Búgin Mádenıet jáne sport mınıstrligi, Ulttyq jáne at sporty ortalyǵynyń uıymdastyrýymen ulttyq sport túrlerinen respýblıkalyq deńgeıdegi mańyzdy shara – «Uly dala rýhy» festıvali bastalady. Atalmysh festıvalǵa irikteý sharalary shilde-tamyz aılarynda elimizdiń tórt aımaǵynda ótip, oǵan 700-den astam adam qatysqan bolatyn.
Atap aıtar bolsaq, 13-15 shilde aralyǵynda Shymkent qalasynda festıvaldyń ońtústik aımaqtyq irikteý jarysy ótkizilip, oǵan Túrkistan, Jambyl, Qyzylorda jáne Almaty qalasynyń sportshylary qatysqan edi. Osy oraıda qazaq kúresi, toǵyzqumalaq, jamby atý sııaqty sport túrlerinen túrkistandyqtar úzdik shyqsa, asyq atý, kókpar jáne teńge ilýden jambyldyqtar top jardy.
Al Batys ólkeniń úzdikterin anyqtaý jarysy 27-29 shilde aralyǵynda Aqtóbe qalasynda jalaýyn kótergen edi. Aımaq jeńimpazdary Aqtóbe, Batys Qazaqstan, Mańǵystaý, Atyraý oblystarynyń sportshylary arasynda anyqtaldy. Qazaq kúresi jáne toǵyzqumalaqtan atyraýlyqtar, asyq atý men jamby atýdan aqtóbelikter, teńge ilý, aýdaryspaqtan batysqazaqstandyqtar, kókpardan mańǵystaýlyq sportshylar úzdik shyqty.
Shyǵys aımaqtyń irikteý básekelerine Shyǵys Qazaqstan, Pavlodar, Qaraǵandy, Almaty oblystarynyń sportshylary baqtaryn synady. Jarys 13-15 tamyz kúnderi Pavlodar qalasynda ótti. Jamby atý, qazaq kúresi, aýdaryspaq, asyq atýdan Shyǵys Qazaqstan, teńge ilýden Qaraǵandy, toǵyzqumalaqtan Pavlodar, kókpardan Almaty oblystary jeńiske jetti.
Festıvaldyń irikteý jarystaryn 29-31 tamyz kúnderi soltústik aımaq qorytyndylady. Jarys Astana qalasynda uıymdastyryldy. Bul topqa Astana qalasy, Soltústik Qazaqstan, Qostanaı, Aqmola oblystarynyń sportshylary qamtyldy. Qazaq kúresi, asyq atý, toǵyzqumalaqtan Astana qalasy, kókpar, teńge ilý, jamby atý, aýdaryspaqtan Aqmola oblysynyń sportshylary jeńimpaz retinde tanyldy.
Joǵarydaǵy tórt aımaqtan iriktelinip alynǵan jeńimpazdar 12-16 qyrkúıek kúnderi Astana qalasynda sheshýshi kezeńniń kórigin qyzdyrmaqshy. Ulttyq sporttyń kókpar, báıge, teńge ilý, aýdaryspaq, jamby atý, qazaq kúresi, toǵyzqumalaq, asyq atý túrlerinen jarystar komandalyq tártipte júrgizilmek.
Jarystyń baǵdarlamasyna toqtalar bolsaq búgin, ıaǵnı 12 qyrkúıek kúngi asyq atý, toǵyzqumalaq, qazaq kúresinen ótetin saıystar elorda tórindegi «Dáýlet» sport kesheninde uıymdastyrylsa, qalǵan kúnder úlesine tıesili teńge ilý, jamby atý, aýdaryspaq, kókpar jáne báıge túrleri boıynsha jarystar 13-16 qyrkúıek aralyǵynda «Qazanat» atshabarynda ótedi dep kútilýde.
Beken QAIRATULY,
«Egemen Qazaqstan»