Tegeranda ótken Sırııa qaqtyǵysyn retteý boıynsha Iran, Reseı jáne Túrkııa basshylarynyń úshjaqty kezdesýi Astana prosesiniń sırııalyq beıbit úderisine, sonyń ishinde eldiń saıası birligi men tutastyǵyn saqtaýǵa qatysty halyqaralyq is-áreketterin úılestirýdegi oń rólin kórsetti. Bul týraly Qazaqstannyń Birikken Ulttar Uıymy janyndaǵy Turaqty ókili Qaırat Omarov BUU Qaýipsizdik Keńesiniń otyrysynda málimdedi.
BUU Qaýipsizdik Keńesiniń otyrysy reseılik taraptyń bastamasy boıynsha Sırııadaǵy ahýalǵa basa nazar aýdarýyna baılanysty uıymdastyryldy. Keńes múshelerinen basqa atalǵan otyrysqa Iran men Túrkııanyń BUU janyndaǵy turaqty ókilderi de qatysty.
Sessııa barysynda qazaqstandyq delegasııa basshysy álemdik qaýymdastyq ishkisırııalyq qaqtyǵysty tek qana beıbit jolmen sheshý, soǵys qıraǵan elin qalpyna keltirý jáne kúrdeli gýmanıtarlyq jaǵdaıdy sheshý úshin jaǵdaı jasaý maqsatynda birlesken kúsh-jigerdi jumsaý kerek ekenin atap ótti. «Biz sondaı-aq kóptegen sırııalyq bosqyndardyń qaıtarylýyna jaǵdaı jasaýymyz kerek. Osyǵan oraı sırııalyq bosqyndar boıynsha halyqaralyq konferensııany uıymdastyrý týraly ıdeıasy problemany sheshýdegi alǵashqy qadam bola alady», - dep aıtty Q. Omarov.
Sırııadaǵy jaǵdaı týraly aıta otyryp, Qazaqstan Elshisi Astana prosesiniń kepil-elderiniń «DAISh», «An-Nýsra maıdany» jáne «Ál-Kaıda» degen terrorıstik toptaryna qarsy kúrestegi yntymaqtastyǵynyń mańyzdylyǵyn, sondaı-aq atys toqtatý rejımine qatysatyn qarýly oppozısııalyq toptaryn terrorısterden aıyrylýdyń ózektiligine basa nazar aýdardy. Sonymen qatar, elshi saıası prosesi úshin jańa múmkindikter týdyratyn Idlıbdegi atysty toqtatýyn qanaǵattanýshylyqpen atap ótti.
BUU Qaýipsizdik Keńesiniń otyrysynda Qazaqstan ótkir halyqaralyq máselelerdi qurmetteý, senimdilik jáne syndarly yntymaqtastyq negizinde ǵana sheshe alatynyn taǵy da rastady.
Iran, Reseı jáne Túrkııanyń Sırııadaǵy gýmanıtarlyq jaǵdaıdy jaqsartýǵa jáne azamattyq tulǵalardy qorǵaýǵa, sonyń ishinde Sırııa ekonomıkasyn jáne ınfraqurylymdy qalpyna keltirýge, sondaı-aq mańyzdy áleýmettik problemalardy sheshýge baǵyttalǵan kúsh-jigerine joǵary baǵa berildi.