Parlament depýtattary Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn aımaqtarda talqylap, nasıhattaý maqsatynda aýdan, qalalarda túrli kezdesý men túsindirý jumystaryn júrgizýde.
Almatyda Májilis Tóraǵasynyń orynbasary, «Nur Otan» partııasy fraksııasynyń jetekshisi Gúlmıra Isımbaeva, depýtattar Gúlnar Yqsanova men Olga Shıshıgına «EFKO ALMATY» zaýytyna bardy.
Kásiporyn ujymymen kezdesý barysynda Gúlmıra Isımbaeva kompanııanyń básekege qabiletti ónim shyǵarý jáne ony syrtqy naryqqa jetkizý boıynsha jetistikterin atap ótti.
Sapar aıasynda depýtattar «Ulttyq memlekettik ǵylymı-tehnıkalyq saraptama ortalyǵy» AQ-ǵa da bardy. Ortalyqtyń jumysy ǵylymı, ǵylymı-tehnıkalyq jáne ınnovasııalyq jobalar men baǵdarlamalar saraptamasyn basqarýdyń, táýelsizdiginiń, ashyqtyǵy men jarııalylyǵynyń biryńǵaılyǵyn qamtamasyz etedi.
Al Túrkistan oblysynda Májilis depýtattary Mansurhan Mahanbetov pen Sáken Qanybekov jáne Sergeı Zvolskıı Joldaýdyń negizgi basymdyqtaryn tereńirek túsindirý maqsatynda «Nur Otan» partııasy Saıram aýdandyq fılıalynyń aktıvimen kezdesti.
Kezdesýde Joldaýdy júzege asyrý barysynda atqarylyp jatqan jumystar jóninde baıandalyp, «Nur Otan» partııasy Saıram aýdandyq fılıalynyń 2017-2018 jyldary atqarylǵan jumystary týraly aýdandyq fılıaldyń birinshi orynbasary Marııa Qalybaevanyń esebi tyńdaldy. Jıynǵa partııa belsendileri, atqarýshy bılik ókilderi men quqyq qorǵaý mekemeleriniń basshylary, sondaı-aq qoǵamdyq uıym jetekshileri men buqaralyq aqparat quraldarynyń ókilderi qatysty.
Sondaı-aq Soltústik Qazaqstan oblysyndaǵy jumys sapary aıasynda Parlament Májilisiniń depýtattary Sapar Ahmetov, Petr Sharapaev jáne Berik Ospanov Aqqaıyń aýdanyna bardy.
Aýdandaǵy «Poltavskoe» JShS qyzmetkerlerimen, Poltavka orta mektebiniń ujymymen jáne aýyl turǵyndarymen kezdesýde depýtattar Elbasy Joldaýyn talqylady.
«Poltavskoe» JShS eńbek ujymymen ótken is-shara ónim eksportynyń kólemin ulǵaıtý jáne agroónerkásiptik keshenniń áleýetin iske asyrý máselelerine arnaldy.
Muǵalimderdiń bedeli jáne bıýdjettik qyzmetkerlerdiń jalaqysyn kóterý týraly májilismender Poltavka orta mektebiniń ujymymen kezdesýde aıtty.
Aqparattar «Egemen Qazaqstannyń» óńirlerdegi tilshilerinen alyndy.