Elbasy Nursultan Nazarbaev Túrkııaǵa resmı sapary aıasynda osy eldegi bıznes ókilderimen jolyǵyp, birqatar mańyzdy máselelerdi talqylady.
Is-sharany ashqan Elbasy eki el arasyndaǵy qarym-qatynas dostyq senimge negizdelgenin atap ótip, ekonomıkalyq baılanystyń nyǵaıyp kele jatqanyn jetkizdi.
Prezıdent Qazaqstan men Túrkııa arasyndaǵy taýar aınalymy 27 paıyzǵa artyp, 2 mıllıard dollarǵa jetkenin málimdedi. «Túrkııa Qazaqstannyń saýda aınalymynyń alǵashqy ondyǵyna kiretin strategııalyq áriptes. Elder arasyndaǵy taýar aınalymy 2017 jyly 27 paıyzǵa artyp, 2 mıllıard dollardy qurady. Osy jyldyń birinshi jarty jyldyǵynda 820 mıllıon dollarǵa jetti», dedi N.Nazarbaev.
Sondaı-aq Táýelsizdik alǵaly beri Túrkııa Qazaqstanǵa 3 mıllıard dollardan astam tikeleı ınvestısııa salǵanyn aıtyp, keri ınvestısııanyń kólemi 940 mıllıonǵa jetkenin atap ótti.
Qazirgi tańda Qazaqstandaǵy túrli salalardy túrik kapıtalynyń qatysýymen eki myńǵa jýyq kásiporyn jumys isteıdi. Olar hımııa jáne jeńil ónerkásip, mashına jasaý, qurylys materıaldaryn óndirý, taý-ken metallýrgııasy jáne basqa salalardy qamtıdy. Iri seriktester qatarynda «Anadoly Hıldroý», «Úlker», «Abdı» sekildi kompanııalar bar. Sondaı-aq Qazaqstanda 1993 jyldan beri túrkııalyq «Zııarat» banki qyzmet etip keledi.
«2012 jyldan beri eki eldiń kásipkerlerin jan-jaqty yntalandyrýǵa jáne qoldaýǵa baǵyttalǵan jańa sınergııa baǵdarlamasy júzege asyrylyp keledi. Bul baǵdarlama R.Erdoǵan myrzanyń Qazaqstanǵa sapary kezinde bastalǵan bolatyn. Onyń sheńberinde somasy 800 mıllıon dollar bolatyn 23 joba iske qosylyp, 3000 jumys orny quryldy», dedi Prezıdent.
Budan bólek, Elbasy keshe ótken bıznes ókilderiniń kezdesýine toqtalyp, eki el arasyndaǵy ekonomıkalyq baılanystyń jańa qarqyn alǵanyn málimdedi.
«Elderimizdiń bıznes ókilderi arasynda somasy 1,7 mıllıard dollardan astam 24 qujatqa qol qoıyldy. Bul senimdilik pen yntymaqtastyqtyń jarqyn úlgisi. Ekonomıkalyq qatynastardy odan ári damytýǵa Qazaqstan jaǵy ár ýaqytta múddeli», dedi N.Nazarbaev.
Kezdesýge Túrkııa ekonomıkasynyń 15 paıyzyn quraıtyn eldegi eń iri 25 kompanııanyń basshylary qatysty. Olar aýylsharýashylyq jáne azyq-túlik ónerkásibi, geologııa, taý-ken metallýrgııasy, hımııa ónerkásibi, mashına jasaý, toqyma jáne jeńil ónerkásip, memdekettik-jeke menshik seriktestigi, densaýlyq saqtaý, farmasevtıka sekildi ekonomıkanyń basty salalarynda jumys isteıdi.
Abaı ASANKELDIULY,
«Egemen Qazaqstan»
Sýretterdi túsirgen Baýyrjan JÝASBAEV
Ankaradan