1958 jyldyń qońyr kúzi Qostanaı ólkesine zor qýanyshyn ala kelgen edi. Máskeýde ótkiziletin qazaq ádebıeti men ónerininiń onkúndigi qurmetine oblys aqyndarynyń aıtysyn ótkizemiz dep jarǵaq qulaǵy jastyqqa tımeı júrgen jigitterdiń birazy erteń baq synamaq.
Oblystyq «Kommýnızm tańy» gazetiniń qyz-kelinshekterin kúlkige qarq qylyp turǵan bul sýrettegi jigit – halyq aqyny Omar Shıpın «qarshyǵadaı Qaýaz» dep ataǵan Tájimaqın Qaýaz.
Jańadan órken jaıyp, kenshilerdiń ordasyna aınalyp kele jatqan Rýdnyı qalasynyń atynan aıtysatyn ónerli jan taba almaǵan soń, sol kezde oblystyq mádenıet basqarmasynyń bastyǵy qyzmetin atqaryp, ári aıtysty uıymdastyryp, murnyna sý jetpeı júrgen Qaýaz aǵa aıtysqa ózi shyqqan.
Aıtys bastalyp, bir-birine syry málim sáıgúlik aqyndar kesteli sózdi kesegimen tógip, halyqtyń yqylasyna bólenip jatyr. Bir kezde Qostanaı men Rýdnyı qalasy aqyndary shyǵatynyn habarlady. Qaýazdyń qarsylasy – «Kommýnızm tańy» gazeti ádebıet jáne mádenıet bóliminiń meńgerýshisi Músilim Dosmaǵambetov. Eki aqyn bir-birin ańdysyp, qalalardyń kemshilikterin aıtyp otyrady. Rýdnyı jas qala bolǵandyqtan kem-ketigi moldaý. Biraq ǵasyrǵa jýyq tarıhy bar Qostanaıdyń da kemshiligi ár jerden kórinip turady. Narımanovkadaǵy jeti jyl salynyp, bitpeı jatqan kópirdi aıtqanda kópirden ábden zerezap bolǵan halyq kóterilip, qoshemetteı jóneledi. Sóıtip Jeńis Rýdnyı qalasynyń aqynyna beriledi.
Qajy QORǴANULY,
telejýrnalıst, Qazaqstannyń eńbek sińirgen mádenıet qyzmetkeri