Aqtóbe oblysynyń ákimi Berdibek Saparbaev apparat jınalysynda oblys ákiminiń áleýmettik máseleler jónindegi jańa orynbasaryn tanystyrdy. Prezıdent ákimshiligimen kelise otyra óńir basshysynyń buıryǵymen oblys ákiminiń orynbasary bolyp Toqjanov Marat Luqpanuly taǵaıyndaldy, dep habarlaıdy Aqtóbe oblysy ákiminiń baspasóz qyzmeti
Berdibek Saparbaev jańa orynbasaryna aldaǵy birqatar negizgi mindetterdi qoıdy. Olardyń qatarynda memlekettik áleýmettik baǵdarlamalardy tıimdi júzege asyrý, bilim berý jáne medısınalyq qyzmet kórsetý sapasyn jaqsartý, áleýmettik saladaǵy memlekettik-jeke seriktestikti damytý, mádenı-demalys qyzmetin jandandyrý, dene shynyqtyrý men sportty dáripteý, ardagerlerge, zeınetkerlerge, múgedekter men az qamtylǵan azamattarǵa kórsetiletin áleýemttik kómekti kúsheıtý, qoǵamdyq uıymdardy damytý jáne t.b. suraqtary bar.
«Bular bizdiń búgingi basymdyqtarymyz. Sizdiń áleýmettik saladaǵy úlken tájirıbeńiz qoıylǵan mindetterdi sapaly sheshýge múmkindik beretinine senemin. Osynyń bári aqtóbelikterdiń áleýmettik ál-aýqatyn damytý úshin mańyzdy », - dep atap kórsetti oblys basshysy.
Marat Toqjanov 1965 jyly Batys Qazaqstan oblysynda týǵan. Bilimi joǵary, Qaraǵandy memlekettik ýnıversıtetin, Qazaq memlekettik zań akademııasy men Batys Qazaqstan ınjenerlik-gýmanıtarlyq ýnıversıtetin tarıh jáne qoǵamtaný pániniń muǵalimi, zańger mamandyqtary boıynsha bitirgen. Ekonomıka ǵylymdarynyń magıstri.
Eńbek jolyn 1990 jyly Jezqazǵan oblysynyń Sátbaev qalasyndaǵy mektep-ınternatynyń muǵalimi bolyp bastaǵan.
1990 – 1999 jyldary Batys Qazaqstan aýyl sharýashylyǵy ınstıtýtynyń saıası tarıh kafedrasynyń assıstenti, «Aqjaıyq LTD» JShS dırektory, Qazaqstan Respýblıkasy Bilim jáne ǵylym mınıstrliginiń arheologııa ınstıtýtynyń ǵylymı qyzmetkeri boldy.
Ár túrli jyldary Almaty qalalyq aqparat jáne qoǵamdyq kelisim basqarmasynda, Qazaqstan Respýblıkasy energetıka, ındýstrııa jáne saýda mınıstrliginiń memlekettik materıaldyq qor boıynsha komıtetiniń bóliminde, QR Ádilet mınıstrliginiń ishki ákimshilendirý departamentiniń baqylaý bóliminde basshylyq qyzmetterdi atqardy.
2004 jyly Temirtaý qalasyndaǵy ádilet basqarmasyna basshylyq qyzmetke taǵaıyndalady.
2007-2017 jyldar aralyǵynda Oral qalasy ákiminiń orynbasary, BQO Shyńǵyrlaý aýdanynyń ákimi, BQO bilim basqarmasynyń basshysy, BQO ishki saıasat basqarmasynyń basshysy, BQO ákimi apparatynyń basshysy jáne BQO ákiminiń orynbasary bolǵan.
2018 jyldyń qańtar aıynan bastap sońǵy taǵaıyndaýyna deıin QR kásipodaq uıymdary federasııasynyń basshysy boldy.