grantynyń sanyn 100-den 205-ke deıin, ıaǵnı 2 esege ulǵaıttyq. Osylaısha, búgingi tańda grant ıegerleriniń sany 900 adamǵa jetti. Bıylǵy ulttyq biryńǵaı testileýdiń qorytyndysy boıynsha oblys túlekteriniń ortasha kórsetkishi 85,2 baldy qurady. Bul byltyrmen salystyrǵanda 2,42 balǵa joǵary. Byltyrǵy jyldyń qorytyndysy boıynsha túlekterdiń 97 paıyzy joǵary jáne orta arnaýly oqý oryndaryna oqýǵa túskeninin maqtanyshpen atap ótýge bolady. Bıylǵy jylǵy nátıje de jaqsy bolady dep úmittenemiz»,- dedi aımaq basshysy.
Jıynda Aryn О́rsarıev, Kúlásh Shamshıdınova, Eldos Nurlanov, Maıra Meldebekova jáne Qyzylorda oblysy Kásipkerler palatasynyń dırektory Ǵalymbek Jaqsylyqov baıandama jasady.
Kezdesýge qatysýshylar bilim berý júıesin jańǵyrtý boıynsha usynystaryn bildirdi jáne Qyzylorda oblysyndaǵy bilim berýdiń barlyq kezeńderi qarqyndy damyp jatqanyn atap ótti. Sharada Reseı ýnıversıtetiniń túlekteri men ata-analary sóz sóıledi.
Birqatar oqytýshylar «Qazaqstan Respýblıkasy bilim berý isiniń qurmetti qyzmetkeri» tósbelgisine ıe boldy, «Ybyraı Altynsarın» medalimen, sondaı-aq oblys ákiminiń Qurmet gramotalary jáne alǵys hattarymen marapattaldy. Sonymen qatar, «Murager» mektebine «Úzdik orta bilim uıymy» nomınasııasy boıynsha 17 mıllıon teńge tabystaldy.
2018-2019 oqý jylynda oblystyń 294 jalpy bilim beretin mektebinde 154 559 oqýshyny oqytý josparlanyp otyr. 18 942 bala birinshi synypqa barady.
Jańa oqý jylynda Qazaly jáne Jańaqorǵan aýdandarynda 300 orynǵa arnalǵan jańa mektepter paıdalanýǵa berildi. 2017-2018 oqý jylynda oblysta Qarmaqshy jáne Jańaqorǵan aýdandarynda 3 mektep jumysyn bastaǵan bolatyn. Budan basqa, jyldyń sońyna deıin Aralda 300 orynǵa jáne Qyzylordada 600 orynǵa arnalǵan mektepter salynady.