Asqar Jumaǵalıev Elbasynyń jyl saıynǵy Joldaýynyń oryndalýy barysyn talqylaý úshin Atyraý oblysy ákimimen kezdesti.
О́z sózinde Asqar Jumaǵalıev Joldaý bólimderine jeke toqtaldy jáne olardy júzege asyrý jónindegi sharalar týraly baıandady.
Vıse-premer jastardyń nazaryn bilim berý jáne ınnovasııalardy damytý salasyndaǵy múmkindikterge aýdardy. Jáne olardy memleket barynsha qolaıly jaǵdaı jasaǵan kezde belsendi bolyp, óz múmkindikterin paıdalanýǵa shaqyrdy.
-Qurmetti Atyraý qalasynyń turǵyndary, Elbasy atap ótkendeı ómir súrý deńgeıin arttyryp, qazaqstandyqtardyń jaǵdaıyn jaqsartý jolynda jańa jetistikterdi qoldanamyz. Ol úshin biz birge jumys jasaýymyz kerek,- dedi vıse-premer.
Atyraý oblysynyń ákimi Nurlan Noǵaev óz sózinde óńir turǵyndary Elbasy Joldaýynda kórsetilgen mindetterdi júzege asyrý úshin bar kúsh-jigerin jumsaýǵa daıyn ekenin atap ótti.
-Jumys sapary barysynda Premer-Mınıstrdiń orynbasary Asqar Jumaǵalıev «Sandyq Qazaqstan» baǵdarlamasy boıynsha júzege asyrylǵan birqatar jobalarmen tanysty. Sonymen qatar, «Batys tranzıt» JShS-de Atyraý qalasyndaǵy jáne qala mańyndaǵy aýyldyq okrýgterde kóshelerdi jaryqtandyrýdy jańǵyrtýdan turatyn «aqyldy» jaryqtandyrýdy engizý boıynsha jobany iske asyrý barysymen tanysty.
Asqar Jumaǵalıev Atyraýlyq «Bilim-ınnovasııa» lıseıinde bolyp,EduPage elektrondy jýrnaly, sandyq kitaphana, sıfrlyq bilim berý resýrstary, sondaı-aq oqý úderisin sıfrlandyrý sheńberinde júrgizilgen jumystarmen tanysty.
Aıta ketý kerek, oblystyń orta bilim berý mekemelerinde «Sandyq Qazaqstan» memlekettik baǵdarlamasyn júzege asyrý boıynsha aýqymdy jumys júrgizilýde. Atap aıtqanda, 12 oblystyq kolledj avtomattandyrylǵan júıege qosylǵan. Kelesi jyly «Qaýipsiz mektep» júıesin engizý josparlanýda, stýdentterdi mektepke qabyldaýdy avtomattandyrý úshin jumys júrgizilýde. Qazirgi kezde 183 mektep elektrondy jýrnal men kúndelik júıesine qosylǵan, 163 balabaqsha joldama berýdiń avtomattandyrylǵan júıesine aýysty.
Sodan soń QR Premer-Mınıstriniń orynbasary Asqar Jumaǵalıev №3 qalalyq emhanada bolyp qaıtty. Ol aqparattyq-analıtıkalyq júıeniń fýnksıonaldylyǵymen, emhanalardaǵy elektrondy kezekpen, densaýlyq saqtaý sektoryn sıfrlandyrý úderisimen tanysty, sondaı-aq mobıldi qosymshalarǵa qoljetimdilikti tekserdi.
Ol sıfrlandyrý medısına qyzmetkerleri men medısına uıymdary arasynda aqparat almasýǵa jaqsy qoldaý kórsetip otyrǵanyn atap ótti. Densaýlyq saqtaý basqarmasynyń málimetinshe, qazirgi ýaqytta oblystyń 34 medısınalyq uıymynda 15 myńnan astam adam qoldanatyn mobıldi qosymsha bar.
Sapardyń sońynda Premer-Mınıstrdiń orynbasary «Embimunaıgaz» AQ bas keńsesinde boldy, onda «Ǵalamdyq ıntellektýaldy alań» pılottyq jobasyn talqylaýǵa qatysty.
Sapardyń sońynda Asqar Jumaǵalıev jaýapty tulǵalarǵa birqatar naqty tapsyrmalar berdi.