Nurotandyqtar Elbasy Joldaýyn júzege asyrýdy quqyqtyq qamtamasyz etý jumystaryna belsene kirisip ketti. Naqty aıtqanda, «Nur Otan» partııasy Parlament Májilisindegi fraksııasy arqyly normatıvtik-quqyqtyq aktilerge tıisti ózgertýler men tolyqtyrýlar engizýdi josparlap otyr.
Sonyń nátıjesinde Memleket basshysynyń tapsyrmalaryn tıimdi oryndaýǵa jaǵdaı jasalmaq. Osyǵan oraı keshe partııanyń Ortalyq apparatynda Quqyqtyq keńestiń kezekti keńeıtilgen otyrysy ótti. Onda qatysýshylar elimizdegi turǵyn úı-kommýnaldyq sharýashylyǵyn reformalaýǵa qatysty ózekti máselelerdi talqylady. Jıynǵa «Nur Otan» partııasy Tóraǵasynyń birinshi orynbasary Máýlen Áshimbaev qatysty.
Elbasy Joldaýda ekonomıkada básekelestikti damytý jáne turǵyn úı-kommýnaldyq sharýashylyǵy men tabıǵı monopolııalardyń qyzmeti úshin belgilenetin tarıfter salasynda tártip ornatý maqsatynda batyl sharalar qabyldaý kerektigin naqty tapsyrǵan bolatyn. Bul oraıda Memleket basshysy kommýnaldyq qyzmet pen tabıǵı monopolııalardy retteý salalarynda tarıftiń jasalýynyń jáne tutynýshylardan jınalǵan qarjynyń jumsalýynyń áli kúnge deıin ashyq emestigine, monopolısterdiń ınvestısııalyq mindettemelerine tıimdi monıtorıng pen baqylaý júrgizilmeı otyrǵanyna erekshe nazar aýdardy. Osyǵan baılanysty Prezıdent Úkimetke 3 aı merzim ishinde osy máselemen aınalysyp, básekelestikti qorǵaý fýnksııasyn eleýli túrde kúsheıte otyryp, monopolııaǵa qarsy vedomstvonyń jumysyn reformalaýdy tapsyrdy.
Joldaýda qarastyrylǵan barlyq sharalardyń júzege asyrylýyn zańnamalyq turǵyda qamtamasyz etý úshin partııa ókilderi «Qazaqstan Respýblıkasynyń turǵyn úı-kommýnaldyq sharýashylyq máseleleri jónindegi keıbir zańnamalyq aktilerine ózgertýler men tolyqtyrýlar engizý týraly» zań jobasyn talqylady. Bul jaıttyń qazaqstandyqtardy kópten beri tolǵandyryp júrgen ózekti máselelerdiń biri ekeni belgili.
«Nur Otan» partııasynyń Strategııalyq zertteýler ınstıtýtynyń derekterine súıensek, qazaqstandyqtardyń 36 paıyzdan astamy páter ıeleri kooperatıviniń qyzmetine kóńilderi tolmaıdy. Bul rette halyq qyzmet kórsetýshi kompanııa áreketteriniń ashyq emestigin jáne túsken qarjynyń qaıda jumsalǵanyn baqylaıtyn tetiktiń joqtyǵyna narazylyqtaryn bildirgen.
Osy máselelerdiń barlyǵy Quqyqtyq keńes otyrysynda keńinen talqylandy. Jıyndy ashqan «Nur Otan» partııasy Tóraǵasynyń Birinshi orynbasary turǵyn úı qurylysy qarqyndy júrgizilgenimen, TÚKSh salasynda sheshimin tappaǵan máseleler sol kúıinde qalyp otyrǵanyn aıtty. Sonyń ishinde kommýnaldyq qyzmet tarıfteriniń ashyq bolmaýy men negizsizdigine jáne kóppáterli turǵyn úılerdi basqaratyn kompanııalardyń qyzmet sapasyna qatysty máselelerge erekshe nazar aýdardy.
