Memleket basshysy kezdesý barysynda Djordj Krolǵa Qazaqstandaǵy jemisti eńbegi úshin rızashylyq bildirip, dıplomattyń eki jaqty baılanystardyń damýyna erekshe úles qosqanyn atap ótti.
– Siz jumys istegen ýaqytta elderimiz arasyndaǵy jemisti qarym-qatynastar nyǵaıa tústi. Qańtar aıyndaǵy AQSh-qa saparym barysynda Prezıdent D.Tramppen kezdestim. Bizdiń ekonomıkalyq yntymaqtastyǵymyz jańa deńgeıge kóterildi. Qol jetkizgen barlyq ýaǵdalastyqtar tabysty júzege asyrylýda. Munyń bárinde sizdiń úlesińiz mol. Siz qazaq tili men mádenıetin nasıhattap júrsiz. О́zara qarym-qatynastarymyzdyń nyǵaıýyna zor eńbek sińirdińiz. Sizdi Qazaqstannyń dosy bolyp qala beredi dep senemin, – dedi Elbasy.
D.Krol Qazaqstan Respýblıkasyndaǵy dıplomatııalyq qyzmetine joǵary baǵa bergeni úshin Nursultan Nazarbaevqa alǵys aıtyp, Qazaqstandaǵy mártebeli jumysyn zor jaýapkershilikpen atqarǵanyn atap ótti. Elshi, sondaı-aq, atqarǵan qyzmetiniń eki el arasyndaǵy qarym-qatynastardyń odan ári damýyna septigin tıgizetinine senim bildirdi.
Kezdesý sońynda Memleket basshysy Amerıka Qurama Shtattarynyń Qazaqstan Respýblıkasyndaǵy Tótenshe jáne О́kiletti Elshisi Djordj Kroldy dıplomatııalyq mıssııasynyń aıaqtalýyna baılanysty Qazaqstan Respýblıkasy men Amerıka Qurama Shtattary arasyndaǵy beıbitshilikti, dostyq pen yntymaqtastyqty nyǵaıtýǵa qosqan úlesi úshin II dárejeli «Dostyq» ordenimen marapattady.