Qostanaıda ulttyq óner Táýelsizdik jyldarynan beri jańǵyryp, bıik belesterge umtyldy desek, qobyzshy Batyrbek Baınazarov ult-aspaptar ansambli men orkestrdiń irgetasyn qalasqandardyń biri boldy.
Qurmanǵazy atyndaǵy ulttyq konservatorııany bitirgen jas Batyrbek qobyzyn kóterip, Qostanaıǵa kelgen bolatyn. Aldymen «Aq jeleń» ult-aspaptar ansambliniń , odan keıin ult-aspaptar orkestiriniń quramynda onyń qobyzynyń daýysy ár shyǵarmany ulttyq boıaýǵa qanyqtyryp otyrdy. Qobyzshynyń qatysýymen ansambl men orkestr kóptegen repýblıkalyq jáne halyqaralyq baıqaýlarda baq synap, bıikterden kórinip úlgerdi.
Erdiń jasy elýge tolyp otyrǵan Batyrbek óziniń tyńdaýshylarynyń aldynda óner esebin berdi.
Konsertte aldymen kesh ıesi Batyrbek qyl qobyzymen Qorqyttyń «Qońyrynan» bastap, birneshe shyǵarma oryndady. Sonymen qatar, Batyrbektiń ónerdegi dostary belgili ánshiler respýblıkalyq baıqaýlardyń laýreaty Janatbek Kádirov, QR eńbek sińirgen qaıratkeri Janat Baqtaeva, respýblıkalyq jáne halyqaralyq baıqaýlardyń laýreattary dombyrashylar Grıgorıı Iýgaı men Álimjan Ábsadyqov, halyqaralyq baıqaýlardyń laýreaty, qobyzshy Janar Jetpisova, Mádenıet salasynyń úzdigi, dırıjer Erjan Qıtarov Astana, Almaty, Taraz, Qyzylorda, Atyraý qalalarynan kelip, dosynyń keshine án men kúıden shashý shashty.
Keshte Oblystyq mádenıet basqarmasynyń basshysy Erlan Qalmaqov Batyrbek Baınazarovqa oblys ákimi Arhımed Begejanovtyń quttyqtaýyn jetkizip, ıyǵyna shapan japty.
Názıra JÁRIMBET,
«Egemen Qazaqstan»
Qostanaı