Sonymen qatar jıynda Elbasy tapsyrmalaryn sapaly oryndap, halyqtyń kópten kútken máselesin ońtaıly sheshý úshin turǵyn úı-kommýnaldyq qatynastaryn jańǵyrtatyn júıeli negiz qalyptastyrý kerektigi aıtyldy. Odan bólek, turǵyn úı-kommýnaldyq sharýashylyǵyn reformalaýdaǵy basty mindet kóppáterli turǵyn úılerdi basqarý qyzmetiniń joǵary sapasyna qol jetkizý ekendigi de sóz boldy. Osyǵan oraı qatysýshylar engizilip otyrǵan zań jobasy turǵyn úı-kommýnaldyq sharýashylyǵynyń barlyq salasyn reformalaý jáne jańǵyrtýdyń zańnamalyq negizi retinde qarastyrylýy kerektigine basa mán berdi. Sol sebepti de partııa ókilderi zań jobasyn búkilhalyqtyq jáne jan-jaqty talqylaýdy qoldap, barsha azamattar men úkimettik emes uıymdardy osy úderiske belsendi qatysýǵa shaqyrdy.
– Turǵyn úı-kommýnaldyq sharýashylyǵyn retteıtin zań jobasy Májilistiń qaraýynda. Bul rette bizdiń basty mindetterimizdiń biri – atalǵan zań jobasyn tııanaqty saraptap, onyń halyq kútken máselelerdi sheshýge jáne elimizdiń turǵyn úı qoryn tıimdi basqarýǵa áser etýin qamtamasyz etý. Sondaı-aq osy salada tıimdi monıtorıng júrgizip, monopolıster men páter ıeleri kooperatıviniń jumysyn anyqtaý da bizdiń basty mindetimiz. Partııa osy baǵytta qoǵamdyq birlestiktermen jáne úkimettik emes uıymdarmen kúsh biriktirip, júıeli baqylaý júrgizýge daıyn. Sondyqtan búgingi basqosýymyzdy sol aýqymdy jumystyń bastamasy dep te qabyldaımyz, – dedi M.Áshimbaev.
Nurotandyqtar usynǵan túzetýler kondomınıým obektilerin basqarý men olarǵa qyzmet kórsetý jáne onyń oryndalý tártibin retteýge baǵyttalǵan. Iаǵnı, onda menshik ıeleriniń qatysýymen jáne bul jumystarǵa jergilikti atqarýshy organdardyń turǵyn úı ınspeksııasyn jumyldyrý arqyly ortaq múlikti kúrdeli jóndeýge qarajat jınaqtaý úderisteri kórsetilgen. Jańartylǵan zań jobasynda turǵyn úı-kommýnaldyq sharýashylyǵynyń biryńǵaı memlekettik aqparattyq júıesin qurý múmkindigi de qarastyrylǵanyn atap ótken jón. Daıyndalǵan normatıvtik-quqyqtyq aktiler halyqtyń turǵyn úı qurylys kompanııalaryna qosylýy arqyly baspanaly bolý tetikteriniń ashyqtyǵyn arttyrýǵa, sondaı-aq qoldanystaǵy zańnamalyq kemshilikterdi joıýǵa baǵyttalǵan.
Jalpy, atalǵan túzetýler turǵyn úı-kommýnaldyq sharýashylyǵy júıesin reformalaý úshin birneshe máseleni qatar sheshýge baǵyttalǵan.
Aıta keteıik, jıynǵa Parlament depýtattary, «Nur Otan» partııasy janyndaǵy Quqyqtyq keńestiń músheleri, memlekettik organdar men úkimettik emes uıymdardyń basshylyǵy jáne olardyń óńirlerdegi ókilderi qatysty. Al Quqyqtyq keńestiń otyrysy nátıjesinde daıyndalǵan tıisti usynystar aldaǵy ýaqytta jaýapty memlekettik organdar men basqa da múddeli uıymdarǵa joldanady.
Jaqsybaı SAMRAT,
«Egemen Qazaqstan»