Parlament Senatynda elimizdiń Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary, III-V shaqyrylǵan Parlament Májilisiniń depýtaty Elena Tarasenkonyń «Jaıyq - ómir ózeni» kitabynyń tusaýkeseri boldy.
Senattyń Áleýmettik-mádenı damý jáne ǵylym komıtetiniń tóraǵasy Birǵanym Áıtimova sharany asha kelip, Jaıyq ózeniniń boıymen 22 jyl júrgizilip jatqanyn birlesken ekspedısııa bizdiń ólkemizdiń tarıhy men mádenıetin zertteýge, jastarǵa patrıottyq tárbıe berýge jáne Jaıyq ózeni aıdynynyń ekologııalyq máselelerin kóterýge óz úlesin qosqanyn atap ótti.
B.Áıtimova birlesken ekspedısııa atqarǵan aýqymdy jumystardyń arqasynda 2016 jyly Jaıyq ózeniniń ekojúıesin saqtaý jónindegi úkimetaralyq kelisimge qol qoıylǵanyn, Jaıyq transshekaralyq ózeni aıdynynyń ekojúıesin saqtaý jónindegi komıssııa qurylǵanyn eske saldy. «Kitapta ekspedısııanyń tarıhy, osynaý mańyzdy iske qatysqan árbir azamat týraly, elimizdiń keleshegi jáne onyń bolashaq urpaǵy úshin jaýapkershilik jaıynda jan-jaqty jazylǵan», - dedi senator.
Shara barysynda «Qoǵamdyq kelisim» respýblıkalyq mekemesiniń dırektory Aleksandr Tarakov, Senat depýtaty, Qazaqstan Respýblıkasyndaǵy bala quqyqtary jónindegi ýákil Sáýle Aıtpaeva, Senat depýtaty Serik Bekturǵanov, Adam quqyqtary jónindegi ulttyq ortalyqtyń basshysy Serik Ospanov kitap jaıynda óz oılaryn ortaǵa saldy.
Tusaýkeserge Senat pen Májilis depýtattary, úkimet ókilderi men qoǵamdyq jáne saıası qaıratkerler, joǵary oqý oryndary kitaphanalarynyń qyzmetkerleri men stýdentteri qatysty.
Elena Tarasenko sharaǵa qatysýshylardyń kitapqa degen yqylasyna alǵys bildirip, jınaqtyń táýelsiz Qazaqstannyń tarıhnamasynan oryn alatynyna úmitin jetkizdi. Avtor sondaı-aq Parlament kitaphanasynyń, elimizdiń Ulttyq kitaphanasynyń jáne S.Seıfýllın atyndaǵy Qazaq agrotehnıkalyq ýnıversıtet pen L.N.Gýmılev atyndaǵy ýnıversıtettiń kitaphanalary ókilderine kitabyn tartý etti.