Astanada bıyl tuńǵysh ret atalyp ótip otyrǵan qorǵanys ónerkásibi qyzmetkerleriniń merekesine oraı QR Qorǵanys jáne aeroǵarysh ónerkásibi (QR QAО́M) qyzmetkerleri men qorǵanys kásiporyndarynyń eńbek ujymy ókilderine arnalǵan merekelik jıyn boldy, dep habarlaıdy qorǵanys jáne aeroǵarysh ónerkásibi mınıstrliginiń baspasóz qyzmeti.
Eske salamyz, 2017 jylǵy 31 qazandaǵy № 689 QR Úkimetiniń Jarlyǵymen Qazaqstan Respýblıkasy qorǵanys ónerkásibi qyzmetkerleriniń kásibı merekesi atalyp ótiledi.
Shara barysynda QR Qorǵanys jáne aeroǵarysh ónerkásibi mınıstri Beıbit Atamqulov qorǵanys salasyndaǵy qyzmetkerlerdi merekesimen quttyqtap, eńbegimen kózge túsken sheberlerdi, ınjenerlerdi, konstrýktorlardy, sonymen birge Qazaqstannyń qorǵanys ónerkásibi ardagerlerin vedomstvolyq nagradamen, QR QAО́M qurmet gramotasymen jáne alǵys hatymen marapattady.
«Eńbek ardageri» medalimen «Zenıt» Oral zaýyty» AQ bıýro basshysy Vladımır Shýlekın, «Semeı mashına qurastyrý zaýyty» AQ energııa-mehanıkalyq qyzmetiniń basshysy Aleksandr Shevchenko, «Qazaqstan Injınırıng R&D ortalyǵy» JShS Bas dırektorynyń orynbasary Amantaı Jutabaev, «PZTM» AQ qural-saımanshysy Mırzovoı Darkeev, «Kırov atyndaǵy mashına qurastyrý zaýyty» AQ tehnıkalyq jóndeý bóliminiń elektrıgi Petr Krıvorot, «Alataý» Almaty Arnaıy konstrýktorlyq bıýro ǵylymı-óndiristik kásiporny» JShS qurastyrý-montajdaý óndiristik bóliminiń basshysy Galına Nedbaı, «ZKMK» AQ Bas dırektorynyń keńesshisi Vıktor Kýznesov marapattaldy.
12 zaýytshyǵa «Qazaqstan Respýblıkasynyń Qorǵanys jáne aeroǵarysh ónerkásibin damytýǵa qosqan úlesi úshin» medali berildi, 6 qyzmetker Qurmet gramotasymen marapattalsa, 2 qyzmetkerge alǵys hat tabystaldy.
Úzdik qyzmetkerlerdi marapattaý merekelik konserttik baǵdarlamamen aıaqtaldy.