16 qazanda Máskeýde «Rýhanı jańǵyrý» baǵdarlamasyn júzege asyrý jónindegi Ulttyq komıssııa men «Jahandaný jaǵdaıyndaǵy zamanaýı qazaqstandyq mádenıet» jobasynyń reseılik seriktesi arasynda yntymaqtastyq týraly memorandýmǵa qol qoıyldy. Naqtyraq aıtsaq, «Qazirgi qazaq prozasynyń antologııasy» men «Qazirgi qazaq poezııasynyń antologııasy» orys tiline aýdarylyp, basyp shyǵarylatyn boldy.
Bul iske M.V.Lomonosov atyndaǵy Máskeý memlekettik ýnıversıtetiniń baspa úıi, sondaı-aq Reseı Jazýshylar odaǵynyń Máskeý qalalyq uıymy atsalysady.
Qazirgi zamanǵy qazaq ádebıetiniń úzdik úlgileri jınaǵyn BUU-nyń 6 tiline aýdarý Qazaqstan Respýblıkasynyń Prezıdenti N.Á.Nazarbaevtyń bastamasymen qolǵa alynǵan «Rýhanı jańǵyrý» baǵdarlamasy aıasynda júzege asyp jatqany málim. Baǵdarlamanyń mańyzdy baǵyttarynyń biri – «Jahandaný álemindegi zamanaýı qazaqstandyq mádenıet». Onyń maqsaty – zamanaýı qazaq ádebıetiniń, mýzykasy men beıneleý óneriniń jaýharlaryn, kıno men teatr, horeografııa salasynyń táýelsizdik jyldaryndaǵy tabystaryn dúnıe júzine tanystyrý.
Memorandýmǵa qol qoıý rásimi Qazaqstannyń Reseıdegi elshiliginde, Qazaqstan Respýblıkasynyń Reseı Federasııasyndaǵy Tótenshe jáne ókiletti elshisi Imanǵalı Tasmaǵambetov pen «Ulttyq aýdarma bıýrosynyń» dırektory Raýan Kenjehanulynyń qatysýymen ótti. Qazaqstan tarapynan memorandýmǵa «Rýhanı jańǵyrý» baǵdarlamasyn júzege asyrý jónindegi ulttyq komıssııanyń hatshysy Aıda Balaeva qol qoıdy. Rásim barysynda A.Balaeva:
– Máskeý memlekettik ýnıversıteti men Reseı jazýshylar qaýymynyń ortalyq aımaqtaǵy iri uıymynyń mol tájirıbesi men joǵary bedeliniń arqasynda jobamyzdyń sátti júzege asatynyna, ıaǵnı qazaq ádebıetiniń orys tiline aýdarmasynyń sapasy joǵary bolatynyna ári basylym orystildi keńistikte keń taralatynyna senimdimin, – dep jyly lebizin bildirdi.
О́z kezeginde Máskeý memlekettik ýnıversıteti janyndaǵy baspa úıiniń dırektory Aleksandr Veraksa ýnıversıtet baspasy jobanyń sátti júzege asýy úshin oqý ornynyń talaı jylǵy tájirıbesine arqa súıep, bar kúshterin salatynyn jetkizdi. Al Reseı Jazýshylar odaǵy Máskeý qalalyq uıymynyń tóraǵasy Vladımır Boıarınov aýdarmany antologııaǵa daıyndaý barysy Qazaqstan men Reseı qalamgerleri arasyna altyn arqaý bolyp, ózara mádenı yqpaldastyqqa oń áserin tıgizetinine úmiti zor ekenin aıtty.
Memorandýmda kórsetilgen yntymaqtastyq aıasynda Reseı Jazýshylar odaǵynyń Máskeý qalalyq uıymy ádebı jınaqtarǵa suryptalǵan shyǵarmalardyń kórkem aýdarmasymen jáne ony redaksııalaýmen aınalysady. Al Máskeý memlekettik ýnıversıtetiniń baspa úıi antologııany basyp shyǵarýdy, sondaı-aq ony orystildi oqyrmandarǵa taratýdy, nasıhattaýdy uıymdastyrady.
«Egemen-aqparat»