Shymkentte elimizdegi irgeli oqý orny, respýblıkadaǵy joǵary oqý oryndarynyń úzdik úshtigine kiretin M.Áýezov atyndaǵy Ońtústik Qazaqstan memlekettik ýnıversıteti 75 jyldyq mereıtoıyn atap ótti. Jaqynda ǵana kúrdeli jóndeýden ótip, jańa kelbetke ıe bolǵan bas ǵımarattyń aldynan zańǵar jazýshy Muhtar Áýezovke arnalǵan eńseli eskertkish boı kóterdi.
Bıiktigi 5,3 metr bolatyn eskertishtiń lentasyn Bilim jáne ǵylym mınıstri Erlan Saǵadıev, Túrkistan oblysynyń ákimi Janseıit Túımebaev pen Shymkent qalasynyń ákimi Ǵabıdolla Ábdirahymov qıdy. Saltanatty rásimde sóz alǵan oblys ákimi músinniń shynaıy shyqqanyn, óńirdegi qara shańyraqqa aınalǵan bilim oshaǵynyń uly jazýshy Muhtar Áýezovtyń esimimen atalatyny úlken maqtanysh ekenin atap ótti. Merekelik sharada qonaqtar, sondaı-aq «Muhtartaný» ǵylymı-zertteý ortalyǵynyń ashylýyna qatysty.
Tusaýy kesilgen taǵy bir nysan – «Stýdentterge qyzmet kórsetý ortalyǵynda» boldy. Shákirtterge «bir tereze» qaǵıdasy boıynsha qyzmet kórsetetin ortalyqtyń jumysymen mınıstr Erlan Saǵadıev arnaıy tanysyp shyqty. Ortalyq bir mezette 40-50 stýdentke qyzmet etedi. Ýnıversıtettiń rektory, tarıh ǵylymdarynyń doktory, professor Darııa Qojamjarovanyń aıtýynsha, sıfrlanǵan ortalyq qyzmeti arqyly stýdenttiń bilim alýy, sabaqqa qatysýy, emtıhan nátıjeleri baqylanyp, qajetti qujattaryna da qol jetkizýine bolady.
Ǵalymjan ELShIBAI,
«Egemen Qazaqstan»
Shymkent