Býenos-Aırestegi jasóspirimder Olımpıadasynyń on birinshi jarys kúni qazaqstandyq sportshylar úshin sátti ótti. Elimizdiń baıraǵy tórt ret kókke kóterilip, Ánuranymyz eki márte shyrqaldy, dep habarlaıdy Olympic.kz
Velosporttan keshendi jarys qorytyndysy boıynsha Qazaqstan qyzdar komandasy altynshy oryn ıelendi. Marına Kýrnosova men Svetlana Pashenko úzdikter qatarynan kóriný úshin sońǵy jarys kúninde baryn salýy tıis edi. Alaıda, eýropalyq qarsylastaryna ese jibergen qazaqstandyqtar jalpy esepte alǵashqy altylyqqa ǵana ene aldy.
«Árıne, úzdik úshtikke enemiz degen maqsatymyz bolǵan. Alaıda, búgingi kún biz úshin qolaıly bolmady. Jarystyń bul túri bizge qol emes. Azııa men Eýropadaǵy deńgeıdi salystyra almaısyń. Eýropalyq qyzdar bizden bir bas joǵary ekenin moıyndaý kerek. Olardyń taktıkalyq ádisteri, jyldamdyǵy, márege jaqyndaǵan tustaǵy qımyl-áreketteri bizdi orap ketedi. Sondyqtan, jolymyz bolmady», - deıdi Pashenko.
Al velosporttan erler komandasy naǵyz erlik jasap, Jasóspirimder Olımpıadasynyń chempıony atandy! Gleb Brýsenskıı men Evgenıı Fedorov qarsylastaryna esh aıla qaldyrǵan joq. Olar birinshi jarys kúninen bastap kóz tizginin qolǵa alǵan bolatyn. Saıys barysynda qarsylastarynan oq boıy ozyq turǵan bizdiń sportshylar jankúıerler men bapker úmitin aqtap otyr.
«Daıyndyqty byltyr bastadyq. Qurlyq dodasynan bas tartýǵa týra keldi. Árıne, ol jaqta da jeńetinimizge kúmán joq. Alaıda, jaraqattan aman bolý úshin Azııa birinshiligine eki sportshyny jibermedik. Maýntınbaıktiń jarys baǵdarlamasyna enetinin bilgen soń, Ispanııada qarqyndy túrde jattyǵý jumystaryn júrgizdik. Keıin tas joldaǵy jarystan álem kýbogine qatysqanymyz bar. Shildede qaıtadan maýntınbaıkti qolǵa aldyq. Sol jattyǵý jıyndarynyń keshegi kross-kantrıde kómegi tıdi. Jigitter jarap tur! О́zim de úshinshi orynnan úmittenip kelgem. Alaıda,olar men oılaǵannan da asyp tústi», - dep aǵynan jaryldy Gorbachevskıı.
Qazaq eliniń boksshylary keshegi jarys kúninde úsh ret tuǵyrǵa shyqty. Nadejda Rıabes qola, Damır Toıbaı kúmis júldeger atansa, Aıbek Oralbaı altynnan alqa taqty.
Olımpıada chempıony atanǵan Aıbek Oralbaı el namysy úshin bar kúshin salǵanyn jasyrǵan joq.
"Men bul boksshymen álem chempıonatynyń jartylaı fınalynda kezdesken edim. Ol joly da, búgin de jeńiske jettim. Ekinshi raýndta qarqyndy kúsheıtip, odan basym tústim. Búgin qoldaý bildirýge kelgen qazaqstandyq basqa sportshylarǵa, bapkerlerge alǵysym sheksiz. Olardyń qoldaýyn sezindim. Namysty qoldan bermeı, altynǵa qol jetkizdim", - dedi Olımpıada chempıony Aıbek Oralbaı.
Ashylý saltanatynda elimizdiń kók baıraǵyn kóterip shyqqan Damır Toıbaı óziniń ádiletsizdik qurbany bolǵanyn ashyq aıtty. Sportshy qarsylasyn qýalap júrip ursa da, tóreshiden upaı ala almaǵan. Dese de, Damırdiń bolashaǵy áli alda. Biz onyń talaı básekeden altynmen oralaryna senimdimiz!