Dástúrli shara halyqaralyq deńgeıde uıymdastyrylyp, «Eýrazııalyq áleýet jáne jahandyq syn-qaterler jaǵdaıyndaǵy jańa damý múmkindikter» degen taqyrypqa arnaldy.
Oblys ákiminiń orynbasary Madııar Qojahmet konferensııaǵa qatysýshylarǵa aımaq basshysy Qumar Aqsaqalovtyń quttyqtaýyn jetkizip, otandyq ǵylymnyń damýyna zor úles qosqan tulǵanyń zaıyby Sara Qozybaeva men respýblıkalyq ulttyq mýzeı dırektorynyń orynbasary, tarıh ǵylymdarynyń doktory Jáken Taımaǵambetovti qurmet gramotamen marapattady.
Alqaly bas qosýda «Alash» ǵylymı-zertteý ortalyǵynyń dırektory Turdyǵul Shanbaı, L. Gýmılev atyndaǵy Eýrazııa ulttyq ýnıversıteti áleýmettik ǵylymdar fakýltetiniń dekany Tilegen Sadyqov, Chelıabi memlekettik ýnıversıtetiniń professory, «Arkaım» tarıhı-mádenı qoryǵy dırektorynyń orynbasary Gennadıı Zdanovıch, Kaýnas tehnologııalyq ýnıversıtetiniń professory Saýlıýs Nefas, taǵy basqalary «M. Qozybaev arheologııa salasyndaǵy halyqaralyq yntymaqtastyqtyń bastaýynda», «Akademık Manash Qozybaev jáne tarıh ǵylymy fılosofııasy», «Soltústik Qazaqstan óńiriniń toponımııalyq keńistigin zertteýdiń tarıhı-geografııalyq astarlary», «M. Qozybaev jáne Qazaqstandaǵy rýhanı jańǵyrý máseleleri», sondaı-aq eýrazııalyq keńistiktegi qoǵamdyq , gýmanıtarlyq, jaratylystaný, tehnıkalyq, aýyl sharýashylyq ǵylymdarynyń problemalary týraly baıandamalar tyńdaldy. Áleýmettik jáne ekonomıkalyq básekege qabiletti ǵylymnyń róline, elder arasyndaǵy tarıhı baılanystar men sabaqtastyqqa nazar aýdaryldy.
Konferensııada «Manashtaný máseleleri» atty kóptomdyq basylymnyń eki kitabynyń tanystyrylymy ótti.
«Ýnıversıtet janynda M. Qozybaev atyndaǵy ǵylymı-zertteý ortalyǵy 2015 jyldan jumys istep keledi. Onyń qyzmetkerleri, jas ǵalymdar men zertteýshiler qazaq tarıhynyń tarlanbozy jaıly ǵylymı jınaq qurastyryp shyqty», deıdi jergilikti ǵalym Zarqyn Taıshybaı.
О́mir ESQALI,
«Egemen Qazaqstan»
Soltústik Qazaqstan oblysy