О́zimizdiń qazaqtardyń shet memleketterde bilim alýy búginde joǵary deńgeıde. Al qazaq jerine kelip, bilim alyp júrgen azamattardyń bizge áli de bir jaǵynan qyzyq, bir jaǵynan tańsyq kórinetini ras.
Bir jaǵynan ózimiz ózgelerden úırenip qoımaı, ózgelerge úıretýdi de qolǵa alǵanymyzǵa qýanasyń. Taraz qalasynda negizinen qazaq kóp. Elimizdegi iri megapolıs bolmaǵandyqtan, bul óńirden kóp jaǵdaıda ózge ulttyń ókilderin jıi kezdestire qoıý qıyn. Búginde kóne shahar kóshelerinen túrikmen azamattaryn kóptep kezdestirýge bolady. Surastyra kelip, jaqsy bir jaıdy ańǵardyq.
Búginde Taraz memlekettik pedagogıkalyq ýnıversıtetinde 700 túrikmen azamaty bilim alyp júr eken. Atalǵan ýnıversıtet rektory Erjan Ámirbekulynyń aıtýynsha, joǵary oqý ornynyń oqytýshylary О́zbekstan, Qyrǵyzstan, Túrikmenstan memleketterinde bolyp, elimizdegi bilim berý sapasymen tanystyrǵan. Nátıjesinde 700 túrikmen azamaty Taraz qalasyna kelip, bilim alýǵa nıet bildirgen. Bir qýanyshtysy, bul azamattardyń basym bóligi qazaq tilinde oqıdy. Aralarynda qazaq tilin jetik biletin túrikmender de bar. Al qalǵan bóligi aǵylshyn jáne orys tilderinde bilim alýda.
Bul azamattardyń bári de búginde óz esebinen páter jaldap turady. Olardyń qazaq tilin úırenýge degen qulshynysy da jaqsy. Sheteldik azamattar qazaq jerinde ózderin árdaıym qaýipsiz sezinetinderin aıtady. Sonymen qatar jergilikti polısııa qyzmetkerleri de túrikmen azamattarynyń qaýipsizdigin jiti qadaǵalaıdy. Qazaqstan jáne Túrikmenstan arasyndaǵy baılanys búginde jaqsy damyp keledi. Osy oraıda atalǵan joǵary oqý orny kelesi jyly Tarazda bilim alýǵa qushtar túrikmen jastarynyń sanyn 1500-ge jetkizýdi josparlap otyr.
Hamıt ESAMAN,
«Egemen Qazaqstan»
Jambyl oblysy