Otandyq ınternet-aýdıtorııa nazaryna dıalogtik onlaın-alań formaty boıynsha qurylǵan «Taza nıet» tok-shoýynyń birinshi shyǵarylymy usynyldy. Prezıdenttiń «Rýhanı jańǵyrý» baǵdarlamasynyń «Isker azamat – El tiregi» baǵyty aıasynda qolǵa alynǵan jańa jobaǵa qatysýshylar qazaqstandyq bızneske keri áserin tıgizetin qaýip-qaterler men kópshilik bile bermeıtin jaıttardyń ózekti máselelerin talqylady.
Baǵdarlama qurastyrýshylary jobanyń maqsaty Qazaqstandaǵy reıderlik shabýyldardan qorǵanýdyń júıelerin jetildirý bolyp tabylatyndyǵyn aıtady. Sebebi mundaı túıtkil bar jáne onyń óte ózekti ekendigin jasyra almaımyz. Atalmysh shoýdyń alǵashqy shyǵarylymyn tamashalaǵandaı, jurtshylyq onyń aldaǵy túsirilimderin de YouTube-taǵy Taza Niet arnasynan kóretin bolady.
Jobanyń alǵa qoıǵan mindeti qarapaıym: kedergige tap bolǵan kásipker kórermender men quramynda zańgerler, jýrnalıster, blogerler, Bas prokýratýra, Sybaılas jemqorlyqqa qarsy is-qımyl ulttyq bıýrosy, Joǵarǵy sot jáne taǵy basqa da quzyrly mekeme ókilderinen turatyn sarapshylarǵa óz máselesin esh búkpesten aıta alady. Talqylaýdan soń sarapshylar túıtkildi sheshýdiń múmkin joldaryn nusqaıdy. Kórermenderdiń kóz aldynda kez kelgen kásipkerdiń aldynan shyǵýy múmkin keleńsiz jaıttar aıqyn ári naqty kórsetiledi.
Tok-shoýdyń ár baǵdarlamasynda túrli salanyń beldi jáne bedeldi tulǵalarynan turatyn 10 qonaq qatysady. Uıymdastyrýshylar kásipkerlerdiń ótkir máselelerine qoǵam nazaryn aýdarady. Baǵdarlamanyń birinshi shyǵarylymyna qatysqan sarapshylar nebir qıyndyqtarǵa tótep beremin dep kásibi men bostandyǵynan, sońynda tipti densaýlyǵynan aıyrylyp, dúnıe salǵan kásipker Saıat Túsipovtiń basynan ótken oqıǵalaryn jan-jaqty talqyǵa salyp, shyndyqty ashýǵa tyrysty. Sebebi bıznesmenniń ómiriniń sońy qat-qabat qıyndyqtarǵa ulasyp, kúnnen-kúnge ýshyǵa túsken. Basynda isik paıda bolǵanyna qarasmastan, ol tergeý ızolıatoryna jatqyzylyp, 2016 jyly jan tásilim etedi.
Baǵdarlamaǵa onyń jesiri Nazıra Túsipova da keldi. Kásipkerdiń sońǵy kúnderin baıandaǵan kelinshektiń áńgimesinen keıin baǵdarlama júrgizýshisi Rýslan Qumarbekulynyń ortaǵa saýal tastaýymen aýdıtorııada qyzý pikirtalas ornady.
Bastama kásipkerlerdiń máselelerin baıandap qana qoımaıdy, ol sondaı-aq túıtkilderdiń sheshilý joldaryn kórsetýge baǵyttalǵan.
Kópshilikke kez kelgen kásipkerdiń aldynan shyǵýy múmkin tosqaýyldar anyq kórsetilip, tolyqqandy jaýaptar beriledi. Sonymen qatar barlyq shynaıy oqıǵalar men sarapshylardyń pikirleri kórermenderdiń jeke quqyqtyq saýattylyǵyn qalyptastyrýǵa kómektesedi.
Aıta ketsek, «Taza nıet» tok-shoýy Prezıdenttiń «Rýhanı jańǵyrý» baǵdarlamasynyń «Isker azamat – El tiregi» baǵyty aıasynda qolǵa alynyp otyr. «Isker azamat – El tiregi» qoǵamnyń bızneske degen senimin jáne kásipkerlerdiń tanymyn arttyrý sııaqty eki baǵyt boıynsha júzege asyrylyp keledi.
Arnur ASQAR,
«Egemen Qazaqstan»