Tuńǵysh Prezıdent kúni qarsańynda Atbasar aýdanynyń kópten beri turǵyn úı kezeginde turǵan birneshe otbasy baspanaly boldy.
Atbasar – kóne qala. Burnaǵy jyldary qurylys qarqyny da baıaý boldy. Sol sebepti bul baspanany úmitkerler kópten kútip júrgen. Endi mine, jaqsydan sharapat degendeı, Tuńǵysh Prezıdent kúni merekesi qarsańynda №1 shaǵyn aýdanda 45 páterlik turǵyn úı paıdalanýǵa berildi. Aqıqatynda bul táýelsizdik jyldary kezekke lekken turǵyndarǵa berilip otyrǵan tuńǵysh baspana. Taǵy bir aıta keterligi, baspanaly bolǵandarǵa páter kilti usynyla otyryp, eki kún ishinde qurylys jumystaryn júrgizgen merdigerlerge usynystary men eskertýlerin aıtýǵa mursat berildi.
– Páterli bolǵandar ishinde 9 balalar úıleriniń tárbıelenýshileri bar,–deıdi aýdan ákiminiń mindetin atqarýshy Birlik Qombatyrov,–14 páter áleýmettik jaǵynan az qamtamasyz etilgen adamdarǵa usynyldy. 21 páter memlekettik qyzmetshiler men dárigerlerge, sondaı-aq jas mamandarǵa buıyrdy.
Qala ákiminiń aıtýyna qaraǵanda, qalyń kezekti seıiltý úshin taǵy da eki kópqabatty turǵyn úı salynýda. Al, munda páterdiń zaryn tartyp júrgender jeterlik. Máselen, jergilikti aýrýhananyń jan saqtaý bóliminiń meńgerýshisi Ábilqaıyr Shyrynbekov baspanasy bolmaǵan soń eki jyl boıy aýrýhanany panalaǵan.
– Men úshin aq túıeniń qarny jarylǵan kún boldy,–deıdi Ábilqaıyr Shyrynbekov,–Tuńǵysh Prezıdent kúni qarsańynda bapanaly boldym. Biz úshin aıtary joq, mol qýanysh.
Sońǵy jyldary qarǵyn sýdan qasiret shekken Atbasarda jańa shaǵyn aýdan boı túzegen. Kóktemgi sý tasqynynan zardap shekken adamdarǵa 11 bes qabatty úı salyndy. Endi mine, kóp jyldan beri kezekte turǵandardyń da qoldary baspanaǵa jete bastady.
Qazaq «toı toıǵa ulassyn» demeı me, shynynda da Tuńǵysh Prezıdent kúni merekesi baspanaly bolyp shat-shadyman qýanyshqa bólengen atbasarlyqtardyń aq jarylqap toıymen jalǵasty.
Baıqal BAIÁDIL,
«Egemen Qazaqstan»
Aqmola oblysy