Parlament Senatynyń depýtattary Dınar Nóketaeva, Tóleýbek Muqashev jáne Dýlat Qusdáýletov Almaty qalasynda jumys saparymen bolyp, Elbasynyń Joldaýyn túsindirý maqsatynda Almaty aýyr mashına jasaý zaýytynyń eńbek ujymymen kezdesti.
Senatorlar zaýyt ishin aralap, júrgizilip jatqan jumystardy kórip, sheshimin tappaı jatqan keıbir máselelerdi Úkimettik deńgeıde kóteretinderin jetkizdi. – Bizdiń munda kelýdegi negizgi maqsatymyz – otandyq óndiristi qoldaý, sondaı-aq kásiporyn basshylarymen tildesip, qandaı ózekti máseleleri baryn bilý. Keıbir sheneýnikter mundaı óndiris oryndaryna kelmeıdi. Al bizdiń kásipkerler kafe-bar, meıramhana, qonaqúıler salýǵa áýes. Jastarymyz az aqshaǵa daıashy, kúzetshi, kólik jýýshy bolyp jumys istep júr. Odan da biz otandyq óndirisimizdi qoldap, qoldan kelgenshe kómektesip, jastardy osynda jumysqa tartýǵa úgitteýimiz kerek, – dedi Senat depýtaty Tóleýbek Muqashev. Quıý sehynda isteıtin jumysshylardyń ortasha jalaqysy 364 000 teńgeni quraıdy eken. Zaýytta 870 adam jumys isteıdi. Senatorlar Abaı atyndaǵy Qazaq ulttyq pedagogıkalyq ýnıversıtetinde jáne otandyq ulttyq kıim úlgilerin shyǵaratyn «Erke-Nur» kásipornynda da boldy.
Talǵat SÚIINBAI,
«Egemen Qazaqstan»
ALMATY