Premer-Mınıstrdiń orynbasary Asqar Jumaǵalıev bastaǵan qazaqstandyq delegasııa jumys saparymen Úndistan Respýblıkasyna bardy. Sapar barysynda qazaqstandyq mamandar Úndistannyń sıfrlandyrý jobalarymen tanysyp, Ulttyq ınformatıka ortalyǵyna bardy. Onda úndilik áriptester aqparattyq qyzmetter men aqparattyq-kommýnıkasııalyq tehnologııalar salasyndaǵy jańa sheshimdermen tanystyrdy.
Nıý-Delıde QR Premer-Mınıstriniń orynbasary Asqar Jumaǵalıev pen ÚR aqparattyq tehnologııalar jáne telekommýnıkasııalar mınıstri Ravı Shankar Prasad kezdesti.
Kezdesý barysynda Asqar Jumaǵalıev «Sıfrlyq Qazaqstan» memlekettik baǵdarlamasy týraly aıtyp berdi. Premer-Mınıstrdiń orynbasary Úndistannyń kıberqaýipsizdik, adam kapıtalyn damytý, bıometrııa jáne t.b. salalardaǵy jobalardy iske asyrýdaǵy eleýli tájirıbesin atap ótti.
«Adam kapıtalyn damytý – «Sıfrlyq Qazaqstan» baǵdarlamasynyń eń mańyzdy baǵyttarynyń biri. Joǵary kásibı kadrlarsyz sıfrlyq bastamalardy iske asyrý múmkin emes. Úndistannyń bilikti AT-kadrlaryn daıarlaýda úlken tájirıbe jınaqtaǵanyn kórip otyrmyz. Úndi áriptesterimizdiń osy saladaǵy tájirıbesi bizdiń qyzyǵýshylyǵymyzdy týdyryp otyr», — dedi Asqar Jumaǵalıev.
Ravı Prasad Qazaqstannyń sıfrlyq bastamalary álemdik trendterge sáıkes keletinin, al Memleket basshysynyń jan-jaqty kórsetip otyrǵan qoldaýy «Sıfrlyq Qazaqstan» baǵdarlamasyn sátti iske asyrýdyń kepili ekenin atap ótti. Sondaı-aq, mınıstr mamandardy daıarlaý salasynda tájirıbemen bólisýge daıyn ekenin jetkizip, Úndistan basqa da salalarda yntymaqtastyq ornatýǵa múddeli ekenine nazar aýdardy.
Úndistannyń Aqparattyq tehnologııalar jáne kommýnıkasııalar mınıstrliginde NASSCOM, NIELT, CDAC, SPTI, EP sekildi jetekshi úndi kompanııalary óz ónimderimen tanystyrdy. Qazaqstan tarapy Astana Habpen tanystyryp, Qazaqstannyń ınnovasııalyq ekojúıesin damytý keleshegi týraly aıtyp berdi.
Asqar Jumaǵalıev úndi BAQ-nyń suraqtaryna jaýap bere otyryp, eshbir el sıfrlyq jobalardy óz betinshe iske asyra almaıtynyn atap ótti. Sebebi, tehnologııalar únemi ózgerip, qarqyndy túrde jetildirilip otyrady, turaqty negizde pikir almasyp, bilimmen jáne tájirıbemen bólisip otyrý qajet. Sondyqtan da, osyndaı kezdesýler Qazaqstan úshin de, Úndistanǵa da óte paıdaly. Sondaı-aq, A: Jumaǵalıev úndi kompanııalaryn bıyl 5 qarashada ashylatyn Astana Habqa shaqyrdy.