Prezıdent Nursultan Nazarbaev Ankarada bıznes ókilderimen kezdesýinde Túrkııa kompanııalaryn Qazaqstannyń áleýetin paıdalanýǵa shaqyrdy.
Elbasy óz sózinde Qazaqstannyń Eýrazııalyq ekonomıkalyq odaqqa múshe ekenin atap ótip, osy odaqta 180 mıllıonnan astam halyq mekendeıtinin jetkizdi. Memleket basshysy mundaı úlken naryq Túrkııa kompanııalaryna da, Qazaqstan tarapyna da tıimdi bolatynyn aıtty.
«Dúnıejúzilik banktyń Doing Business reıtınginde Qazaqstan 190 eldiń ishinde 36-orynǵa ıe boldy. Qazaqstan – Ekonomıkalyq yntymaqtastyq jáne damý uıymy Investısııa komıtetiniń múshesi. Halyqaralyq ınvestısııalar týraly deklarasııaǵa qosyldy. Prezıdent janyndaǵy sheteldik ınvestorlar keńesi 20 jyldan beri tıimdi jumys istep keledi. Biz álemniń eń úlken kompanııalarynyń basshylarymen tikeleı kezdesýde týyndaǵan máselelerdi sheship otyramyz. «Anadoly grýpp» jáne «Sembol konstrakshn» kompanııalarynyń basshylary osy keńestiń músheleri», dedi N.Nazarbaev.
Memleket basshysy ınvestorlar men bıznespen ózara tıimdi árekettesý maqsatynda «Ispat» túrik agenttigine uqsaq KazakhInvest ulttyq kompanııasy qurylǵanyn atap kórsetti. Sondaı-aq mańyzdy salalardaǵy jobalardy júzege asyrý kezinde korporatıvtik jer jáne múliktik salyqtarynan bosatý qarastyrylǵan.
Osyndaı jobalar úshin sheteldik jumys kúshin tartý kvotasy jáne arnaıy ruqsaty júzege asady. Jer qoınaýyn paıdalanýǵa lısenzııalardy alý, sharttardy jasasý tártibi jeńildetildi. «Jańartylǵan energııa kózderin damytý maqsatynda aýksıon arqyly ınvestorlarǵa «kepildendirilgen ofteık» kelisimshart ınvestısııalyq jeńildikter qarastyrylǵan. Qazaqstanda 11 arnaıy ekonomıkalyq jáne 24 ındýstrııalyq aımaq jumys isteıdi. Olardyń qatysýshylaryna salyq jáne basqa jeńildikterdiń bári berilgen. Túrik kompanııalaryn Qazaqstanda bıznes júrgizýge taǵy shaqyramyz», dedi Prezıdent.
Sonymen qatar Elbasy keıingi ýaqytta Qazaqstan arqyly Qytaı men Eýropany jalǵaıtyn jol salynǵanyn, Túrikmenstan jáne Iran arqyly Parsy shyǵanaǵyna shyǵatyn múmkindik bar ekenin atap kórsetti.
«Kaspıı porttarynyń jalpy jyldyq ótkizý qabileti 25 mıllıon tonnaǵa jetti. Olar Qytaıdy, Azııany, basqa da memleketterdi Jerorta teńizi arqyly Túrkııamen baılanystyrady. Bul múmkinshilikterdi Túrkııa kompanııalarynyń qoldanýyna árdaıym múddelimiz jáne oǵan qolaıly jaǵdaı jasaımyz», dedi N.Nazarbaev.
Budan soń Prezıdent Qazaqstannyń aýyl sharýashylyǵyna basymdyq beretinin, Túrkııa tarapyna astyq tasymalyn jol qoıý qajettigin jetkizdi. «Qazaqstannyń agrarlyq sektory eń úlken sala bolyp sanalady. Agrokeshendi damytýdyń memlekettik baǵdarlamasy júzege asyrylýda. Onda aýylsharýashylyǵy ónimderin óndirýshiler men óńdeýshilerge memlekettik qoldaý kórsetý qarastyrylǵan. Biz túrik kompanııalaryn osy saladaǵy jobalardy belsendi júzege asyrýǵa shaqyramyz. О́zderińiz biletindeı, búginde Qazaqstan astyqty, bıdaıdy eksporttaıtyn iri memlekettiń biri. Bıyl da astyqtyń túsimi óte jaqsy. Sondyqtan Túrkııaǵa astyq pen un eksporttaýǵa múmkindik mol», dedi Prezıdent.
Esterińizge sala keteıik, Túrkııa astanasy Ankarada Elbasy N.Nazarbaev osy eldiń bıznes salasynyń «kapıtandarymen» kezedsý ótkizip jatyr. Kezdesýge Túrkııa ekonomıkasynyń 15 paıyzyn quraıtyn eldegi eń iri 25 kompanııanyń basshylary qatysty. Olar aýylsharýashylyq jáne azyq-túlik ónerkásibi, geologııa, taý-ken metallýrgııasy, hımııa ónerkásibi, mashına jasaý, toqyma jáne jeńil ónerkásip, memlekettik-jeke menshik seriktestigi, densaýlyq saqtaý, farmasevtıka sekildi ekonomıkanyń basty salalarynda jumys isteıdi.
Abaı ASANKELDIULY,
«Egemen Qazaqstan»
Ankaradan