Batys Qazaqstan oblysyndaǵy birqatar iri kásiporyn basshylary eń tómengi jalaqy alatyn qyzmetkerleriniń jalaqysyn ósirý týraly sheshim qabyldady. Bul Prezıdenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıtylǵan tapsyrmamen tikeleı baılanysty.
Batys Qazaqstan oblysynyń ákimi Altaı Kólginov óńirdegi iri kásiporyn basshylarymen kezdesýi kezinde kompanııa basshylary Memleket basshysynyń bastamasyn qoldaıtynyn jetkizip, eń tómengi jalaqy alatyn qyzmetkerleriniń eńbekaqysyn kóterý týraly sheshim qabyldanǵanyn atap ótti. Olardyń ishinde «Zenıt», «Oral transformator zaýyty», «Gıdroprıbor», «Ýralskagroremmash», «Kondensat», «Stroıkombınat», «Jelaev nan ónimderi kombınaty, «ÝPTK», «Kvant» JShS, «Beles-agro», «Zenıttehservıs», «Jaıyqagro-LTD», Oral kirpish zaýyty, Oral mehanıkalyq zaýyt jáne t.b. iri kásiporyndar bar.
Bul kásiporyndarda jalaqy ǵana ósip qoımaıdy. Kompanııa basshylary jumysshylardyń áleýmettik jaǵdaıyn jaqsartýǵa, adamı kapıtaldy damytý boıynsha ınvestısııa quıýǵa erekshe kóńil bólinip jatqanyn atap ótti.
- Biz árqashan memlekettiń qoldaýyn kórip kelemiz. Memlekettik turǵyn úı baǵdarlamalary arqasynda turaqty tapsyrys bar. Búginde bizdiń ujymda 400-den astam jumysshy qyzmet etedi. Biz Elbasy bastamasyn tolyq qoldaımyz jáne eń tómengi jalaqy alatyn jumysshylarǵa taǵy 10-15% kóterý týraly sheshim qabyldadyq, - dedi Oral kirpish zaýytynyń dırektory Muhamedjan Kenjeǵulov.
Oral transformator zaýytynda da 250-den astam adam úsh aýysymda qyzmet etedi. Munda ortasha jalaqy 170-180 teńge shamasynda. Kásiporyn taýary negizinen eksportqa baǵyttalǵan. Zaýyt dırektory Aqjol Saýranbaev eń az jalaqy alatyn qyzmetkerleriniń aılyǵyn qazirgi 70 myń teńgeden 10-15 paıyzǵa kóterýge sheshim qabyldanǵanyn habarlady. «Bizdiń zaýytta 100 stýdent dýaldy bilim júıesimen qamtylǵan. О́ndiris kólemin ulǵaıtýdy josparlap otyrmyz, bul óz kezeginde jalaqynyń ósýine septigin tıgizedi», - deıdi transformator zaýytynyń dırektory. Aıta keteıik, zaýyt óniminiń 95%-y eksportqa, TMD elderine shyǵarylady. Dırektordyń aıtýynsha, jańa jylda zaýytta jańa seh ashylyp, 110 adamǵa jumys orny paıda bolmaq. Kásiporyn bıyl jyl sońyna deıin 7 myń, keler jyly 12 myń transformator shyǵarýdy kózdep otyr eken.
- Zaýyt basshylyǵy jastardy qoldaý baǵytynda áleýmettik mindetteme qabyldap, júıeli jumys júrgizip keledi. Mysaly, zaýytta qyzmet etetin qyz ben jigit úılenetin bolsa, olarǵa 500 myń teńge kóterme syıaqy beremiz. Al zaýyt qyzmetkeriniń otbasynda dúnıege kelgen sábı úshin osy kezge deıin 150 myń teńge qarjylaı qoldaý kórsetetinbiz. Endi onyń mólsherin 250 myń teńgege kóterdik. Jalpy, bizdiń zaýyt ujymynyń ortasha jasy – 28. Sondyqtan da joǵaryda aıtylǵan qoldaý-kómek árbir qyzmetkerimiz úshin mańyzdy dep oılaımyz, - deıdi Aqjol Saýranbaev.
О́ńirdegi iri kásiporynnyń biri – «Jelaev nan ónimderi kombınaty» AQ ujymynda 560 adam eńbek etedi. Olardyń ortasha aılyq jalaqysy - 95 myń teńge shamasynda. AQ dırektory Edýard Fedorchenko aldaǵy 2019 jyldy kútpeı-aq tabysy eń tómen jumysshylardyń jalaqysyn 10%-ǵa kóterýge sheshim qabyldanǵanyn habarlady. Qazir kombınattaǵy eń tómengi jalaqy mólsheri - 50 myń teńge. Ony 26 adam alady.
Qorǵanys salasy men shekara kúzetiniń tapsyrystaryn oryndap júrgen belgili oraldyq «Zenıt» zaýytynda 822 adam qyzmet etedi, olardyń búgingi ortasha aılyǵy 125 myń teńge. «Degenmen, bizdiń ujymda 29 adam eń az jalaqy – aıyna 51 myń teńge alady. Biz 2019 jyldyń basynan zaýyt barlyq ujymyna 10 paıyz ósiremiz, al eń az jalaqy mólsheri 57 myń bolmaq. Árıne, memleket tarapynan tapsyrys bolsa, áli de kóterýge múmkindik bar, - deıdi «Zenıt» zaýytynyń bas dırektory Vıacheslav Valıev.
«Eń tómengi aılyq mólsherin ósirý» dep atalatyn jańa bastamanyń nátıjesinde batysqazaqstandyq kásiporyndardyń 1500-den astam jumysshysy endi aıyna 65-70 myńǵa deıin ulǵaıady dep kútilýde.
Qazbek QUTTYMURATULY,
«Egemen Qazaqstan»
Batys Qazaqstan